Soua llale so Selofejad
1Qaq so nhuo' le'ecpi maye chegoxoguet so Manasés, huo'oi soua cinco nqaỹa't, le'enaxa't Malá, Nogá, Joglá, Milca qataq aso Tirsa. Qaq soomaye nache llalel so Selofejad, som llalec so Jéfer, maye chegoxogueta soua Galaat, Maquir, Manasés qataq so José. 2Qaq se'esoua cinco nqaỹa't, tareua'a co'ollaxa so ñegueuo so npe'l maye naỹonqa' da detaxaỹapegueto so Moisés qataq so ntaxaỹaxanaxanec Eleazar, qataq so lataxala'pi so lapoota'a't nhuo' le'ecpi, nache soomaye 'eeta': 3«So qarta'a ileuaña ye toolec 'alhua, qalaxaye somaye saishet da ỹalectaigui som laỹepi so Coré maye dataỹa'aguet co'ollaxa Ñim Nataxala'. Somaye ileu qalaxaye souaxat na maiche lasouaxashetpi, qaq somaye qaica ca llalec ỹale. 4Qaq sa ỹaỹamaxañi da qaỹapalaxat da le'enaxat somaye souaxat da qaica ca llalec ỹale. Qaq 'onaxaictaxa da qauauoi ca qaralamaxat qana'alhua yaqto' nache salegaqtaigui na lqaỹañecpi so qarta'a.» 5Nache so Moisés iroua'a Ñim Nataxala', de'era lquiquiaxa'c soomaye, 6nache Ñim Nataxala' 'enapeco': 7«Ỹaỹamaqchiguiñi da 'eetrapeguec soua llalel so Selofejad. Ỹoqo'oye 'aỹa'anema qome ca na'alhua da yaqto' nache ỹalectraigui na lqaỹañecpi so lta'a, nache soomaye taleguete so lalamaxat na'alhua so lta'a. 8Qaq qonapega qome 'enauac na Israel le'ecpi, da huo'o ca ileu da qaica ca llalec ỹale, nache ca lalamaxat na'alhua camaye, nache talec qanqa'en aca llale 'alo. 9Qaq da huo'otaq qaca aca llale 'alo, nache ca lalamaxat na'alhua talec qanqa'en ca lqaỹañecpi camaye. 10Qaq da huo'otaq qaica ca lqaỹañecpi, nache ca lalamaxatpi camaye, talec qanqa'en ca lqaỹañecpi ca lta'a. 11Qaq da ỹataqta qaica ca lqaỹañecpi ca lta'a, nache ca lalamaxatpi camaye, talec qanqa'en ca lalamaxat lauo' le'ec. Qaq 'era da lataxac maye nache 'eetai' qome da ỹo'ottac na Israel le'ecpi, dam 'am samaxalec nagui.»
So Josué talec da lo'onataxanaxac so Moisés
12Ñim Nataxala' 'enapega so Moisés, 'eeta':
'Aunotsheguemec añi qasoxonaxa Abarín, nache 'auallelec ye 'alhua maye sanem qome na Israel le'ecpi. 13Qaq qom ime da 'auallelec yemaye, nache 'am 'aleu, nache 'anauane' qome so hua'au 'arta'alpi, 'eeta'am co'ollaxa da 'eetec so 'arqaỹa Aarón, 14cha'aye qami', Aỹem sa qaualaqaiguet co'ollaq huaña ye toolec 'alhua ye Zin, yem huaña co'ollaxa da Aỹem quetapeguelec ne'ena nhuo' le'ecpi, nache saishet da ỹauaachigui qanqa'eñi da Aỹem qavio'oxoreñi co'ollaq chegaqaigui ñaqa'en so 'etaxat aso coma' ye Meriba. Qaq se'eso 'etaxat, nacheso so huaña ye Cades ye toolec 'alhua ye Zin.
15Nache so Moisés 'enapega Ñim Nataxala', 'eeta':
16'Am Nataxala', maye 'Am Natamnaxala' 'enauac na shiỹaxauapi, ñaq 'auauo'o qome ca lataxala' ne'ena nhuo' le'ecpi, 17yaqto' camaye, nacheca ca lataxala' qome namayepi da nqatec qataq da ñe'eguelaxateuo. Yaqto' ne'ena nhuo' le'ecpi maye lalamaxatpi Ñim Nataxala', saishet da 'eeta'am aca qaguetapi maye qaica ca ilo'ogue.
18Nache Ñim Nataxala' 'enapega so Moisés, 'eeta':
So Josué maye llalec so Nun, somaye netaigui da na'añaxac. Qaq 'aỹaxana qome somaye, nache 'auashel-lec na lqaic. 19Ime, nache 'auauegueua'a qome so ntaxaỹaxanaxanec Eleazar, qataq ỹauaachigui 'anqa'en 'enauac ca ỹalecta'a'tpi da 'aỹa'anem da lo'onataxanaxac, 20qataq 'aỹa'anem ca laỹolec de'era 'am hueto'ot maye huo'o naq 'enec, yaqto' 'enauac na nhuo' le'ecpi da ỹalaxaguet qome somaye. 21Qalaxaye so Josué taua'a qome so ntaxaỹaxanaxanec Eleazar da yaqto' somaye ichemaxata Aỹem chegoqchigui so Urim. Yaqto' ca la'aqtac so Josué da ỹamaq na Israel le'ecpi da jec, qataq da ñe'eguelaxauo, nacheca ca ỹalaxaguet qome namayepi da ỹo'ot.
22Nache so Moisés ipacchigui da ỹo'ot 'enauac da lamaxasoxonaxac Ñim Nataxala'. Nache iỹaxana so Josué da ỹauegueua'a so ntaxaỹaxanaxanec Eleazar, ỹauaachigui naqa'en so ỹalecta'a't nhuo' le'ecpi. 23Nache ỹashel-lec na lqaic qataq ỹanagui da lo'onataxanaxac, nache ipacchigui naqa'en da lamaxasoxonaxac Ñim Nataxala'.
