Da lo'onataxanaxac na leviitapi
1Qaq 'era da naneraguec soua chegoxogueta so Aarón qataq so Moisés, huetoigui so na'a'q co'ollaq Ñim Nataxala' detaxaỹapegue' so Moisés, huaña añi qasoxonaxa Sinaí. 2Qaq 'enaua na le'enaqa'ate soua llalqa so Aarón: Nadab, som ỹe llalec, qataq so Abiú, Eleazar qataq so Itamar. 3Qaq 'enauaque soomaye qaicoreleguete da qaiỹotaugalo da yaqto' ỹo'o't da lo'onataxanaxac da ntaxaỹaxanaxanecpi, 4qalaxaye so Nadab qataq so Abiú, ileu' co'ollaxa huaña so lanataqa' Ñim Nataxala', souaxat da deca'atoxoora so ỹaqa'a norec, maye saishet da qaỹamaxaleguete co'ollaxa, huaña ye toolec 'alhua ye Sinaí. Qaq soomaye qaica ca llale'c. Nache soua Eleazar qataq so Itamar ỹacooleguete da lo'onataxanaxa'c soomaye da ntaxaỹaxanaxanaqa, qalaxaye so lta'a Aarón, nache ilotegueto soomaye. 5Nache Ñim Nataxala', 'enapega co'ollaxa so Moisés, 'eeta': 6«'Auỹaxaneuga qome na maiche lalamaxat lauo' le'ecpi so Leví, nache qonapega namayepi da ỹalaxaguet qataq do'onataxanot so ntaxaỹaxanaxanec Aarón. 7Nache pa'aiguet da ỹo'ot da lo'onataxanaxacpi so Aarón, qataq da huapegue' nam nhuo' le'ecpi, qataq ñi npe'l maye huaña naxa da qanauane' Ñim Nataxala'. 8Qataq ilo'ogue qome 'enauac na logoxoshetpi ñi npe'l, qataq ilo'oguet na Israel le'ecpi, qataq huapegue' na no'onatacpi maye huaña ye lanataqa' Ñim Nataxala'. 9Qataq 'auỹotauga qome na leviitapi da yaqto' do'onataxanot so Aarón, qataq na chegoxoguet llalaqpi somaye, cha'aye namayepi nache qaỹachegoxottoigui co'ollaxa na Israel le'ecpi da yaqto' nalemaqte' da Aỹem do'onataxanot. 10Qaq so Aarón qataq na llalaqpi, nache 'anagui da lo'onataxanaxac na ntaxaỹaxanaxanec. Qaq da huo'o ca chegaqauec da ỹacoolec de'era no'onataxanaxac, da saishet da ntaxaỹaxanaxanec, nache camaye qaỹalauat.»
Ñim Nataxala' lca'aguishec da lalamaxat na leviitapi
11Qaq Ñim Nataxala' 'enapega so Moisés, 'eeta': 12«Ne'ena Israel le'ecpi, Aỹem lleca'ateua'a na leviitapi da yaqto' nmeneguet ñaqa'en na na'auaxanec ñalec. Nache namayepi ỹalamaxatpi, 13cha'aye 'enauac na na'auaxanec ñalec, nache ỹalamaxat. Cha'aye co'ollaq ileu ñaqa'en 'enauac so la'auaxanec llalec so Egipto le'ecpi. Nache Aỹem seỹotauga co'ollaxa da sauo'o ỹalamaxat na la'auaxanec llalec na Israel le'ecpi, qataq na la'auaxanec llalec na shiguiỹacpi maye na'atetpi namayepi. Qaq ỹoqo'oye namayepi nache ỹalamaxat. Qaq 'era da ỹa'aqtac, Aỹem Nataxala'.»
Le'enaxat lmalate na leviitapi
14Ñim Nataxala' qaltaq 'enapega so Moisés co'ollaq huaña ye toolec 'alhua ye Sinaí, 'eeta': 15«'Auo'ot qome aca le'enaxat lmalate na llalaqpi na leviitapi, qataq na maiche nalamaxat nhuo' le'ecpi, ỹataqtac so chegoxoguet lta'alpi, nache 'ereuo na le'enaxat na llalec ỹale maye mashe ivi' qataq napacalec ñi 'oonolec ca'agoxoic.» 16Nache so Moisés ỹo'ot 'enauac de'era lamaxasoxonaxac Ñim Nataxala'.
17Qaq 'enaua na le'enaqa'ate soua llalqa so Leví: Guersón, Quehat qataq Merari.
18Qataq 'enaua naua le'enaqa'ate soua llalqa so Guersón: Libni qataq Simea.
19Qaq soua llalqa so Coat: Amirán, Isar, Hebrón qataq Uziel.
20Qaq soua llalqa so Merari: Mahli qataq Musi. Nache 'ena 'enauac na maiche nalamaxat nhuo' le'ecpi, maye chegoxoguet so Leví. Ỹataqtac na maiche chegoxoguet lta'alpi.
21Nache so lalamaxat lauo' le'ecpi soua Libni qataq so Simea maye chegoxoguet so Guersón. 22Da qanaloqna't 'enauac so ỹalleppi maye ivi' qataq som napacalec ñi 'oonolec ca'agoxoic, nache ivi' siete mil quinientos ye lcata. 23Qaq somayepi co'ollaxa, nache netaña so pa'aigue da nala' lliguiñi maye qosheta'ague so npe'l. 24Qaq so Eliasaf, maye llalec so Lael, nacheso so lataxala' se'eso maiche lalamaxat lauo' le'ecpi so Guersón. 25Qaq somayepi nacheso so ilotague' qataq ntela'a so ỹataqta no'on lapoxot so pa'asheguem, qataq so lapoxonaxatpi so ñegueuo so npe'l maye lanataqa' Ñim Nataxala', 26qataq so coleesop lapoxonaxatpi maye lpaqtaxat, qataq so lapoxonaxat so ñegueuo so qasoxoc maye netaña aso nca'atoxonaxalate, qataq so lquetpi so npe'l maye huaña naxa da qanauane' Ñim Nataxala'. 27Qaq soua maiche nalamaqa'ate nhuo' lashe' maye chegoxogueta so Coat: Amirán, Isar, Hebrón qataq Uziel. 28Qaq ye lcata 'enauac so nereguishec ỹalleppi, maye mashe ivi' qataq napacalec ñi 'oonolec ca'agoxoic, ivi' ocho mil trescientos ye lcata. Qaq se'eso nalamaxat nhuo' le'ecpi, nacheso so ilotague' so npe'l, 29qaq so nhuo' le'ecpi maye chegoxoguet so Coat, netaña co'ollaxa so pa'aigue da taguiñi so npe'l. 30Qaq so Elisafán, som llalec so Usiel, nacheso so lataxala' se'eso maiche nalamaxat nhuo' le'ecpi. 31Qataq somayepi, nacheso so qaipataxalec da ilo'ogue aso arca maye laỹe' soua aỹamaxataxaco, qataq so lmala' aso nauole maye qaica ca lalegue, qataq aso ncoỹaraxanaxaqui maye siete naua lhua'q, qataq aso nca'atoxonaxalatepi, qataq so laỹe logoxoshetpi, qataq so lapoxonaxatpi, qataq so nhuenecpi. 32Qaq so Eleazar som llalec so ntaxaỹaxanaxanec Aarón, nacheso so lataxala' se'eso leviitapi, qaq somaye nache lataxala' so ilotague' so npe'l. 33Qaq so maiche lalamaxat lauo' le'ecpi so Merari, som chegoxogueta soua Mahli qataq so Musi, 34da ima'a't se'eso nereguishecpi ỹalleppi, maye ivi', qataq mashe napacalec ñi 'oonolec ca'agoxoic, ivi' seis mil doscientos ye lcata. 35Qaq so Suriel som llalec so Abijail, nacheso so lataxala' somayepi. Qaq nache netaña so pa'aigue da sheu' so npe'l. 36Qaq se'eso chegoxoguet so Merari, nache qaipataxalec da ilotague' 'enauac so nchiiguishec 'epaqpi maye l-llecnaxanaxatpi, qataq aso lauoqtepi qataq so na'attalec asomayepi, qataq 'enauac so laỹe logoxoshetpi so npe'l, 37nataqa'en ilotague' aso lauoqtepi so npaqtaxanaxat maye coleesop so nqasoxoc so npe'l, qataq aso na'attalecpi asomayepi, qataq so lquetpi qataq aso qaitoqooñi maye nllañi na lquetpi so npe'l. 38Qaq so Moisés, Aarón qataq so llalaqpi, nache netaña co'ollaxa da pa'aỹa'ague da nala' lliguisheguem, maye datateuga so npe'l, qaq nacheso somayepi so ipataxalec co'ollaxa so Israel le'ecpi da ilotague' se'eso npe'l. Qaq ỹoqo'oye da huo'o ca chegaqauec da saishet da ntaxaỹaxanaxanec da ỹacoolec de'era no'onataxanaxac, nache camaye qaỹalauat. 39So Moisés qataq so Aarón co'ollaq ỹo'o't aso le'enaxat lmalate so leviitapi, nache soomaye ipactrelec da ỹo'o't da lamaxasoxonaxac Ñim Nataxala', nache 'enauac so ỹalleppi maye ivi' qataq mashe napacalec ye 'oonolec ca'agoxoic, ivi' veintidós mil ye lcata.
Da 'eetec da qañe'eguelaxaala't ca na'auaxanec ñalec
40Ñim Nataxala' 'enapega co'ollaxa so Moisés, 'eeta': «'Auo'ot qome aca le'enaxat lmalate 'enauac na la'auaxanec llalec na Israel le'ecpi, na ivi' qataq na mashe napacalec ye 'oonolec ca'agoxoic, nache 'iyiñi na le'enaxatpi namayepi. 41Ime, nache 'auỹotauga na leviitapi da yaqto' ỹalamaxat 'anqa'en, nmeneguet na la'auaxanec llalec na Israel le'ecpi. Qaq nache 'eeta'am na lalo shiguiỹacpi na leviitapi da 'auỹotauga da ỹalamaxat 'anqa'en, nmeneguet na la'auaxanec llalec, na lalopi shiguiỹacpi na Israel le'ecpi. Aỹem, maye Nachaỹem Nataxala'.» 42Nache so Moisés, ipacchigui da lamaxasoxonaxac Ñim Nataxala', nache ỹo'ot aso le'enaxat lmalate 'enauac na la'auaxanec llalec so Israel le'ecpi, 43nache da ima'a't so nereguishecpi maye na'auaxanec ñalec, so ivi' qataq napacalec ñi 'oonolec ca'agoxoic, ivi' veintidós mil doscientos setenta y tres ye lcata. 44Ime, nache Ñim Nataxala' qaltaq 'enapega so Moisés, 'eeta': 45«'Auỹotauga qome na leviitapi da yaqto' ỹalamaxat 'anqa'en, nmeneguet na la'auaxanec llalec na Israel le'ecpi. Qaq nache 'eetec nataqa'en na lalo shiguiỹacpi namayepi, da nmeneguet 'anqa'en na lalo shiguiỹacpi na Israel le'ecpi. Nache ne'ena leviitapi, namayepi ỹalamaxat. Aỹem, maye Nachaỹem Nataxala'. 46Qalaxaye na la'auaxanec llalaqpi na Israel le'ecpi, napacalec na llalaqpi na leviitapi, ỹoqo'oye da qañe'eguelaxaala't ne'ena doscientos setenta y tres maye ỹapacauec, 47nache qaisheetenaxana aca cinco lcatpiole plata da qaisheeten ñi 'oonolec, maye ivi' once gramos ye lsallaxa, cha'aye nachañi añi lasheue da huaña ñi npe'l, 48qaq aca'aca nsheetenaxanaqte, nache 'aỹa'anem qome ñi Aarón qataq na llalaqpi, cha'aye nache lasheue da qañe'eguelaxaala't na llalaqpi na Israel le'ecpi.» 49Nache so Moisés ỹacona asa'aso nsheetenaxanaqte maye lasheue so la'auaxanec llalaqpi so Israel le'ecpi maye ỹapacauec, 50qaq ye lcata asa'aso napoñiguishe, ivi' mil trescientos sesenta y cinco aso lcatpiole plata, aso qoỹaneua'a se'eso npe'l. 51Ime, nache so Moisés ỹanem so Aarón qataq so llalaqpi asa'aso nsheetenaxanaqte, nache ipacchigui da lamaxasoxonaxac Ñim Nataxala'.
