So Israel le'ecpi dataỹa'aguet Ñim Nataxala'
1Nache 'enauac so Israel le'ecpi, ỹa'alaqtagui nache imauec se'eso pe da nỹeetac. 2Qataq 'enauac somayepi, qauem na la'aqtac da quetapeguelec so Moisés, qataq so Aarón, 'eeta': «¡'Onaxaictoxo' co'ollaxa da nache seleuaq co'ollaq souaqta'a ye Egipto, huo'otaq nagui da souaqaña ne'ena toolec 'alhua! 3¿Ta'ainco' Ñim Nataxala' da qomi' nauegalo ne'ena 'alhua da yaqto' qomi' qaira'alo ca ỹeelonec da qomi' qaỹalaua't, qataq da na qampa'aguenaxauapi ỹacona ana qaramoxouapi, qataq na qoyalaqpi? ¡Ỹoqo'oye 'onaxaictoxo' da she'eguelaxasoxogue da Egipto!» 4nache 'enauac somayepi detaqtega't, 'eeta': «¡Sanaxasheguem ca 'oonolec da shenaqta da yaqto' qarataxala', nache she'eguelaxasoxogue da Egipto!»
5Nache so Moisés qataq so Aarón ỹa'alyiñi naua l-llectel, nache iviraxatta'agueta naqa'en na lata'api na 'alhua, ỹauaachigui naqa'en so Israel le'ecpi, 6nache so Josué maye llalec so Nun, qataq so Caleb maye llalec so Jefone maye nqo'oora co'ollaxa da imete'n yi'iye 'alhua, soomaye icolaxata'aguelo soua alogo souaxat da nqui'ic, 7nache 'enapega 'enauac se'eso Israel le'ecpi, 'eeta': «¡Yi'iye 'alhua maye ñeqo'onaxa da semetenaq, yemaye ỹataqta 'onaxaic! 8Qaq Ñim Nataxala' da qomi' nqouagueeque, nache qomi' itaua'n da senoxonaxaua'a yi'iye 'alhua, qataq qomi' ỹaarema. Yi'iye 'alhua, ỹataqta sa qoue na huaca lche' qataq na te'esaq lli'i. 9Qaq ỹoqo'oye saishet qome da qauataiỹa'aguet Ñim Nataxala', qataq saishet da qayi'iitega yi'iye nhuo' le'ecpi maye lma' yemaye, cha'aye yemayepi sa qalaq da qoroxonec. Cha'aye yemayepi qaica ca npaxattalec, qomi' qalaxaye qomi' npaxattaleguete Ñim Nataxala'. ¡Ỹoqo'oye saishet da qayi'iitac!»
10Qalaxaye se'eso shiỹaxauapi huotaique da ira'alo na coma' soomaye da ỹasa'q. Nache Ñim Nataxala' ỹachaxan da llo'oxoyec huaña so npe'l maye naỹonqa', ỹauaachigui naqa'en 'enauac so Israel le'ecpi, 11nache Ñim Nataxala' 'enapega so Moisés, 'eeta':
«¿Che laguio' da ỹaxaañi da Aỹem inogoqchettac ne'ena shiỹaxauapi? Qataq ¿Chaq laguio' da ỹaxaañi da Aỹem sa ỹa'amaqten, qamaq qalota so sachaxana na'anecpi? 12Aỹem ñamaxa qome namayepi ca nalolaxa maye dalaataxanapec da ñelaaxaañi, qalaxaye 'am qalota qome ñaqa'en ca 'am chegoxoguetpi, qataq napacalec qome da la'añaxac namayepi.»
13Qalaxaye so Moisés, 'enapega Ñim Nataxala', 'eeta':
«'Am, 'aurolec da lta'araic 'ara'añaxac co'ollaq 'anqateeguesop ye Egipto ne'ena nhuo' le'ecpi. Nache ye Egipto le'ecpi qom ỹaỹaten de'era huotaique 'auo'otec namayepi, 14nache yemayepi da'aqtaxanem qome na lma' ne'ena 'alhua, maye hua'aqteguelec naxa da 'Am Nataxala', qoueta'aguet ne'ena nhuo' le'ecpi, qataq da 'anachaxana qalaq ỹataqta 'auatata'aguet, qataq so lo'oc maye 'aralamaxat ipelteetalec 'anqa'en namayepi, qataq ye na'a'q hua'auta'ague da taỹa'ague, qaq ye pe qalaq 'ettaigui 'anqa'en somaye. 15Qaq da imauec da 'aualauat ne'ena nhuo' le'ecpi, nache na shiỹaxauapi maye hua'aqtega de'era 'ayo'oxoyec, 'eeta': 16‹Ñim Nataxala' saishet da inoxonaqcheteua'a ye 'alhua maye ỹachaxanapeguem co'ollaxa da ỹanem ne'ena nhuo' le'ecpi, ỹoqo'oye Ñimaye ileualec naqa'en namayepi ye toolec 'alhua.› 17Qaq ỹoqo'oye 'Am Nataxala', nagui 'auachaxan qome da lta'araic 'ara'añaxac, qataq 'aupactelec da 'ara'aqtac maye 'aỹa'an co'ollaq qonapec, 18da saishet da sa qaỹaloxonguit da 'aralemataic, qataq ỹataqta lta'araic da 'arsoxoyec, qataq 'auapalaxat ca lasouaxashet ca huo'o ca ỹasouaxat. Qalaxaye saishet da sa 'auauo'o ca nhuaxanaguec ca huo'o ca ỹasouaxat qataq ca saỹalaq, cha'aye 'Am 'auauo'o ca nhuaxanaguec ca nta'a maye ỹo'ottac na qauem, nataqa'en ca llalaqpi, laualpi qataq ca llalaqpi ca laualpi. 19Qaq souaxat de'era lta'araic 'arsoxoyec, nache 'auapalaxat nagui na qauem maye ỹo'otpi ne'ena nhuo' le'ecpi, cha'aye chegoqchiguiña co'ollaxa ye Egipto da ỹataqta 'anhualaxaueetague' choche 'anviraxatta'a ne'ena.»
Ñim Nataxala' ỹauo'o da nhuaxanaguec so Israel le'ecpi
20Nache Ñim Nataxala', 'eeta':
Aja', Aỹem 'am salaxaguet da sechoxoren namayepi. 21Qalaxaye, ye ỹataqta 'eesa da ñeca'altauec, qataq da ỹo'oxoyec imattalec ana 'alhua, 22nache qaica ca 'oonolec nam ỹauaachigui da ỹo'oxoyec, qataq na na'anecpi maye so'ot co'ollaq huaña ye Egipto, qataq so huaña ye toolec 'alhua, qataq nam qalota da Aỹem ỹe'eguen, qataq na saishet da aỹem ỹalaxaguet, 23namayepi saishet qome da imeten ye 'alhua maye sachaxanapeguem co'ollaxa da sanem so hua'au lta'alpi. Nache na aỹem ỹo'otan qaica qome ca 'oonolec namayepi da imeten yemaye. 24Qalaxaye so ỹamaxashec Caleb, maye huaỹoqtec da lataxac, qataq ỹataqta Aỹem ỹalaxaguet. Nachesota qome da sasheeteua'a da inoxoneua'a yi'iye 'alhua maye taỹa co'ollaxa da imeten, qataq ca chegoxoguetpi, nache nalec qome yemaye. 25Qalaxaye souaxat na amaleciitapi qataq na cananeopi maye netalec na ca'amapega't 'alhua, nache qami' qavi'iguelaqai qonte', qalaxaye qoquiitelec qome ye toolec 'alhua maye taỹauga aso auaxai Togaxarai.
26Nache Ñim Nataxala' 'enapega so Moisés qataq so Aarón, 'eeta':
27«¿Chaq laguio' da ime da lleueeta'agueta naua qauema ltaxaỹaxaco ne'ena qauem shiỹaxauapi? Cha'aye Aỹem mashe ña'axaỹaxaategalo naua ỹataqta qauema ltaxaỹaxaco da Aỹem quetapeguelec ne'ena Israel le'ecpi. 28Ỹoqo'oye 'aua'aqtaxanem qome namayepi da ỹa'aqtac, 'eeta': ‹Aỹem Nataxala', maiche ñañan da san da ỹa'aqtac, da qami' taleguete ñaqa'en 'enauac na qauemsat souaxat naua qara'aqtaqalle'. 29Nache 'enauac ne'ena Aỹem quetapeguelecpi ỹepi, maye napacalec naua veinte vi'iye da nachaalataxac nam mashe qoỹettauopi ileu qome, nache da lo'ocỹaxac laguelec ñaqa'en ye toolec 'alhua. 30Qaq nachesota so Caleb, som llalec so Yefune, qataq so Josué, maye llalec so Nun, da inoxooreua'a qome yi'iye 'alhua. Qaq qaica ca 'oonolec da qoñiita da inoxoneua'a yi'iye 'alhua maye sachaxanapec co'ollaxa da qami' sanaleguete. 31Qaq na qaỹa'alquipi, maye qoñiitega loxonec na qanpa'aguenaxauaipi, namayepi sauegueua'a qome ye 'alhua maye qauo'otañi, nache nalec ñaqa'en. 32Qaq qami' qalaq da qaro'ocỹaxaqui laguelec qome yi'iye toolec 'alhua, 33qataq ne'ena qaỹa'alquipi nache netalec qome yemaye da ilotague' ana qagueta caua cuarenta vi'iye. Nache namayepi ỹataqta isheeteta da qarasouaxashichi, souaxat da sa qaualaqai, ivitta'a da qami' nmichiyiñi da qoviỹalec ye toolec 'alhua. 34Cha'aye ivi' cuarenta na'axa'te da qaumiiñitac yi'iye 'alhua, nache nataqa'en cuarenta vi'iye ñaqa'en da qausheechiñiitac de'era qarasouaxashichi, nache ye 'oonolec na'a'q, naigui ñaqa'en ye 'oonolec vi'i. Huaña nache namayepi ỹaỹateeta da lataxac ca aỹem ipa'agueetac. 35Qaq Aỹem Nataxala', 'era da ỹa'aqtac: 'Era da sheetec qome ne'ena nhuo' le'ecpi, qauemaicpi maye huaxaỹa'pi da Aỹem npa'aguene'. Huaña ne'ena toolec 'alhua da imeuo ñaqa'en namayepi.›»
36Qaq se'esoua diez ỹale't maye nataqa'en ỹama'q co'ollaxa so Moisés da imete'n yi'iye 'alhua, co'ollaq ñe'eguela'q nache qauem da la'aqtaxanaxa'c, nache ỹo'ot da na shiỹaxauapi quetapeguelec Ñim Nataxala', nache Ñimaye nque'elaxatta naqa'en da l-leuaxa se'esoua ỹale't. 37Ỹoqo'oye se'esoua ỹale't maye qauem da la'aqtaxanaxac da ỹa'axattac ye 'alhua, nmichiyiñi da ilem so napiina, ỹauaachigui Ñim Nataxala'. 38Qaq 'enauaque se'eso ỹale't maye demeenaxara co'ollaxa yi'iye 'alhua, da nachaqsouate' soua Josué, som llalec so Nun, qataq so Caleb maye llalec so Yefune da saishet da ileu'.
39Qaq so Moisés co'ollaq da'aqtaxanem so Israel le'ecpi da la'aqtac Ñim Nataxala', nache 'enauac somayepi daquico souaxat de'era lasouaxac.
Da nanoxonaguec na Israel le'ecpi
40Nache so nte'etom so lỹa na'a'q, nache no'ottasheguem somayepi da tasheguema na pa'asheguem añi qasoxonaxa, nache 'eeta':
¡Nagui mashe souaqta'a ne'ena! Qaq no'on da ñeqo'onaxa ye 'alhua maye qomi' ỹachaxanapeguema co'ollaxa Ñim Nataxala', cha'aye 'eesa da huo'o da qarasouaxashet. 41Qalaxaye so Moisés 'enapego' somayepi, 'eeta': ¿Ta'ainco' da sa qaualaqaiguet da lamaxasoxonaxac Ñim Nataxala'? ¡De'era qoñiitapeguec damaye saishet qome da ipacchigui! 42Ỹoqo'oye saishet qome da qoqui, cha'aye Ñim Nataxala' saishet da qami' hueta'agueta. Nache ca qanpa'aguenaxauaipi qami' loxonqa qome. 43Cha'aye de'era qa'aita'ague, hueta'ague ye amaleciitapi qataq ye cananeopi, qami' nauaata'agueta da yaqto' qami' iloquiaxa'n, qataq qami' ỹalaua't. Cha'aye mashe qoquiỹa'ai Ñim Nataxala', nache Ñimaye saishet da qami' hueta'agueta. 44Qalaxaye somayepi nache 'ena'am jec, da tasheguema so ỹataqta pa'asheguem aso qasoxonaxapi, qalaxaye aso arca maye laỹe' soua naỹamaxataxaco Ñim Nataxala', saishet da qairaxanapigui', qataq so Moisés qaica ca ldaxac, nache hueta'a se'eso nanataqa'. 45Nache huenotec co'ollaxa so amaleciitapi qataq so cananeopi maye netasheguema aso qasoxonaxa, nache le'enec qataq huo'o so ique'emaqchetpi qataq icaatac so Israel le'ecpi, iviraxatta'a ye Jormá.
