Proverbios 15

₁Ca nasataxac huesotta qalaq nmooñi naqa'en ca nalemataic,

qaq ca nasataxac quia'aqaic qalaq 'eroigui naqa'en ca nalemataic.

₂Naua la'aqtaqa ca ỹaanaxanaxaic qalaq chegaqaiguilo da naỹaanec,

qaq naua la'aqtaqa ca qaica ca ỹaỹaanapec

qalaq chegaqaiguilo da 'oopashec.

₃Ñim Nataxala' hueta'a 'enauac na qanayeetaña,

ilotalec 'enauac na soxoraicpi qataq na qauemaicpi.

₄Naua na'aqtaqa soxoraiqa qalaq 'eeta'ama

aca qo'oipaq chegaqaigui da nca'alaxa,

qaq naua na'aqtaqa quia'aqaiqa qalaq na'aqchet da nhuennataxac.

₅Ca qaica ca ỹaỹaanapec ỹo'ota'n naua lqataxaco ca lta'a,

qaq ca ilotegueta naua nqataxaco camaye sanqalat.

₆Ỹataqta qaica ca iueetac ca lma' ca ỹale maye no'on da lataxac,

qaq na laueguecpi na qauemaic qalaq qalota naqa'en da cotaxac.

₇Na ỹaanaxanaxaicpi naua la'aqtaqa,

qalaq ilagaxatrec da naỹaanec,

qaq na lhuennataxaco na qaica ca ỹaỹaanapec,

qalaq saishet da nache 'eetec de'era.

₈Ñim Nataxala' saisheteguet aca lachetaqtaxanaqte na qauemaicpi,

qalaxaye ỹamaateguet da natamnaxac na no'on da lataxac.

₉Ñim Nataxala' saisheteguet da qauem lataxac na qauemaicpi,

qalaxaye ỹauotec ca quegue da nalochiguiñi lataxac.

₁₀Ca ỹaxanec da no'on nqa'aicỹaxac

camaye sa qaỹala'ac da qanlaxanec,

qaq ca sa ỹaỹamaxaren da qaitaxaỹaua'a qalaq taỹa'a da ileu.

₁₁Da lmeenaxanaxac Ñim Nataxala'

ỹaatec naqa'en da nleuaxa qataq ana huachiqui,

qaq nache 'eetec nataqa'en da ỹaatec naqa'en

naua lhuennataxaco na shiỹaxauapi.

₁₂Ca nogoqtaxanaxaic saishet da ỹauotec ca nlaxanec camaye,

qataq saishet da nmittaique da ỹalectaigui na ỹaanaxanaxaicpi.

₁₃Aca nquiyaqte da machiguiñi,

qalaq machiguiñi naqa'en da nasheguiỹaxac,

qaq aca nquiyaqte sa no'oilec, qalaq daquico naqa'en da nasheguiỹaxac.

₁₄Ca ỹaanataxanaxaic qalaq nmitta'a da naỹaanec,

qaq na qaica ca ỹaỹaanapec qalaq ỹa'añaqchettac da no'oopashaxac.

₁₅Ca huetapoigui da nque'eenaxac

qalaq 'enauaque naua na'axa'te da qauema naqa'e'n,

qaq ca matapiguiñi, qalaq 'enauaque naua na'axa'te da machiguiñi.

₁₆Na'aictoxo' da choxoraq ca shiỹaxaua,

qalaxaye huo'o naq 'enec naqa'en Ñim Nataxala',

qaq saq 'ena'am da sallaxanec ca shiỹaxaua, qalaxaye nda'a't da nque'eenaxac.

₁₇Qataq na'aictoxo' da qanallectac

ca nallec huoue, qalaxaye huo'o da nsoxoyec,

qaq saq 'ena'am da qanallectac ca chaxaraic lapat,

qalaxaye huetaigui da nquiỹaxanaqtaic.

₁₈Ca sa lhuanguit da lalemataic,

camaye ỹo'otteua'a da loquiaxac,

qaq ca hualaxauaic, qalaq ỹo'ot da nlagaxayec.

₁₉Da nqa'aicỹaxac ca hualaic qalaq nlaqtegue ana le,

qaq da llecỹaxac ca no'on da lataxac qalaq no'oitegue.

₂₀Ca ñalec ỹaanaxanaxaic machiguiñi naqa'en ca lta'a,

qaq ca ñalec qaica ca ỹaỹaanapec

qalaq qaica naqa'en ca naigui aca late'e.

₂₁Ca qaica ca ỹaỹaanapec qalaq machiguiñi naqa'en da no'oopashaxac,

qaq ca ỹaanataxanaxaic qalaq ỹaỹamaxatchiguiñi da lqauaxac.

₂₂Da sa qannachigui ca qaỹo'ot,

nache saipaigui ca qalapaxañi da qaỹo'ot,

qaq da qalota na detaxaỹaua'a camaye nache ishet da qaỹañoxot.

₂₃Ỹataqta 'onaxaic da ỹaỹamaqchiguiñi ca nasataxac,

lamaaxa da huaqchigui da ỹoqta qaiuen.

₂₄Da llecỹaxac da nachaalataxac ca ỹaanaxanaxaic

qalaq taỹasheguema na pa'asheguem,

da yaqto' nca'aleeguesop aca huachiqui maye npa'aỹañi.

₂₅Ñim Nataxala' ilaxachigui ca lma' na ño'oxonnaxaicpi,

qalaxaye no'oitai' naqa'en na lalamaxatpi aca pa'ai.

₂₆Ñim Nataxala' saisheteguet na lhuennataxacpi na qauemaicpi,

qalaxaye ỹamaategueta naua na'aqtaqa 'onaxaiqa.

₂₇Ca qopitaxanaqtaqaic qalaq maiche nlaxattapiguiñi da lma'ỹaxac,

qaq ca saỹaconeguet da choche qaisheeten

qalaq nache 'eetai' da nca'altauec.

₂₈Ca ỹale no'on da lataxac qalaq hua'auñi

da deuennataxaalec ca huotaique da nasaxauec la'aqtac,

qaq naua la'aqtaqa ca qauemaic qalaq nlaqchiguilo na qauem.

₂₉Ñim Nataxala' qaỹoqtaique naqa'en na qauemaicpi,

qalaxaye hua'axaỹa da natamnaxac ca no'on da lataxac.

₃₀Da no'on lmeenaxanaxac naua na'ai'te,

qalaq machiguiñi naqa'en da nquiyaqteỹaxac,

qaq ca no'on na'axaỹaxac qalaq dalaxaic naqa'en da na'añaxac.

₃₁Ca na'axaỹaxana ca nvitaqtaxanaxac maye deca'alaqtaxa'n,

qaq camaye ỹalectaigui na ỹaanaxanaxaicpi.

₃₂Ca sa ỹaconeguet da qanlaxanec,

qache sa ỹauotec da nachaalataxac,

qaq ca ỹaconeguet da qanlaxanec

qalaq ỹaconeguet da naỹaanataxanaxac.

₃₃Da huo'o naq 'enec qanqa'en Ñim Nataxala',

damaye dapaxaguenataxanec da naỹaanec,

qaq da qanshetaique da qaỹaconeguet da ño'oxoyec,

qalaq hua'auñi qanqa'en da qaica ca na'amaqchec.