Proverbios 22

₁Ỹataqta ỹactec da huo'o naq naigui da no'on

na'aqtaguec ca shiỹaxaua qaq saq 'ena'am ca nsallaxa,

qataq da no'on da na'aqtaguec ca shiỹaxaua saq 'ena'am ca qalota oro qataq plata.

₂Ca sallaxanec qataq ca choxoraq caamaye nache 'eeta'a't,

cha'aye caamaye maiche lo'onataqa Ñim Nataxala'.

₃Ca huo'o na ỹaỹaten da ila'a ca lchec

nache naneltaxaneguet,

qaq ca qaica ca ỹaỹaanapec qalaq nache queta

ime qaq maiche nque'etaxangui camaye.

₄Da qaica ca na'amaqchec qataq da huo'o naq 'enec qanqa'en Ñim Nataxala',

nachera da chegaqaigui da nsallaxa,

ño'oxoyec qataq da nca'alaxa.

₅Na qauemaicpi qalaq huetangui ca llec ana ỹaxat qataq ana nqoinapi,

qaq ca ntela'a da nachaalataxac qalaq ishet da dashelec anamayepi.

₆'Auapaxaguenec qome ca nogotolec da no'on ñecỹaxac,

yaqto' qom ivita da ỹa'axaiqui nache saishet da ỹaxanec.

₇Ca sallaxanec ỹo'ot da lalamaxat na choxoraqpi,

qaq ca 'aalaxanaxaic

qalaq nache na'aco' cam ỹa'aalaxanaxan camaye.

₈Ca ỹaañi ca qauem qalaq maiche nqat ca chegaqaigui camaye,

nache Ñim Nataxala' irolec ca maiche lhuaxanaxanaxat da nlaxaañi camaye.

₉Ca choxonnataxanaxaic, camaye huo'o da nchoxonnataguec,

cha'aye da huo'o na aloq qalaq nhuaata'ai' na choxoraqpi.

₁₀'auamaqauec qome ca sancherapec

yaqto' imeuo da loquiaxac,

qataq imeuo na cotaxacpi qataq da nsheunaxanaxac.

₁₁Ca nta'a ỹauotec ca huesota da lquiyaqteỹaxac,

qataq ishet da nauochaxaua ca no'o'n naua la'aqtaqa.

₁₂Ñim Nataxala' ỹataqta nauaatalec da naỹaanec,

qalaxaye saipaigui naqa'en na la'aqtacpi ca shepecaic.

₁₃Ca hualaic da nshetaique da sa do'onataxan,

nache 'eeta':

«Huo'o ñi llon netangui na nqa'aic ishet qome da aỹem ỹalauat.»

₁₄Naua la'aqtaqa aca 'alo maye lauañi' ca sa lhua,

'eeta'ama aca ỹataqta qaỹoqchiguingui nshere,

aca nshere maye Ñim Nataxala' tangui naqa'en ca ỹauo'o da nhuaxanaguec.

₁₅Da nhualoxonaxac nachera da huaqta'agueta

naua lhuennataxaco na nsoxoppi,

qalaxaye da qanqateua'a damaye

nache qairolec ca nhuaxanaxanaxat.

₁₆Ca nhuo' na choxoraqpi da yaqto' nquictec da lsallaxa,

huo'otaq ca ỹachet ca sallaxanec,

nache camaye taỹa'a da choxoraq.

₁₇Ỹataqta 'ana'axaỹaxanalo qome naua la'aqtaqa na ỹaanaxanaxaicpi,

qataq 'aulotelec de'era 'am sapaxaguenec.

₁₈Cha'aye damaye ỹataqta 'onaxaic da 'auachaigui da 'antoonaxac,

yaqto' ishet da 'avi'eguelaqtalec da 'anasaqtauec.

₁₉Qaq nagui 'am sapaxaguenec damaye,

yaqto' ishet da 'aupi'iỹa'a Ñim Nataxala'.

₂₀Qaq aỹem, 'am sanema naua treinta ỹiyigui'she na'aqtaqa,

maye huetaiguilo na nqataxacpi qataq nauattonaxanaxacpi

₂₁da yaqto' 'am sapaxaguenec da 'auauatto'n naua 'eesora na'aqtaqa,

yaqto' ishet da ỹataqtegue ca 'arasataxac da huo'o ca 'am inat.

₂₂Saishet da 'aue'enai' da 'anhuo' ca choxoraq souaxat da lachoxoyec,

qataq saishet da choche 'aupataxalec ca lasouaxashet

ca qaica ca iueelec da huetaua'a ca nmit na nasouaxashet,

₂₃cha'aye Ñim Nataxala' ishet da iueelec camaye,

nache Ñimaye deuotaxanec nam hueto'ot ca nhuo' camaye.

₂₄Saishet qome da 'anauochaxaua ca sancherapec,

qataq saishet da 'annaigaxaua ca nogaqaic,

₂₅cha'aye sa iuena'a da 'aulolec da qauem lataxac,

nache 'eco' maiche 'anqoviila't.

₂₆Qataq saishet qome da 'ampa'axaalec da 'ausheeten,

aca lavigaxaiste ca ỹaqa'a shiỹaxaua,

₂₇cha'aye da qaca aca 'arsheetenaxanaqte,

nache ishet da ivira'a da qaiuotaxanec ca 'armala', maye 'aro'ochaxala'.

₂₈Saishet qome da 'anqochenaxat

aca togoshaapec la'anaqtepi na 'alhua,

maye ỹa'ayiñi co'ollaxa so hua'au 'arta'alpi,

₂₉Ca shiỹaxaua ỹaỹamaxatchiguiñi ca lo'onataxanaxac,

nache camaye ivitta'a da do'onataxanot na nta'alpi,

qataq saishet da na'aco' ca qaica la'amaqchec.