Proverbios 10

₁Naua la'aqtaqa so Salomón, 'eeta':

Ca ñalec ỹaanaxanaxaic, machiguiñi naqa'en ca lta'a,

qaq ca ñalec qaica ca ỹaỹaana'a qalaq ỹo'ot da nque'eenaxac aca late'e.

₂Da nsallaxa maye chegaqaigui da ncachaxac qaica ca naigui,

da no'on nataxac qalaq ishet da huo'o ca isoueeguesop da nleuaxa.

₃Ñim Nataxala' saishet da iqouat naqa'en ca no'on da lataxac,

qalaxaye ỹo'otec da iqouat ca qauemaic.

₄Ca sa qallegueme da do'onataxan qalaq taỹa'a da choxoraq,

qaq ca ỹaguec da lo'onataxanaxac qalaq taỹa'a da sallaxanec.

₅Ca deqataxan da nvi' ye cotap qalaq ỹaanaxanaxaic,

qaq ca do'ocheta da huo'o da no'onataxanaxac qalaq taỹa'a da huo'o da la'aloxo.

₆Ca ỹale no'on da lataxac camaye talec da na'achecỹaxac,

cam qauemaic qalaq ipa'axaañi da nloquiaxanataguec.

₇Ca ỹale no'on da lataxac da qaiuennate qalaq huo'o da nchoxonnataguec,

ca qauemaic qalaq saqaỹaloq da qaicoua'ai.

₈Ca ỹaanaxanaxaic ỹaconeguet ca namaxasoxonaxac,

qaq ca qauema naua la'aqtaqa qalaq taỹa'a da nlachiguiñi.

₉Ca ilotague' da llecỹaxac camaye qaica ca ñe'etaique,

qaq ca qauem da llecỹaxac qalaq qauem ca loga't.

₁₀Qaq ca naquiaxaatalec ana la'aite qalaq taỹa'a ca qauem,

qaq ca qaica ca ỹaỹaana'a qataq taxaỹaxaic qalaq taỹa'a da nlachiguiñi.

₁₁Naua la'aqtaqa ca no'on da lataxac qalaq chegaqaiguilo da nca'alaxa,

qaq ca qauemaic qalaq ipataxañi na qauemsat.

₁₂Da nquiỹaxanaqtaic ỹo'oteua'a da loquiaxac,

da nsoxoyec qalaq ỹapalaxat 'enauac na nasouaxashetpi.

₁₃Naua la'aqtaqa ca ỹaanaxanaxaic chegaqaiguilo da naỹaanec,

qaq ca qaica ca ỹaỹaana'a qalaq taỹa'a

da qaiuaxaalec na l-laq ca nhuaxanaxanaxat.

₁₄Ca ỹaanaxanaxaic camaye ỹaỹamaxatteque naua lauattonaxanaxaco,

qaq naua la'aqtaqa ca qaica ca ỹaỹaana'a qalaq huo'o da lchec.

₁₅Da lsallaxa ca sallaxanec nachera da npaxattalec,

qaq ca choxoraq qalaq nlaxaañi da lachoxoyec.

₁₆Qaq da nca'alaxa nachera da nsheetenaxat ca no'on da lataxac,

qaq da ñe'etaxaloxo nachera da nsheetenaxat ca qauemaic.

₁₇Ca ilotelec ca napaxaguenataxanaxac,

camaye quetegue da no'on llec da achaalataxac,

qaq ca saỹaconeguet damaye qalaq taỹa'a da deqat.

₁₈Ca saq 'e'n naua la'aqtaqa camaye ỹoxottañi da lquiỹaxa,

qataq qaica ca ỹaỹaana'a ca ỹa'axatec ca saq 'en.

₁₉Ca qalota na la'aqtacpi qalaq qalota da lsomaxac,

qaq ca ỹaỹaten da ñe'emaxat camaye ỹaanaxanaxaic.

₂₀Naua la'aqtaqa ca no'on da lataxac qalaq 'eeta'ama ca no'on plata,

qaq naua lhuennataxaco ca qauemaic qalaq qaica ca naigui.

₂₁Naua la'aqtaqa ca ỹaanaxanaxaic qalota ca ỹapaxaguen,

qaq ca qaica ca ỹaỹaana'a qalaq ilem da qaica ca ỹaỹaanapec.

₂₂Da lchoxonnataxanaxa Ñim Nataxala' ỹo'ot da nsallaxa,

damaye saishet da ỹo'ot ca naquicoxo.

₂₃Ca qaica ca ỹaỹaana'a qalaq machiguiñi da ỹo'ottac na qauemsat,

qaq ca ỹaanaxanaxaic qalaq machiguiñi naqa'en da naỹaanec.

₂₄Cam ñe'etapeeguet ca qauemaic qaq nacheca ca naỹa'a camaye,

qaq ca no'on da lataxac qalaq ipacchiguilo naua no'o'n lhuennataxaco.

₂₅Da ỹoxogue ca la'at lta'araic nache imeuo ca qauemaic,

qaq ca no'on da lataxac qalaq nache 'eetai' da nachattañi.

₂₆Ca ỹamaq ca na'aqtaxanaxanec hualaic

qalaq 'eeta'am da maiche ñe'euai' naqa'en naua lhue

qataq da taiguilo naua la'ai'te ca lmala'q.

₂₇Da huo'o naq 'enec qanqa'en Ñim Nataxala'

ỹo'ot da logoraic da achaalataxac,

qaq naua nachattaiguilo vi'iye ca qauemaic qalaq sa qaỹarec.

₂₈Ca no'on da lataxac qalaq taỹa'a da machiguiñi,

qaq ca qauem da lataxac qalaq taỹa'a da nlaguiñi.

₂₉Ñim Nataxala' npaxattalec ca ỹo'ottac ca ỹaỹamaqchiguiñi,

qaq ca ỹo'ottac ca qauem qalaq ilaxachigui.

₃₀Ca no'on da lataxac qalaq saishet da huañi,

qaq na qauemaicpi qalaq saishet da nache 'eetai' da huetalec ana 'alhua

₃₁Naua la'aqtaqa ca no'on da lataxac

qalaq chegaqaiguilo da naỹaanec,

qaq ca qauema naua la'aqtaqa qalaq taỹa'a da qaicheguec na lachaxat.

₃₂Ca no'on da lataxac qalaq no'oñi naua la'aqtaqa,

qaq ca qauemaic qalaq qauema naua la'aqtaqa.