Ye laloxoqui so Lapascua
1Qaq co'ollaq mashe ivita so 'oonolec ca'agoxoic so vi'i dos, da so Israel le'ecpi ca'ai ye Egipto. Nache Ñim Nataxala' 'enapega so Moisés, co'ollaq huaña ye toolec 'alhua ye Sinaí, nache 'eeta':
2«Na Israel le'ecpi, ỹo'ot qome ca lquia'axac da ỹo'oxoren so laloxoqui so lapascua, qalaxaye huetoigui naqa'en ye maiche laloxoqui. 3Maye nache huaigui ne'ena ca'agoxoic qataq huetoigui ca avit ca na'a'q catorce, qaq ỹataqta qanayectelec da lataxac dam napaxaguenataxanaxac da qaỹo'ot de'era ño'oxonnataxanaxac.»
4Huaña nache so Moisés, 'enapega so Israel le'ecpi da ỹo'ot se'eso na'a'q maye huetoigui da qaỹo'ot so Lapascua, 5nache somayepi ỹo'ot de'era se'eso avit so na'a'q catorce se'eso ca'agoxoic, huaña so toolec 'alhua ye Sinaí, nache qaipacchigui 'enauac da lamaxasoxonaxac Ñim Nataxala' maye ỹamaxalec co'ollaxa so Moisés. 6Qalaxaye huo'o co'ollaxa so shiỹaxauapi maye saishet da qui'itta, souaxat da ỹasheleua'a so leuaxaic, ỹoqo'oye saishet da ỹalegueua'a so Lapascua se'eso na'a'q. Qaq somayepi, nache taua'a co'ollaxa so Moisés qataq so Aarón se'eso na'a'q, 7nache somayepi 'enapego' so Moisés, 'eeta':
Qomi' sashelaxaua'a caillaye so leuaxaic, ỹoqo'oye saishet da qomi' qui'itte'. ¿Qaq negue'to' ca qomi' nqanaxa't da yaqto' sanaxauo ca qarachetaqtaxanaxat, da shenaqta'am na laỹe Israel le'ecpi? 8Nache so Moisés 'enapeco':
Ñaq aỹem qauachiỹa'a da senat Ñim Nataxala', yaqto' saỹatenaq ca 'eeteque qami'. 9Nache Ñim Nataxala' 'enapega so Moisés, 'eeta': «Qonapega na Israel le'ecpi qoneta': 10Da qoñiita da huo'o, huo'otaq na qaỹa'alquipi, ca saishet da qui'itta souaxat da ỹashelleua'a ca leuaxaic, huo'otaq da queuotapigui' qaỹoqtegue ca hueta'ague, qalaxaye nache 'ena'am ishet da Aỹem ỹo'oxoren que'eca na'a'q, 11qalaxaye huetoigui naqa'en ca na'a'q catorce, que'eca lỹa ca'agoxoic da mashe napaltapiguiñi. Nache ỹauot ca qagueta llalec da chec, qataq aca nauole qaica ca lalegue, qataq aca nalecnaxanaqte huoue chemaxaxarai, 12qalaxaye qaica qome ca no'onaxatañi que'eca qagueta llalec da taỹaigui naqa'en ca lỹa na'a'q, huo'otaq da ỹacagaxat ca lpi'inec camaye. Nache qanayectelec qome de'era lataxac da qaỹo'ot que'eca Lapascua. 13Qalaxaye da huo'o ca shiỹaxaua qui'itta, qataq da saishet da hueta'a ca qaỹoqta 'alhua, da saishet da ỹo'ot ca llo'oxonnataxanaxac que'eca na'a'q Lapascua, nache camaye qaỹo'orauec, ca'ai qanqa'en na lauo' le'ecpi. Cha'aye camaye huo'o da lasouaxashet, souaxat da saishet da ỹanot Ñim Nataxala' ca lachetaqtaxanaxat que'eca na'a'q, nache camaye huo'o ca nhuaxanaguec.
14Qataq ca chegaqauecpi maye qami' netaiguilo, camayepi nataqa'en ỹo'ot qome ca Lapascua da Aỹem ỹo'oxoren, qalaxaye ipacchiguilo naua lapaqtrañi lataxaco. Qaq de'era qalapaqtañi lataxac damaye ipacchigui da ỹo'ot qome ca chegaqauecpi qataq ca maiche lañoqo' ne'ena 'alhua.»
So lo'oc ipelteetalec so npe'l
15Qaq se'eso na'a'q co'ollaq ime da qaỹa'ara't so npe'l maye netaigui aso arca maye laỹe' soua aỹamaxataxaco, nache anac so lo'oc da ipelteetalec somaye. Qaq so mashe avit, nache se'eso lo'oc 'eroigui 'eeta'am na norec, imauec se'eso pe da 'ettaigui, nache ivitta'a so nte'eta so lỹa na'a'q. 16Qaq nache 'eeta'ac naxa de'era se'eso lo'oc: ye na'a'q, nache ipelteetalec so npe'l, qaq ye pe, nache somaye 'eeta'am na norec na le'eraxa. 17Qaq naxa da naỹoxoosheguem se'eso lo'oc da ca'ai so npe'l, nache so Israel le'ecpi naỹamaxat da jec, qaq ca huaña naxa da vi'iiguet somaye, nache somayepi nataqa'en vi'iiguet da naña camaye. 18Nache se'eso Israel le'ecpi, iuatta'a naxa ca la'aqtac Ñim Nataxala' da jec, qataq da vi'iiguet, qaq da 'enauaque naua na'axa'te da qaica ca ldaxac so lo'oc da ipelteetalec so npe'l, nache somayepi nataqa'en qaica ca ldaxac. 19Nache se'eso lo'oc da qaỹaloqta da ca'ai so npe'l, nache so Israel le'ecpi nataqa'en qaica ca ldaxac, nache iuatta'a ca la'aqtac Ñim Nataxala'. 20Qaq nache 'ena'am naxa da sa lamai' naua na'axa'te da ipelteetalec so npe'l se'eso lo'oc, nache so Israel le'ecpi ỹalaxaguet da la'aqtac Ñim Nataxala' da qaica ca ldaxac, qataq nache 'ena'am naxa da ỹamaq da jec somayepi. 21Qataq huo'o naxa da 'oonolec pe da vi'iiguet se'eso lo'oc, nache da nte'etom ye lỹa na'a'q, nache naỹoxoosheguem da ca'ai so npe'l, nache somayepi qaltaq jec. Qataq huo'o naxa da na'a'q, qataq huo'o da pe da ca'ai se'eso npe'l, nache somayepi qaltaq jec. 22Qaq huo'o naxa da dos na'axa'te, huo'otaq 'oonolec ca'agoxoic huo'otaq 'oonolec vi'i da ipelteetalec so npe'l se'eso lo'oc, nache so Israel le'ecpi qaica ca ldaxac, saishet da jec. Qaq naxa da naỹoxoosheguem se'eso lo'oc, nache somayepi qaltaq jec. 23Nache somayepi iuatta'a naxa ca la'aqtac Ñim Nataxala' da vi'iiguet, qataq da ivita da jec. Qaq 'era da 'eetec da ỹataqta ỹalaxaguet da lamaxasoxonaxac Ñim Nataxala' maye ỹamaxalec co'ollaxa so Moisés.
