Naponaxac maye laloxoqui ana nasheerepi
1Qaq ca la'auaxanec na'a'q ca ca'agoxoic siete, nache huetoigui qome da qauo'oche ca ỹo'oxoraq qaraponaxaqui. Qaq que'eca na'a'q qaica qome ca do'onataxan da qoñiita, cha'aye que'eca na'a'q laloxoqui da qaỹashiiyigui aca nasheerepi. 2Qaq ca nachetaqtaxanaxat qaỹavigaxatta cam ama da laitaỹaxac maye ỹamaateguet Ñim Nataxala', qalaq qoỹaneuo ca 'oonolec huaca llalec, 'oonolec qagueta lhuaraic, qataq caua siete qagueta llalqa maye ivi' ye 'oonolec vi'i, qataq qaica ca lque'emaxa. 3Qaq que'eca nachetaqtaxanaxat lỹateuo qanqa'en da qoỹaneuo ca 'ayiiña maye qairaqneguet ca aceite, qaq ñi 'oonolec huaca llalec huaxaiguet qanqa'en ca seis kilos ca 'ayiiña, qaq ca 'oonolec qagueta lhuaraic, qalaq huaxaiguet qanqa'en ca cuatro kilos ca 'ayiiña. 4Qataq ñi 'oonolec caua qagueta llalqa, qalaq huaxaiguet ca dos kilos ca 'ayiiña. 5Nataqa'en qaỹa'añiiuo qome ca qarachetaqtaxanaxache quetaq da yaqto' sapalaxat ca qarasouaxashichi. 6Nache ca nachetaqtaxanaxat maye nache 'eetai' naxa da qoỹaatapegueuo da dalaxaic so ca'agoxoic, qataq ca qoỹaategueuo naxa 'enauaque naua na'axa'te, qataq ca lỹateuo nachetaqtaxanaxat 'ayiiña, qataq ca lataxa, maye qaỹamaxasoxoolec da qoỹaneuo. 'Enauac camaye nachetaqtaxanaxat qaỹavigaxatta yaqto' da ama laitaỹaxac ỹamaateguet Ñim Nataxala'.
7Qaq ca na'a'q diez que'eca ca'agoxoic siete, nataqa'en qauo'oche qome ca ỹo'oxoraq qaraponaxaqui. Qaq que'eca na'a'q qanqouaqchichi qome, qataq qaica ca qauo'oche no'onatac. 8Nache qaỹa'añiiuo qome ca 'oonolec huaca llalec, 'oonolec qagueta lhuaraic, qataq caua siete qagueta llalqa maye ivi' ye 'oonolec vi'i, qataq qaica ca lque'emaxa da nachetaqtaxanaxat qaỹavigaxatta yaqto' da ama laitaỹaxac ỹamaateguet Ñim Nataxala'. 9Qaq que'eca nachetaqtaxanaxat lỹateuo qanqa'en ca 'ayiiña maye qairaqneguet ca aceite, nache ñi 'oonolec huaca llalec huaxaiguet qanqa'en ca seis kilos ca 'ayiiña, qaq ca 'oonolec qagueta lhuaraic qalaq huaxaiguet qanqa'en ca cuatro kilos ca 'ayiiña maye qoỹaneuo. 10Qaq ñi 'oonolec caua siete qagueta llalqa, nache huaxaiguet ca dos kilos ca 'ayiiña. 11Nataqa'en qaỹa'añiiuo ca quetaq qaỹavigaxatta da yaqto' qaỹapalaxat ca qarasouaxashechi. Nataqa'en aca laỹe nachetaqtaxanaqtepi maye qoỹaatapegueuo naxa huetoigui ye na'a'q maye laloxoqui da qaỹapalaxat ca nasouaxashet. Qataq ca nachetaqtaxanaxat qaỹavigaxatta maye, nache 'eetai' naxa da qoỹaategueuo naua na'axa'te huaxaiguet qanqa'en ca 'ayiiña qataq ca lataxa.
12Qaq ca na'a'q quince que'eca ca'agoxoic siete, nache qami' qauo'oche qome ca ỹo'oxoraq qaraponaxaqui. Qaq que'eca na'a'q qaica qome ca qauo'oche na no'onatacpi. Nache siete na'axa'te da qauo'ocheetac que'eca ỹo'oxoraq naponaxac da qavio'oxoreñi Ñim Nataxala'. 13Qaq ca la'auaxanec na'a'q nache qaỹa'añiiuo qome da qaỹavigaxa't caua trece huaca llalqa, dos ca qagueta lhuaraiqa, qataq catorce caua qagueta llalqa maye ivi' ye 'oonolec vi'i, qataq qaica ca lque'emaxa, nache nachetaqtaxanaxat qaỹavigaxatta yaqto' da ama laitaỹaxac ỹamaateguet Ñim Nataxala'. 14Qaq que'ecaua trece nachetaqtaxanaqa'ate huaca llalqa, ñi 'oonolec huaxaiguet qanqa'en ca seis kilos ca 'ayiiña maye qairaqneguet ca aceite, qaq ñi 'oonolec qagueta lhuaraic huaxaiguet qanqa'en ca cuatro kilos ca 'ayiiña. 15Qaq ñi 'oonolec caua catorce qagueta llalqa, huaxaiguet qanqa'en ca dos kilos ca 'ayiiña. 16Nataqa'en qaỹa'añiiuo ca quetaq, qaỹavigaxatta da yaqto' qaỹapalaxat ca qarasouaxashichi, nataqa'en ca nachetaqtaxanaxat qaỹavigaxatta, maye nache 'eetai' naxa da qoỹaatapegueuo naua na'axa'te, huaxaiguet qanqa'en ca 'ayiiña qataq ca lataxa. 17Qaq ca lỹa na'a'q dos, nache qaỹa'añiireuo caua doce huaca llalqa, qataq dos ca qagueta lhuaraiqa, qataq caua catorce qagueta llalqa maye ivi' ye 'oonolec vi'i, qataq qaica ca lque'emaxa. 18Nataqa'en qaỹa'añiiuo aca qarachetaqtaxanaqche 'ayiiña qataq ca lataxa maye huaxaiguet naxa ñi 'oonolec huaca llalec, qataq qagueta lhuaraic, qataq ca qagueta llalec, nache qaupaquiichigui da lamaxasoxonaxac Ñim Nataxala'. 19Qataq qaỹa'añiiuo nataqa'en ca quetaq qaỹavigaxatta da yaqto' qaỹapalaxat ca qarasouaxashechi, qataq ca nachetaqtaxanaxat qaỹavigaxatta maye nache 'eetai' naxa da qoỹaatapegueuo naua na'axa'te, maye huaqtalec ca 'ayiiña qataq ca lataxa.
20Qaq ca lỹa na'a'q tres, nache qaỹa'añiireuo caua once huaca llalqa, dos caua qagueta lhuaraiqa, qataq catorce caua qagueta llalqa maye ivi' ye 'oonolec vi'i qataq qaica ca lque'emaxa. 21Qaq nataqa'en qaỹa'añiiuo ca nachetaqtaxanaxat 'ayiiña qataq ca lataxa, huaxaiguet qanqa'eñi ñi 'oonolec ca huaca llalec, qataq ca qagueta lhuaraic, qataq caua qagueta llalqa, nache qaupaquiichigui da lamaxasoxonaxac Ñim Nataxala'. 22Nataqa'en qaỹa'añiiuo ca quetaq qaỹavigaxatta da yaqto' qaỹapalaxat ca qarasouaxashechi, qataq ca nachetaqtaxanaxat qaỹavigaxatta maye nache 'eetai' naxa da qoỹaatapegueuo naua na'axa'te, qataq ca 'ayiiña qataq ca lataxa. 23Qaq ca na'a'q cuatro, nache qaỹa'añiireuo caua diez huaca llalqa, dos caua qagueta lhuaraiqa, qataq catorce caua qagueta llalqa maye ivi' ye 'oonolec vi'i, qataq qaica ca lque'emaxa. 24Qataq qaỹa'añiiuo ca nachetaqtaxanaxat 'ayiiña qataq ca lataxa naloteguet qanqa'eñi ye lcata ñi 'oonolec caua qoỹaareuo huaca llalqa, qataq ca qagueta lhuaraic, qataq caua qagueta llalqa, nache qaupaquiichigui da lamaxasoxonaxac Ñim Nataxala'. 25Qataq qaỹa'añiiuo ca quetaq qaỹavigaxatta da yaqto' qaỹapalaxat ca qarasouaxashichi, nataqa'en ca nachetaqtaxanaxat qaỹavigaxatta maye nache 'eetai' naxa da qoỹaatapegueuo naua na'axa'te, qataq ca 'ayiiña qataq ca lataxa.
26Qaq ca na'a'q cinco nache qaỹa'añiireuo caua nueve huaca llalqa, dos caua qagueta lhuaraiqa, qataq catorce caua qagueta llalqa maye ivi' ye 'oonolec vi'i, qataq qaica ca lque'emaxa. 27Qaq que'eca nachetaqtaxanaxat maye huaxaiguet ca 'ayiiña qataq lataxa, qalaq naloteguet qanqa'eñi ye lcata ñi 'oonolec ca qoỹaareuo huaca llalqa, qataq caua qagueta lhuaraiqa qataq caua qagueta llalqa, nache qaupaquiichigui da lamaxasoxonaxac Ñim Nataxala'. 28Qataq qaỹa'añiiuo ca quetaq qaỹavigaxatta da yaqto' qaỹapalaxat ca qarasouaxashichi, nataqa'en ca nachetaqtaxanaxat qaỹavigaxatta maye nache 'eetai' naxa da qoỹaatapegueuo naua na'axa'te, qataq ca 'ayiiña qataq ca lataxa.
29Qaq ca na'a'q seis nache qaỹa'añiireuo caua ocho huaca llalqa, qataq caua dos qagueta lhuaraiqa, qataq catorce caua qagueta llalqa maye ivi' ye 'oonolec vi'i, qataq qaica ca lque'emaxa. 30Qaq que'eca nachetaqtaxanaxat maye huaxaiguet ca 'ayiiña qataq ca lataxa, qalaq naloteguet qanqa'eñi ye lcata ñi 'oonolec caua huaca llalqa, qataq caua qagueta lhuaraiqa qataq caua qagueta llalqa, nache qaupaquiichigui da lamaxasoxonaxac Ñim Nataxala'. 31Nataqa'en qaỹa'añiiuo ca quetaq qaỹavigaxatta da yaqto' qaỹapalaxat ca qarasouaxashichi, qataq ca nachetaqtaxanaxat maye nache 'eetai' naxa da qoỹaatapegueuo naua na'axa'te, qataq ca 'ayiiña qataq ca lataxa.
32Qaq ca na'a'q siete nache qaỹa'añiireuo caua siete huaca llalqa, qataq caua dos qagueta lhuaraiqa, qataq caua catorce qagueta llalqa maye ivi' ye 'oonolec vi'i, qataq qaica ca lque'emaxa. 33Qaq que'eca nachetaqtaxanaxat maye huaxaiguet ca 'ayiiña qataq ca lataxa, qalaq naloteguet qanqa'eñi ye lcata ñi 'oonolec caua huaca llalqa, qataq caua dos qagueta lhuaraiqa, qataq caua qagueta llalqa, nache qaupaquiichigui da lamaxasoxonaxac Ñim Nataxala'. 34Nataqa'en qaỹa'añiiuo ca quetaq qaỹavigaxatta da yaqto' qaỹapalaxat ca qarasouaxashechi, qataq ca nachetaqtaxanaxat qaỹavigaxatta maye nache 'eetai' naxa da qoỹaatapegueuo naua na'axa'te, qataq ca 'ayiiña qataq ca lataxa.
35Qaq ca na'a'q ocho, nache qauo'oche qome ca ỹo'oxoraq qaraponaxaqui, qaq que'eca na'a'q qaica qome ca qauo'oche na no'onatacpi. 36Qataq qaỹa'añiỹot Ñim Nataxala' ca qaỹavigaxatta maye ama da laitaỹaxac, 'oonolec huaca llalec, qataq 'oonolec qagueta lhuaraic, qataq caua siete qagueta llalqa maye ivi' ye 'oonolec vi'i, qataq qaica ca lque'emaxa. 37Qaq que'eca nachetaqtaxanaxat maye huaxaiguet ca 'ayiiña qataq ca lataxa qalaq naloteguet qanqa'eñi ye lcata ñi 'oonolec caua huaca llalqa, qataq caua dos qagueta lhuaraiqa, qataq caua qagueta llalqa, nache qaupaquiichigui da lamaxasoxonaxac Ñim Nataxala'. 38Nataqa'en qaỹa'añiiuo ca quetaq qaỹavigaxatta da yaqto' qaỹapalaxat ca qarasouaxashechi, qataq ca nachetaqtaxanaxat qaỹavigaxatta maye nache 'eetai' naxa da qoỹaatapegueuo naua na'axa'te, qataq ca 'ayiiña qataq ca lataxa.
39Qaq 'eca cam nachetaqtaxanaxatpi maye ishet da qaỹa'añiỹot Ñim Nataxala', da ivita ca laloxoqui ca ỹo'oxoraic qaraponaxaqui, qataq ca nachetaqtaxanaxat da qaipacchigui ca qoỹan na'aqtac, huo'otaq ca nachetaqtaxanaxat maye maiche qoỹaneuopi, huo'otaq ca qaỹavigaxatta maye huaqtalec ca 'ayiiña, qataq ca lataxa, huo'otaq ca nachetaqtaxanaxat maye qanhuaachigui.
40Nache so Moisés, da'aqtaxanem co'ollaxa so Israel le'ecpi 'enauac nam ỹamaxalecpi co'ollaxa Ñim Nataxala'.
