Da natamnaxac so huo'o da laquicoxo
1'Am Nataxala', ñaq 'aua'axaỹa qome da ñatamnaxac,
ñaq 'am iviro'ot qome da iỹaxanaxac.
2Saishet qome da aỹem 'anqañoxocheesop
da sootapoigui da ỹaquicoxo, ñaq aỹem 'aua'axaỹa
qataq sa 'anaỹaloxon da aỹem 'auasateguet da 'am seỹaxana.
3Cha'aye da ñachaalataxac nquicta'a't da imeuo
'eeta'am na lmala'q qataq naua ipi'ineqa 'eroiguilo 'eeta'am ana poqo.
4Añi iquiyaqte qalaq nquicta'a't da la'añaxac,
'eeta'am aca huoue da nquicta'a da deqaqa,
nache ivitta'a da qaica ca isoxo da iquia'axac.
5Na ỹo'oc qalaq lapaxagueta naua ipi'ineqa,
souaxat da lta'araic ỹachotaxac.
6Nache sheeta'am aca chiyet da hueta'a ca toolec 'alhua,
qataq aca huoqo' da hueta'a ca mashe nlachiguiñi.
7Saishet da sañoxot da so'oche sheeta'am ca qoỹo maye ndauec,
da netalec na pa'asheguem ca nỹec lapo'.
8Qaq 'enauaque naua na'axa'te
da aỹem inogoqchettac na ñepa'aguenaxauapi,
nache ivitta'a da do'ogoxona da ỹe'enaxat da desheunaxaatac.
9Nache ỹo'ot da sachectac na alo 'eeta'am aca nauole,
qataq naua ỹache' ỹaleeguet na ỹaquip.
10Qaq souaxat da 'aralemataic qataq da 'arayeloxo,
nache aỹem 'auacoosop da aỹem 'auasaxauec.
11Da ñachaalataxac 'eeta'am na lpaqal da jec,
qataq 'eeta'am aca huoue da nquicta'a da deqaqa.
12Qalaxaye 'Am Nataxala', da 'aro'onataxanaxac chochaq tatec,
da 'are'enaxat qalaq nache 'eetai' qome da nhuennataxat.
13Qaq da 'anachaañi qome nache huo'o da
'archoxonnataxanaxa ye Sión,
cha'aye mashe ivita ye laloqo' da 'auchoxoren,
qataq mashe ivita ye laloqo' maye 'icchiguiña co'ollaxa.
14Cha'aye na 'aramaxashecpi
ỹataqta ỹauotec nam coma'pi maye mashe nlaguiñi,
qataq huo'o da nqui'ic da ilotalec na lsoche namaye.
15Qaq huaña nache na ỹotta'a't shiỹaxauapi
qataq 'enauac na nta'alpi ana 'alhua
ỹataqta huo'o naq 'enec naqa'en da llo'oxoyec da le'enaxat Ñim Nataxala'.
16Cha'aye Ñim Nataxala' ỹoltaq no'oxoosheguem qome ye Sión,
nache qaỹauaachigui da llo'oxoyec Ñimaye.
17Qom ilo'oguet da natamnaxac nam qaica ca mpaxattalecpi,
qataq saishet da sa hua'axaỹa da nachoxonnaxac namayepi.
18Qaq qoỹiyiñi qome de'era yaqto' ỹaỹaten
cam shiỹaxauapi maye ñaq naỹa'acna.
Qataq yaqto' ỹo'oxoren qome Ñim Nataxala',
ca nhuo' le'ecpi maye ñaq taỹa'a da ñiguiñi.
19Cha'aye Ñim Nataxala' namatañi co'ollaq hueta'a
ye ỹataqta qaỹoqotcheguema lanataqa'.
Qataq nache netasheguema na piguem da imeteetac ana 'alhua,
20da yaqto' hua'axaỹa da nnoinaxac na noxonecpi.
Qataq da isouec na taỹa'a da nalaataguec,
21da yaqto' qaỹa'axatec da le'enaxat Ñim Nataxala' da huaña ye Sión,
qataq da qaỹo'oxoren Ñimaye da huaña ye Jerusalén
22qom ivita da 'enauac na ỹotta'a't shiỹaxauapi
qataq nam ilotague' namayepi, laỹona't da natamnot Ñim Nataxala'.
23Ñim Lo'onatac 'Enauacna, taỹangui laiñi
naqa'en da ỹecỹaxac da nquigaxaañi da ỹa'añaxac,
nache sa qaỹauec naqa'en da ñachaalataxac.
24Ỹoqo'oye sheeta': «'Am Ñatamnaxala',
saishet qome da taỹangui laiñi 'anqa'en da ñachaalataxac.
Cha'aye naua vi'iye da 'anachaalataxac chochaq tatrec.»
25Cha'aye 'aua'ayiñi ana 'alhua co'ollaq cheta'ague da 'auo'ot 'enauacna,
qataq nache 'am co'ollaxa da 'auo'ot na piguem.
26Qaq namayepi taỹa'a da imeuo,
'am qalaxaye nache qonetai',
'enauac namayepi taỹa'a da lto 'eeta'am ca nogoxot,
qataq 'eeta'am ca nogoxot da 'anaralaxat da lto.
27Qaq 'am qalaxaye nache qonetai',
naua vi'iye da 'anachaalataxac qaica ca loga't.
28Qaq na llalaqpi na 'aramaxashecpi qaica cara qome,
qataq cam chegoxoguetpi namayepi
nache 'eetai' qome da 'am hueto'ot qom na'ayiñi.
