Proverbios 23

₁Da ivita da 'arquia'axaua ca sallaxanec,

qalaq 'auaỹamaxatchiguiñi da 'arhuennataxac

da 'auatato'ot camaye.

₂Na'aictaxa da ỹataqta huo'o na 'arqouaxa,

qalaxaye ỹataqta 'ana'añaxateguet,

₃qataq saishet da 'auqopitta'a ne'ena no'on nallec,

cha'aye ishet da choche 'am ipe'etaqchet.

₄Saishet qome da ỹapaguec da 'arhuogoxo da 'anshetaique da 'am sallaxanec,

saishet da 'aỹa'agaqnauec de'era 'arhuennataxa.

₅Cha'aye da ỹoqta 'aumeteeta damaye,

nache ishet da 'aula'a da qaica de'era nsallaxa,

cha'aye damaye ỹataqta sa ilaua'ague da jec,

'eco' da huo'oi naua laua't 'eeta'am na vi'ic da huaỹo.

₆Saishet da 'auqui'iỹa'ai' ca shemataqaic,

qataq saishet da 'auqopitta'a na no'on aloq,

₇cha'aye namaye 'eeta'am ca qoue da huetangui ana nqoichiqui,

cha'aye camaye 'am iỹaxana da 'arquia'axaua qataq 'anỹomaxaua,

qalaxaye saishet da ỹoqta 'eesa da lhuennataxa,

₈cha'aye da ime, nache ishet da 'auanolec cam qollec,

nache deqat na no'on 'ara'aqtacpi

nache qaica ca naigui.

₉Saishet qome da 'aua'axaỹaqchetec

ca 'ara'aqtac ca qaica ca ỹaỹaanapec,

cha'aye camaye ishet da choche ỹe'eeta'ape

naua ỹaanaxanaxaiqa 'ara'aqtaqa.

₁₀Saishet qome da 'anqochenaxat

ana togoshaapec na'anaxanaqtepi,

qataq saishet da 'anamataxaalec

da 'auacona ca na'alhua ca qaicaua caua lta'al,

₁₁cha'aye Ñim mpaxattalec namayepi ỹataqta 'añaxaic,

qaq Ñimaye ishet da 'am dataỹa'aguet da iueelec namayepi.

₁₂Qaq ỹoqo'oye 'oxotoigui añi 'arquiyaqte da napaxaguenataxanaxac,

qataq 'auachaigui ye 'antoonaxac da nauattonaxanaxac.

₁₃Saishet da 'aỹa'axaañi da 'auapaxagueetac ca nsoqolec,

cha'aye na'aictaxa da qalota da qaiuaxan

qalaxaye saishet da ileu,

₁₄ỹoqo'oye da 'aurolec ca sansatta nhuaxanaguec,

nache ishet da 'anca'alaxateeguesop da nleuaxa.

₁₅'Am ỹalcolec, qom ivita da 'am ỹaanaxanaxaic,

nache nataqa'en aỹem ỹataqta lta'araic qome da ñetonaxac.

₁₆Ỹataqta lta'araic da ñetonaxac,

qom sa'axaỹa da ỹaỹamaqchiyiñi naua 'artaxaỹaxaco.

₁₇Saishet qome da 'anquiỹatega na 'etaxaloxoicpi,

nachaqrato' da huo'o naq 'enec 'anqa'en Ñim Nataxala',

₁₈'auennata'a qome da 'aỹa'ague,

yaqto' da 'anaquitaxac saishet da nlaguiñi.

₁₉'Am ỹalcolec, ỹataqta 'ana'axaỹaxan qome

yaqto' 'am ỹaanaxanaxaic,

qataq 'alotegue da no'on ñecỹaxac.

₂₀Qataq saishet qome da 'aualecta'aguet

na nỹomtapigui na lataxa,

qataq na sa ỹala'ac da lquia'axac,

₂₁cha'aye na nỹomaxaicpi qataq na sa ỹala'ac

da lquia'axac taỹa'a da ỹataqta choxoraq,

qataq ca hualaic ivitta'a da ỹaatañi ca pannaxaic.

₂₂Ỹataqta 'aualaxaguet ca 'arta'a maye 'am lo'onatac,

qataq saishet da 'auo'otan aca 'arate'e qom mashe ỹa'axaina'.

₂₃'Anmitaique qome da 'eesa lataxac, naỹaanec,

napaxaguenataxanaxac qataq da nauattonaxanaxac,

¡qalaxaye saishet qome da 'aumen!

₂₄Ca lta'a ca ñalec no'on da lataxac qataq ỹaanaxanaxaic,

camaye ỹataqta huo'o da ntonaxac qataq machiguiñi,

₂₅¡qaq ỹoqo'oye 'auo'otec qome da ỹataqta

machiguiñi ca 'arta'a qataq aca 'arate'e

qataq 'auo'otec da lamaicỹaxac aca 'am lo'onatac!

₂₆'Am ỹalcolec, ỹataqta aỹem 'aualaxaguet qome,

qataq 'aulotelec da 'am sachaxana ỹecỹaxac,

₂₇cha'aye aca 'alo quisheguetaxai

'eeta'am aca qaỹoqchiguingui nshere,

qataq aca ỹaqa'a 'alo 'eeta'am aca sa lcagui nshere,

₂₈qataq acamaye 'eeta'am ca cachaxaic da dauanaxaatac,

nache ỹo'ot da qalota na ỹalleppi na daqat naqa'en.

₂₉¿Negue't ca nque'eteetac? ¿Negue't ca huo'o da nqui'ic?

¿Negue't ca ncotatac qataq ntogottac?

¿Negue't ca choche qaique'emaqchet da qaica ca ỹasouaxat?

¿Negue't ca toiguilo naua la'ai'te?

₃₀Qomye nacheca ca saishet da ỹaxaañi na lataxa,

qataq ỹe'egueeta'ague na ỹotta'a't lataxa.

₃₁Ỹoqo'oye saishet qome da 'aulotagui da ltogaxa ca lataxa,

huo'otaq da chañi da huetangui aca ỹomaxaqui,

qataq da huesotteguet da lamaic da qanỹomigui,

₃₂qalaxaye yem taỹa'a loga't 'eeta'am ca na'araxanaq,

da denagaxan nache yo'oq na lshenataxanaxa.

₃₃Nache ỹo'ot da 'aula'a na ỹoxosa'a,

qataq da 'auennataxan nache 'anasaxarec naua qauema,

₃₄ivira'a naqa'en da 'eco' qouetalec na laiñi aca auaxai,

qataq 'eeta'am da qonetangui aca notaxaqui,

qataq 'eco' qouetasheguemec na lsheenec aca nalloxolate.

₃₅Nache choche qonetac:

«Aỹem qaiuaxaatac co'ollaxa qalaxaye sañanom,

aỹem qaỹalasheetac qalaxaye sañanom,

qalaxaye qom choche ñelouec

nache qaltaq selaique ca lataxa.»