Noxonec ye 'alhua Jormá
1Qaq so nta'a Canaán le'ec maye ilotague' na netaña ye Arad, somaye netaña ye Néguev, qaq co'ollaq la'axaỹaxac da so Israel le'ecpi nateuga ye Atarín, nache ca'ata'aguet da iloquiaxan somayepi, nache huo'oi soua loxonqa. 2Qaq huaña, nache so Israel le'ecpi ỹanot da la'aqtac Ñim Nataxala', 'eeta': «Da qomi' 'autaua'n da qoroxonec ne'ena qampa'aguenaxauapi, nache ñemataqchiguiñi qome da selaxataxagui 'enauac na lalamaxat huaqta'a't nỹecpi maye ỹotta'a't naua nañalo.» 3Nache Ñim Nataxala' hua'axaỹa co'ollaxa de'era lỹaxanaxac so Israel le'ecpi, nache itauan da loxonec naqa'en so Canaán le'ecpi, nache so Israel le'ecpi ỹataqta nmatchiguiñi co'ollaxa somayepi, qataq ilaxachigui 'enauac so lalamaxat huaqta'a't nỹecpi maye ỹotta'a't naua nañalo. Ỹoqo'oye nachera da huo'omshe qoỹanagui da le'enaxat Jormá yi'iye 'alhua.
4Nache so Israel le'ecpi ca'ai añi qasoxonaxa ye Hor, nache quetegue so nqa'aic maye taỹa'a aso Auaxai Togaxarai, nache queto'ot na loigue ye 'alhua Edom. Qalaxaye co'ollaq ñaq qanayectalec so nqa'aic, nache so shiỹaxauapi huo'o da lqalviaxa, 5nache ỹoltaq quetot da quetapeguelec Ñim Atamnaxala' qataq so Moisés, nache 'eeta':
¿Ta'ainco' ye qomi' qanqacheueguesopa co'ollaxa ye Egipto da yaqto' seleuaqaña qanqa'eñi ne'ena toolec 'alhua? Teno' nagui, mashe qaica ca qonoq qataq ca qaraquip. ¡Qataq mashe saỹemaxac ne'ena nallec maye qaica ca lyac! 6Nache Ñim Nataxala' namaxa somayepi so na'araxanaqpi maye qanlem na lshenataxanaxa da yaqto' inac, ỹoqo'oye qalota co'ollaxa so ileu se'eso Israel le'ecpi. 7Nache somayepi nqo'oneua'a co'ollaxa so Moisés nache, 'eeta':
¡Qomi' huo'o da qarasouaxashet souaxat da qolaqtapeguelec Ñim Nataxala', qataq 'am! ¡Qaq no'on da 'anachoxonnot qome Ñim Nataxala' da yaqto' qomi' ca'aisalo naqa'en na na'araxanaqpi! Nache so Moisés nachoxonnot co'ollaxa Ñim Nataxala'. 8Nache Ñim Nataxala', 'eeta':
'Auo'ot qome ca 'are'enaqtac na'araxanaq, nache 'auo'ot aca lashe da 'aỹa'anasheguem. Yaqto' da huo'o ca qainac namayepi, nache da ỹamato'ot que'eca ne'enaqtac na'araxanaq, nache ishet da nca'alec.
9Nache so Moisés ỹo'ot so le'enaqtac na'araxanaq ỹachegoxotaigui so lcat bronce, nache ỹanasheguem ỹanagui aso lashe. Nache naxa da huo'o na inac na na'araxanaq, nache da ỹamato'ot se'eso ne'enaqtac lcat bronce nache nca'alec.
So Israel le'ecpi qaltaq jec
10Qaq so Israel le'ecpi qaltaq jec co'ollaxa, nache hua'a ye Obot. 11Qaq nache chegoqchiguiña co'ollaxa yemaye da qaltaq jec, nache naña ye Iyé Abarín, yem toolec 'alhua maye pa'aigue da nala' lliguisheguem ye 'alhua Moab. 12Qaq nache chegoqchiguiña yemaye co'ollaxa da qaltaq jec, nache naña ye ca'amapega't 'alhua ye Zered. 13Ime qaltaq chegoqchiguiña yemaye da jec, nache naña ye pa'aitague da le'ego so tala Arnón, maye huaña ye toolec 'alhua. Qaq yemaye nache chegoqchiguiña na na'alhua so amorreopi, qataq nache la'anaxat naua loga'te na na'alhua so Moab le'ecpi, qataq so amorreopi. 14Qaq ỹoqo'oye aso nere maye ỹa'axat da nalaataxac Ñim Nataxala', 'eeta':
«Sa'asoxonaxalec aso Auaxai Togaxarai,
qataq so la'auaxacpi ye 'alhua ye Arnón,
15qataq na loigue so la'auaxacpi maye quetelec ye 'alhua Ar,
ivitta'a ye loga't ye 'alhua Moab.»
16Qataq chegoqchiguiña co'ollaxa yemaye da taỹa ye Ber. Qaq nache naña yemaye aso nshere, maye huaña co'ollaxa da Ñim Nataxala' 'enapega so Moisés, 'eeta': «'Alaỹona't qome na shiỹaxauapi yaqto' sanem ca 'etaxat.» 17Qaq nache huaña co'ollaxa yemaye da do'onaxan so Israel le'ecpi, 'eeta':
«¡'Am nshere, ña npaxaasheguem 'anqa'en ca 'etaxat!
¡Qaq qomi', 'am so'onaxanaqtalec qome!
18¡So nataxala'pi ỹauota'a aso lasheltepi co'ollaq nshettac
qaq so nta'alpi qalaq ỹauota'a so npon co'ollaq ỹauangui añimaye!»
Nache somayepi chegoqchiguiña co'ollaxa ye toolec 'alhua, da taỹa ye Mataná, 19qataq nache chegoqchiguiña yemaye da taỹa ye Najaliel, ime qataq chegoqchiguiña ye Najaliel da taỹa ye Bamot, 20qataq chegoqchiguiña yemaye da taỹa ye ca'amapega't 'alhua ye Moab, nache ivittasheguema ye ỹoqta pa'asheguem añi qasoxonaxa Pisga, yem huaña da yo'oqotta ye toolec 'alhua.
So Israel le'ecpi loxonec so nta'a Sijón
21So Israel le'ecpi huo'oi soua lamaxa'she da ỹamaxa so la'aqtac so Sijón maye lta'a so amorreopi, 'eeta': 22«Sauoqtaique da saxasoxonaxalec na 'ana'alhua. Qalaxaye saishet qome da sa'axasoxonaxalec na lma' na nañiguishecpi, huo'otaq na lma' ana uvapi, qataq da ñiỹomaxagui na 'etaxat maye le'ec ana nsherepi. Nacherata da qolaqtegue so nqa'aic, nache ivitta'a da ime da sa'axasoxonaxalec na 'ana'alhua.»
23Qalaxaye so Sijón sa ỹashenem so Israel le'ecpi da ỹa'axasoxoolec so na'alhua, nacherata da laỹona't so nalleppi, nache tauga so toolec 'alhua da nauana'aguet somayepi, qaq co'ollaq ivita ye Yahás nache iloquiaxan. 24Qalaxaye so Israel le'ecpi loxonec somayepi, nache deuotaxanec 'enauac ye na'alhua, chegoqchiguiña so tala Arnón ivitta'a so lỹa tala le'enaxat Yaboc, qataq ivitta'a so loga't ye na'alhua so amoniitapi, maye huo'o so lpaqtaxat. 25Huaña, nache so Israel le'ecpi ỹacona nache naigui 'enauac so huaqta'a't nỹecpi maye ỹotta'a't naua nañalo maye lalamaxat se'eso amorreopi, maye naña ye Jesbón, qataq so laỹepi nỹecpiolec maye naugalo naua loiguiye yemaye. 26Qaq yi'iye nỹecpi ye Jesbón, nacheye ye netaña co'ollaxa so Sijón som lta'a so amorreopi. Somaye nacheso so deloctague' co'ollaxa so hua'auñi nta'a ye Moab, nache deuotaxanec ye na'alhua somaye, ivitta'a so tala Arnón. 27Qaq ỹoqo'oye nam do'onaxaataueegue naxa na la'aqtacpi, 'eeta':
«¡Ña qauanaiua'a na Jesbón,
nam lma' so Sijón!
¡Nache qaltaq qano'oxoñiisheguem na nỹecpi!
28Cha'aye ye Jesbón
nache chegoqchiguiña so norec,
qataq ye nỹecpi ye Sijón,
nache chegoqchiguiña so le'eraxa
da nlaxaañi so nỹecpi ye Ar,
yem 'alhua Moab,
qataq so nataxala'pi ye qaỹoqotcheguemec 'alhua ye Arnón.
29¡Choxoraicolec 'am, Moab!
¡'Am, maye 'am lalamaxat so atamnaxala' Quemós,
ỹataqta 'am dolachigui!
So 'anatamnaxala' ỹo'ot da 'eettac naqa'en na 'aỹa'alaqpi,
qataq loxona naqa'en ana 'aỹa'alepi so Sijón, maye lta'a na amorreopi.
30Qomi', ỹataqta ñemataqchiguiñi da selaxataxagui,
chegoqchiguiña ye Dibón nache ivitta'a ye Nofa,
da ỹataqta nlachiguiñi ñaqa'enaq qataq ivitta'a ye Medeba.»
31Qaq 'era da 'eetec co'ollaxa so Israel le'ecpi, da nalec ye na'alhua so amorreopi.
So Israel le'ecpi loxonec so nta'a Og
32Qaq so Moisés nataqa'en ỹauo'oi co'ollaxa soua lamaxa'she da demeenaxara so huaqta'a't nỹecpi ye Jezer, nache so Israel le'ecpi ỹo'orauec co'ollaxa so amorreopi, nache ỹacona so huaqta'a't nỹecpi maye netaigui co'ollaxa somayepi. 33Qaq co'ollaq ỹe'eguelaq somayepi, nache quetegue so nqa'aic maye taỹa'a ye Basán, nache so Og maye lta'a so netaña yemaye, lỹatec so nalleppi da huaqata'aguet somayepi, da yaqto' delogui' da huaña ye Edrey. 34Qalaxaye Ñim Nataxala' 'enapega co'ollaxa so Moisés, 'eeta': «Saishet qome da 'aye'etega namayepi, cha'aye 'am sanem da 'oxonec na nta'a Og, qataq 'enauac na nalleppi, qataq na na'alhua. Qaq namaye, 'eeta'am 'anqa'en da qonetec co'ollaxa so Sijón maye lta'a na amorreopi som netaña ye Jesbón.»
35Qaq 'era da 'eetec co'ollaxa so Israel le'ecpi da ỹalauat so Og, qataq so llalaqpi, qataq 'enauac so nalleppi. Nache ỹataqta qaica ca no'onaxatañi da nca'altauec naqa'en, nache ỹacona so na'alhua somayepi.
