1Na'aictoxo' da choxoraq ca ỹale qalaxaye huo'o da llo'oxoyec,
qaq saq 'ena'am ca qaica ca ỹaỹaanapec qataq nogoqtaxanaxaic.
2Sa ỹaỹamaxañi da sa qaiuennataxaalec ca qoỹeetapeguec,
qataq da qalota da nỹalaxa nache ỹo'ot da nsomaxac.
3Da 'eetec da qaica ca ỹaỹaanapec ca ỹale
nachera da ỹo'ot da daqat da nqa'aicỹaxac,
ime, nache nmaxalec da lasouaqtac camaye
Ñim Lo'onatac 'Enauacna.
4Da nsallaxa naueguela't na qalota auochaxauapi,
qaq ca choxoraq qalaq ivira'a ca nauochaxaua ỹalat camaye.
5Ca ỹa'axat ca saq 'en qalaq saishet da saqaỹauo'o ca nhuaxanaguec,
qataq ca shepecaic qalaq saishet da qoỹet.
6Ca chetaqtaxanaxaic qalaq qalota na nauochaxauapi,
qataq 'enauac da qanmitta'a da auochaxaua ca huo'o na ỹaatac.
7Ca choxoraq qalaq ivira'a ca lqaỹañecpi da ỹo'otan,
qaq nache 'eetec nataqa'en na nauochaxauapi da ca'ai camaye.
Na'aictoxo' da nachoxoreeta da nmittaique ca na'aqtaxane'
qalaxaye saishet da ỹanata.
8Ca huo'o na ỹaỹaten qalaq ỹauotec da maiche nachaalataxac,
qataq ca ntela'a da laỹaanataxanaxac
camaye ivira'a da ỹaỹamaxañi.
9Ca saq 'en ca ỹa'axat saishet da saqaỹauo'o ca nhuaxanaguec,
ca shepecaic qalaq iuatta'aguet da nleuaxa.
10Ca qaica ca ỹaỹaanapec saq taiguet da huetangui na no'on nogoxoshetpi,
qaq nache 'eetec ca choche nlatac saishet da ilotague' na llalaqpi na nta'alpi.
11Da qaica ca qanqalaate' ỹo'ot da qalhueneguet da nalemataic,
qataq ỹo'ot da ño'oxoyec da sa qaiqocha'a ca nogoqtaxanaxac.
12Da lalemataic ca nta'a 'eeta'am ca quiyoc da desoqo,
qaq da lqouagaxanaqtaic 'eeta'am na 'aỹa da talec na 'auaqpi.
13Ca ñalec qaica ca ỹaỹaanapec
qalaq ỹo'ot da nque'eenaxac ca lta'a.
Qaq aca 'alo maye ncotaxai qalaq 'eeta'am aca llo'oxo maye sanme.
14Caua nta'al chegoqchiguilo da qaỹaconeguet ca nỹec
qataq da nsallaxa,
Qaq Ñim Nataxala' qalaq chegoqo'ot aca 'alo sanqalat.
15Da nhualaxa ỹo'ot na lta'araic no'ochaxa,
qataq ca hualaic ỹataqta huo'o na lqouaxa.
16Ca ỹalaxaguet da namaxasoxonaxac
qalaq ntela'a da maiche nachaalataxac,
qaq ca ỹo'otan da lapaxaguenataxanaxac Ñim Nataxala',
qalaq camaye ileu.
17Da qaỹa'aalaxanaxan ca choxoraq
qalaq 'eeta'am da nacheñi Ñim Nataxala' da qaỹa'aalaxanaxan,
ỹoqo'oye Ñim Nataxala' maiche isheeten que'eca ỹan aca na'aale.
18'Anhuogaxa ca 'aỹa'alec da ñaq ishet da 'anlaxanec da lataxac,
qalaxaye saishet da 'aualauatec de'era nhuaxanaguec.
19Ca ỹaguec da lalemataic qalaq ỹaconeguet da maiche nhuaxanaguec,
qaq ca nshetaique da nhuogaxa qalaq ỹe'eraxatoigui da lalemataic camaye.
20'Auloteguet qome ca nqataxac
qataq 'auaconeguet da 'am qanlaxan,
yaqto' ishet da 'avira'a da 'am ỹaanaxanaxaic.
21Ca shiỹaxaua qalota na iuennatega da huotaique da ỹo'ot,
qalaxaye nachecata ca 'eetapeguec Ñim Nataxala' maye ishet da qaỹo'ot.
22Ỹataqta qanaquita'a ca shiỹaxaua da no'on da lataxac,
na'aictoxo' da choxoraq
qalaxaye saq 'ena'am da shepecaic.
23Da huo'o naq 'enec qanqa'en Ñim Nataxala' ỹo'ot da nca'alaxa,
qataq ỹo'ot da qaica ca machaqca naqa'en
ñi 'oonolec qataq saishet da nque'etaxangui ca qauem.
24Ca hualaic ỹauota'a na lhuaq da ỹacongui ca lquia'axaqui,
qalaxaye saỹañoxot da ỹasaxaigui na alap ca aloq.
25Da 'auaxan ca sancherapec,
nache ỹaỹaanataxanaxan ca qaica ca ỹaỹaanapec,
qaq da 'anlaxanec ca ỹaanaxanaxaic
nache nquictec da lauattonaxanaxac.
26Ca sa iyacnapec ca lta'a qataq da ỹo'orauec aca late'e
camaye ỹo'ot da na'aloxo qataq qaỹa'aguelec que'eca ñalec.
27'Am ỹalcolec da sa 'auaconeguet da 'am qanlaxanec,
qalaq 'am qoca'ai na no'on nqataxacpi.
28Ca ỹale saq 'en ca ỹa'axat
ỹa'ashaxanai' ca nalochiguiñi lataxac,
qaq ca qauemaic qalaq ỹauota'aisalo
naua la'aqtaqa da nanorec ca qauem.
29Mashe sogote da qaiqataxaatai'
da nhuaxanaguec na sancherapecpi,
qataq na nhuaxanaxanaxat da yaqto' qaiuaxaalec na l-laq ca qaica ca ỹaỹaanapec.
