Soua namaxa'she maye demeenaxara ye 'alhua Canaán
1Ñim Nataxala' 'enapega so Moisés, 'eeta':
2«Huo'o qome caua 'auamaq ỹale't da yaqto' demeenaxara ye 'alhua Canaán, maye sanem qome ne'ena Israel le'ecpi. Qalaxaye 'auacootaua'a ñi 'oonolec que'ecaua huo'o naq 'eneque maye lataxala'ate na maiche nalamaxat nhuo' le'ecpi.» 3Nache so Moisés ipacchigui da lamaxasoxonaxac Ñim Nataxala' da ỹama'q soua ỹale't, chegoqchiguiña naqa'en ye toolec 'alhua ye Parán, qaq 'enauaque soomaye lataxala' so Israel le'ecpi qataq huo'o naq 'eneque, 4qaq 'enaua naua le'enaqa'ate soomaye: Samúa, som llalec so Zacur, maye chegoxoguet na maiche lauo' le'ecpi so Rubén, 5qataq so Safat, som llalec so Jorí, maye chegoxoguet na maiche lauo' le'ecpi so Simeón, 6Caleb, som llalec so Yefune, maye chegoxoguet na maiche lauo' le'ecpi so Judá, 7Igal, som llalec so José, maye chegoxoguet na maiche lauo' le'ecpi so Isacar, 8Oseas, som llalec so Nun, som chegoxoguet na maiche lauo' le'ecpi so Efraín, 9Patí, som llalec so Rafú, som chegoxoguet na maiche lauo' le'ecpi so Benjamín, 10Gadiel, som llalec so Sodi, som chegoxoguet na maiche lauo' le'ecpi so Zabulón, 11Gadi, som llalec so Susi, som chegoxoguet na maiche lauo' le'ecpi so Manasés, 12Amiel, som llalec so Gemali, som chegoxoguet na maiche lauo' le'ecpi so Dan, 13Setur, som llalec so Micael, som chegoxoguet na maiche lauo' le'ecpi so Aser, 14Najebí, som llalec so Vapsi, som chegoxoguet na maiche lauo' le'ecpi so Neftalí, 15Geuel, som llalec so Maqui, som chegoxoguet na maiche lauo' le'ecpi so Gad.
16Qaq 'esoua soua le'enaqa'ate soua ỹale't maye ỹama'q co'ollaxa so Moisés, da demeenaxana ye 'alhua Canaán. Qalaxaye so Moisés naralaxat da le'enaxat so Oseas, som llalec so Nun, nache ỹanagui da Josué.
17Qaq so Moisés, co'ollaq ỹamaxa da imeten ye 'alhua soomaye, nache 'enapegalo, 'eeta':
Qoquiitelec qome ye Néguev, choche qaviyeeta'a aye qasoxonaxapi. 18Qaumichiñiita qome yi'iye 'alhua, qataq ye shiỹaxauapi maye netalec yemaye, da 'añaxaicpi, huo'otaq qaica ca la'añaxac, qataq da sa lamai', huo'otaq qalota. 19Qataq ca 'eetec yi'iye 'alhua, da no'on huo'otaq qauem, huo'otaq da netaigui na no'on nỹecpi maye huo'o na lpaqtaxat, huo'otaq da netaigui na npe'l maye ỹasattalec. 20Qataq da ishet da ñaxaalec na nañiguishecpi, huo'otaq saishet, qataq da huo'o ana qo'oipaq huo'otaq qaca. Qataq saishet qome da qayi'iitac da qanache aca ala na nañiguishec yi'iye 'alhua.
Qaq de'era, nache huetoigui co'ollaq mashe huo'o ana la'auaxana ala ana uva yi'iye 'alhua. 21Nache se'esoua ỹale't jec co'ollaxa da demeenaxara yi'iye 'alhua, chegoqchiguiña ye toolec 'alhua ye Sin, nache ivitta'a ye Rejob, yem saqaỹapeque ye ñegueuo ye Jamat. 22Qataq quetelec co'ollaxa soomaye ye Néguev, nache ivitta'alo ye Hebrón. Qaq yemaye nache netañalo co'ollaxa soua Ajimán, Sesay qataq so Talmay maye chegoxogueta so Anac. Qaq yi'iye huaqta'a't nỹecpi ye Hebrón, nache 'eetai' da mashe huo'o, qaq co'ollaq inoxoorec soua siete vi'iye, nache cheta'ague da qano'oxoosheguem so huaqta'a't nỹecpi ye Soán maye huaigui ye Egipto. 23Qaq co'ollaq ivitalo so la'auaxac ye Escol, nache soomaye icheguerec aso lcoue maye netagui ana ala ana uva, nache ỹo'o't so 'epaq da yaqto' lachoxola' da qaỹache, nache dos ỹale't soua nallaguishe'n asomaye, nataqa'en qaỹache aso granada qataq higos. 24Nache se'eso la'auaxac ye ca'amapega't qoỹanagui da le'enaxat Escol, souaxat huaña da se'esoua Israel lashe' icheguerec aso lcoue maye netagui ana ala ana uva.
25Nache co'ollaq ime da imeteetrac yi'iye 'alhua, soua cuarenta na'axa'te, 26nache soomaye ỹe'eguelaxara ye Cades, yem toolec 'alhua ye Parán. Yem hueta'a so Moisés, Aarón qataq 'enauac so Israel le'ecpi. Nache da'aqtaxaarem somayepi 'enauac da lauanaqchec co'ollaxa soomaye, qataq qaỹachaxan aso ala ana nañiguishe yi'iye 'alhua. 27Nataqa'en da'aqtaxaarem so Moisés, 'eeta': Qomi' seviraqa'a ye 'alhua maye qomi' 'auamaxalo, qaq yemaye ỹataqta 'eesa da sa qoue na huaca lche', qataq na te'esaq lli'i, qaq 'ana ana ala na nañiguishec maye huaña yemaye. 28Qalaxaye ye lma' yi'iye 'alhua, yemayepi ỹataqta 'añaxaicpi, qataq nam netaigui huaqta'a't nỹecpi yemayepi ỹataqta lta'al, qataq huo'o na lpaqtaxat. Qataq selaqalec na chegoxoguetpi som shiỹaxaua logoraic le'enaxat Anac. 29Qataq ye 'alhua Néguev netaña ye amaleciitapi, qaq aye qasoxonaxapi nache netalec ye hitiitapi, jebuseopi qataq ye amorreopi, qaq da pa'aỹa'ague aso auaxai qataq na loigue so tala Jordán, nache netaña ye cananeopi.
30Ime, nache so Caleb 'enapega se'eso nhuo' le'ecpi maye datato'ot so Moisés da de'enaxaatai', nache, 'eeta':
¡Qomi' qolaq qome, ñeqo'onaxa yi'iye 'alhua, nache saconaxa da sonaqalec, cha'aye qomi' ñapagaqalec da la'añaxac yemayepi!
31Qalaxaye soua lỹata'ape co'ollaxa soomaye, 'eetra':
¡Saishet, qomi' sa seshetaq da seloquiaxanaq yi'iye nhuo' le'ecpi! Cha'aye yemayepi 'añaxaicpi, napacalec da qara'añaxac.
32Nache soomaye qauem na ỹa'axatem so Israel le'ecpi da ỹa'axattac yi'iye 'alhua maye qaimeenaxana co'ollaxa, 'eeta':
Yi'iye 'alhua maye semeenaxanaxa, yemaye maiche ỹalauat 'enauac na netalecpi, qataq ye shiỹaxauapi maye semeenaqtac yemayepi ỹataqta lta'araicpi. 33Qataq seloqta'a nataqa'en yem logoraicpi maye chegoxoguet so Anac. Nache da ñaloqnaxaguet da qarataxac yemayepi, nache ỹataqta qomi' qapio'olqa, shenaqta'am ana shiiquioxoi, qaq 'era da 'eetec da qomi' ilota'alo yemayepi.
