Qaỹo'o't soua nasheerel
1Ñim Nataxala' 'enapega so Moisés, 'eeta':
2«'Auo'o't qome caua dos nasheerel 'auachegoxotaiguilo na lcat plata. Ime, nache 'auo'ogoxonalo caamaye da 'auỹaxaneuga da 'alaỹona't na shiỹaxauapi, qataq da ivita da jec 'anqa'en namayepi. 3Nache da qaỹashiiyiguilo que'ecaua nasheerel, nache 'enauac ne'ena nhuo' le'ecpi laỹona't da 'am naua'a, huaña ca ñegueuo ca npe'l maye naỹonqa'. 4Qaq da 'oonole aca qaỹashiiyigui, nache ndotec na lataxala'pi na maiche nalamaxat nhuo' le'ecpi Israel le'ecpi, da 'am taua'a da laỹona't. 5Qaq da lỹateueegue' ca lta'araic na'alaxac que'eca l-lamaxa caua nasheerel, nache naỹamaxat da jec qome ca netaña na pa'aỹa'ague da yo'oxoñi, 6qaq da qaltaq qaỹe'eguelaxalec da qaỹashiiyiguilo caua nasheerel, da lỹateueegue' da na'alaxac, nache naỹamaxat da jec ca netaña na pa'aỹa'ague da la'añaxa. 7Qaq da ndotec da l-lamaxa aca nasheere, qache choche qaỹo'ot ca laponaxac na shiỹaxauapi. 8Qaq ñeua llalqa so Aarón maye ntaxaỹaxanaxanaqa, nacheñiua qome ñeua ỹashiiyiguilo caua nasheerel. Qaq de'era qalapaxañi lataxac, choche tatec qome da qauo'ocheetac qami', qataq cam qaỹa'alquipi. 9Qaq da qami' iloquiaxa'n ca qanpa'aguenaxauaipi da qoñiitalec ca qana'alhuai. Nache da qoqui da qanalaache', nache qaỹashiiyiguilo caua nasheerel, lỹateueegue' qanqa'en ca na'alaxac. Yaqto' Ñim Nataxala' ishet da iuennata'alo qami', nache qami' nca'alaxateeguesopa ca qanpa'aguenaxauaipi. 10Nataqa'en caua na'axa'te da qauamaichiguiñi, nache qaỹashiiyiguilo qome caua nasheerel, qataq da dalaxaic ñi ca'agoxoic huo'otaq da qoỹaneuo na nachetaqtaxanaxat qaỹavigaxatta, qataq na qanhuaachigui. Yaqto' qami' seuennata'alo qome. Aỹem Nataxala', maye Aỹem Qanatamnaxala'ai.»
So Israel le'ecpi ca'ai ye Sinaí
11Qaq se'eso na'a'q veinte so lỹa ca'agoxoic soua dos vi'iye, nache so lo'oc ca'ai so npe'l, maye netaigui aso arca maye laỹe' da aỹamaxataxac. 12Nache so Israel le'ecpi jec da ca'ai ye toolec 'alhua ye Sinaí. Qaq huaña ye toolec 'alhua ye Parán, nache vi'iiguet se'eso lo'oc. 13Qaq qaipacchigui da lamaxasoxonaxac Ñim Nataxala' maye ỹamaxalec co'ollaxa so Moisés, co'ollaq cheta'ague da jec so Israel le'ecpi, 14qaq hua'autec so alleppi maye ỹachetac aso la'anaqte nam chegoxoguetpi so Judá, qaq somayepi nache lataxala' so Nasón, som llalec so Aminadab. 15Qaq so lataxala' na nalleppi na maiche lalamaxat lauo' le'ecpi so Isacar, nacheso so Natanael, som llalec so Suar. 16Qaq so lataxala' so nalleppi na maiche lalamaxat lauo' le'ecpi so Zabulón, nacheso so Eliab, som llalec so Helón. 17Qaq co'ollaq mashe qansogoñi so npe'l, nache jec na chegoxoguetpi so Guersón qataq so Merari, maye nacheso so qaipataxalec co'ollaxa da ỹachetac naxa so npe'l.
18Ime, qataq jec so alleppi maye ỹachetac aso la'anaqte na chegoxoguetpi so Rubén, qaq so lataxala' somayepi, nacheso so Elisur, som llalec so Sedeur. 19Qaq so lataxala' so nalleppi na maiche lalamaxat lauo' le'ecpi so Simeón, nacheso so Selumiel, som llalec so Surisaday. 20Qaq so lataxala' so nalleppi na maiche lalamaxat lauo' le'ecpi so Gad, nacheso so Eliasaf, som llalec so Reuel. 21Ime, qataq jec so chegoxoguetpi so Quehat, maye ỹachetac so nogoxoshetpi maye sa qaishetapec. Qaq co'ollaq ivi' somayepi, nache mashe ime da qaltaq qaỹa'ara't so npe'l.
22Ime, qaltaq jec so alleppi maye ỹachetac aso la'anaqte na chegoxoguetpi so Efraín, qaq so lataxala' somayepi nacheso so Elisama, som llalec so Amiud. 23Qaq so lataxala' so nalleppi na maiche lalamaxat lauo' le'ecpi so Manasés, nacheso so Gamaliel, som llalec so Pedasur. 24Qaq so lataxala' so nalleppi na maiche lalamaxat lauo' le'ecpi so Benjamín, nacheso so Abidán, som llalec so Guidoní.
25Pa'atec nache nalochiguiñi da jec so alleppi maye ỹachetac aso la'anaqte na chegoxoguetpi so Dan, ca'attaueegue da nauaatalec 'enauac so laỹepi alleppi. Qaq so lataxala' somayepi nacheso so Ajiezer, som llalec so Amisaday. 26Qaq so lataxala' so alleppi maye maiche lalamaxat lauo' le'ecpi so Aser, nacheso so Pagiel, som llalec so Ocrán. 27Qaq so lataxala' so nalleppi na maiche lalamaxat lauo' le'ecpi so Neftalí, nacheso so Ajirá, som llalec so Enán.
28Qaq 'era naxa da 'eetec se'eso alleppi Israel le'ecpi da ivita da jec, nache nalochiguiñi.
So Moisés ỹauec so Hobab
29Huo'o so na'a'q, nache so Moisés 'enapega so lacho' Hobab, som llalec so Reuel maye lma' ye Madián, 'eeta':
Qomi' ñeqo'onaxa ye 'alhua maye qomi' ỹachaxanapecoto co'ollaxa Ñim Nataxala'. Ỹoqo'oye qomi' 'auca'ateguelo qome, qaq qomi' 'am sechoxorenaq qome. Cha'aye Ñim Nataxala' ỹachaxana da lchoxonnataxanaxa na Israel.
30Qalaxaye so Hobab 'eeta':
'A'i, saishet da ashec, cha'aye aỹem she'eguelaxa ye ña'alhua qataq ye maiche ihuo' le'ecpi.
31Nache so Moisés qaltaq 'enapega somaye, 'eeta':
Saishettaxa da qomi' 'auala't, cha'aye chaq 'amta da 'auauana 'enauac na huaña na ishet da sonaqaña yi'iye toolec 'alhua, qataq da qomi' 'auachaxanalo ca qoyec. 32Qataq da qomi' 'auca'ateguelo, nache 'am ivirauga nataqa'en 'enauac nam no'on lchoxonnataxanaxatpi maye qomi' ỹanema qome Ñim Nataxala'.
33Huaña co'ollaxa, nache so Israel le'ecpi, ca'ai añi qasoxonaxa maye lalamaqte Ñim Nataxala', nache tres na'axa'te soua lqueuoxoqui'. Qataq qaica'attaueegue aso arca maye laỹe' da naỹamaxataxac Ñim Nataxala', nache qanmittaique ca huaña da qanayeua'a. 34Qaq naxa da choche jec somayepi, nache so lo'oc maye lalamaxat Ñim Nataxala' nalotelec somayepi ye na'a'q da ipelteetalec. 35Qaq naxa da jec aso arca maye laỹe soua aỹamaxataxaco, nache so Moisés, 'eeta':
¡Ña qoñisheguem 'Am Nataxala'! ¡Yaqto' na 'Am ipa'agueetacpi nlagaxattac qome! 36Qaq naxa da vi'iiguet asa'aso arca maye laỹe' soua aỹamaxataxaco, nache so Moisés, 'eeta': «¡Ña 'anmatec 'Am Nataxala', cha'aye 'aualectaigui na qalota nalleppi na Israel le'ecpi maye saishet da qaivi' da qanaloqten.»
