Proverbios 12

₁Ca ỹauotec da napaxaguenataxanaxac

camaye ỹauotec da naỹaanec,

qaq ca saiuooneguet da qaiviraxato'ot

camaye qaica ca ỹaỹaanapec.

₂Ñim Nataxala' ỹaỹamaxareeta ca ỹale soxoraic,

qaq ca 'etaxaloxoic qalaq Ñimaye ỹauo'o ca nhuaxanaguec.

₃Da qauem saishet da nache 'eetai' da na'attañi naqa'en ca shiỹaxaua,

qaq ca no'on da lataxac qalaq nache 'eetai' da na'attañi qaica ca iraxanai'.

₄Aca 'alo no'on da lataxac acamaye ỹo'ot da llo'oxoyec ca lhua,

qaq aca qauem da lataxac qalaq ivitta'a da nlachiguiñi naqa'en ca lhua.

₅Na shiỹaxauapi no'on da lataxac lhuennataxat

da ỹo'ot ca nalochiguiñi lataxac.

Qaq na qauemaicpi qalaq lhuennataxat da natenataxanaxac.

₆Naua la'aqtaqa ca qauemaic

'eeta'ama aca nqoina maye dalaataxan,

qaq naua la'aqtaqa ca no'on da lataxac qalaq deca'alaqtaxa'n.

₇Na qauemaicpi qalaq huañi, nache imeuo,

qaq na llalaqpi ca no'on da lataxac qalaq nache 'eetai' da na'attañi.

₈Ca ỹale qaỹo'oxoren souaxat da huo'o na laỹaanec,

qaq ca qauema naua lhuennataxaco qalaq nda'a't da no'otanaguec.

₉Qaq ỹactec da no'on ca ỹale da no'otanec

qalaxaye huo'o na lamaxashecpi,

qaq saq 'ena'am ca na'amaqteetai' da 'eetega sallaxanec

qalaxaye qaica ca aloq.

₁₀Ca no'on da lataxac ỹaỹaten da ntela'a na na'atetpi,

qaq ca qauemaic qalaq sa ỹaỹaten da dechoxonnataxan.

₁₁Ca do'onataxaatapeguelec ca na'alhua qalaq sa qoue na aloq,

qaq ca imelec da lqueuoxoc qalaq huetague' na qaica ca naigui.

₁₂Na qauem qoỹeetapeguec nachena na loxonaxanaxat na qauemaicpi,

qaq na no'on da lataxac qalaq ñaxatec, nache huo'o da alaỹaxac.

₁₃Ca qauemaic qalaq lpachigui da maiche latenataxanaxac,

qaq ca ỹale no'on da lataxac qalaq qaica ca nqalanaxac da huo'o ca huaigui.

₁₄Ñi 'oonolec ỹaconeguet ca alaỹaxac na maiche la'aqtacpi,

qataq ỹaconeguet da lashiichiỹaxac cam ỹo'ottac.

₁₅Ca qaica ca ỹaỹaanapec ipi'itaxana

da ỹaỹamaqchiguiñi 'enauac na ỹo'ottacpi,

qaq ca ỹaanaxanaxaic qalaq iloteguet na nqataxacpi.

₁₆Ca qaica ca ỹaỹaanapec qalaq saqaỹaloq da ỹachaxan da lalemataic,

qaq ca huo'o na ỹaỹaten qalaq saishet da qochetega ca mpa'aguenataguec.

₁₇Ca ỹoqta 'eesa ca ỹa'axat qalaq ỹa'axat ca ỹoqta 'eesa lataxac,

qaq ca saq'en qalaq ỹa'axat ca saishet da 'eesa.

₁₈Huo'o na shiỹaxaua deque'emaqtaxa'n naua la'aqtaqa,

qaq naua la'aqtaqa ca ỹaanaxanaxaic qalaq datannaxa'n.

₁₉Ca 'eesora naua la'aqtaqa qalaq qaỹoqtec da nachaalataxac,

qaq ca shepecaic qalaq saqaỹaloq da imeuo.

₂₀Na lhuennataxacpi ca qauemaic qalaq nda'a't da natenataxanaxac,

qalaxaye huo'o da ntonaxac na ỹo'ottac da nlagaxayec.

₂₁Ca ỹale no'on da lataxac qalaq saishet da nque'eteetapigui na qauemsat,

qaq ca qauemaic qalaq talec 'enauac na sa ỹaỹamaxañesat.

₂₂Ñim Nataxala' ỹataqta ỹaỹemec na shepecaicpi,

qalaxaye ỹaỹamaxareeta na ỹo'ottac na 'eesa lataxac.

₂₃Ca qaica ca nqalaate' saishet da ño'oxoreetapigui da laỹaanec,

qaq ca qaica ca ỹaỹaanapec qalaq ño'oxoreetapigui da no'oopashaxac.

₂₄Ca do'onataxaatac qalaq ishet da damaxasoxonapec,

qaq ca hualaic qalaq choche qailattac.

₂₅Da qui'icỹaxac damaye ỹaquicoqchet ca ỹale,

qaq naua no'o'n na'aqtaqa qalaq ỹo'ot da namaicỹaxac.

₂₆Ca no'on da lataxac ishet da ỹaueca'aguet ca 'eeta'am lỹa,

qaq na qauemaicpi qalaq taỹa'a da iqataqchet da maiche llecỹaxac.

₂₇Ca 'ipiaxaic maye hualaic saishet da huo'o ca ỹachiguiñi,

qaq ca hualaxaunaxaic qalaq ishet da ỹachiguiñi da nsallaxa.

₂₈Da llecỹaxac da nalochiguiñi lataxac chegaqaigui da nca'alaxa,

qaq se'eso nqa'aic qaica ca nleuaxa.