Salmos 103

₁Aỹem semato'ot da ñachaalataxac

da sho'oxoren Ñim Nataxala',

qataq semato'ot da la'añaxac da ñachaalataxac

da sho'oxoren dam qui'itta le'enaxat Ñimaye.

₂Ỹataqta semato'ot da ñachaalataxac

da sho'oxoren Ñim Nataxala',

qataq saishet da secoua'ai ca 'oonolec

na ltaunaxanaxacpi Ñimaye.

₃Cha'aye Ñimaye nacheñi ñi ỹapalaxat 'enauac na ỹasouaxashetpi,

qataq nataren 'enauac na ỹalolaxasat.

₄Qataq nacheñi ñi aỹem nca'alaxateeguesop añi huachiqui,

qataq aỹem ỹanem da lauotaxanaqtaic

qataq da lchoxonnataxanaxa,

₅qataq aỹem ỹanem naxa 'enauac na no'on,

qataq naralaxat da ỹataxac 'eeta'am naqa'en na vi'ic.

₆Ñim Nataxala' nacheñi ñi ỹo'ot ca nalochiguiñi lataxac,

da iueelec 'enauac na nque'etaxaatapigui da nloquiaxanataguec.

₇Da llecỹaxac Ñimaye ỹachaxana co'ollaxa so Moisés,

qataq nam ỹo'otpi co'ollaxa Ñimaye

ỹachaxana so Israel le'ecpi.

₈Ñim Nataxala' ỹataqta sa da'angui da lataxac

qataq choxonnataxanaxaic,

Ñimaye ỹataqta

qaỹoqchiguinguit da lalemataic,

cha'aye lta'araic da lauotaxanaqtaic.

₉Ñimaye saishet da imerauec naua na'axa'te da qomi' nhuogoqtegalo,

qataq saishet da chochaq tatec da layeloxo,

₁₀qataq saishet da ipacchigui naqa'en ca lashiichiỹaxac na qarasouaxashetpi,

qataq na qaye'etaxaloxopi,

₁₁cha'aye ỹataqta lta'araic da lauotaxanaqtaic

'eeta'am na qalochiguiñi piguem da imattalec ana 'alhua,

da ỹauotec cam huo'o naq 'enec naqa'en Ñimaye.

₁₂Qataq qaỹoqta naqa'en da shenaqta na qarasouaxashetpi,

'eeta'am da yo'oxoñi qataq da avit da qaỹoqtache.

₁₃Ñim Nataxala' ichoxoren cam huo'o naq 'enec naqa'en Ñimaye,

'eeta'am ca nta'a da ichoxoren ca llalaqpi,

₁₄cha'aye Ñimaye ỹaỹateeta da qarataxac,

ỹaỹateeta da sachegoxosoxoigui ana 'alhua.

₁₅Da nachaalataxac ca shiỹaxaua 'eeta'am ana huoue,

da dasovi ye na'a'q qalaq 'eeta'am aca huoue no'onaxa lashe,

₁₆qaq da anac na la'at da iraxan acamaye nache qaca naqa'en,

nache qaica ca ỹaỹaten ca taigue acamaye.

₁₇Qalaxaye da lauotaxanaqtaic Ñim Nataxala' chochaq tatec

da huetalec nam huo'o naq 'enec naqa'en Ñimaye.

Qataq da nalochiguiñi lo'onataxanaxac,

nache huetalec qome cam llalaqpi namayepi,

₁₈cam ipacchigui da naỹamaxataxac Ñimaye,

qataq ca sa icoua'ai da ỹo'ot na lamaxasoxonaxacpi Ñimaye.

₁₉Ñim Nataxala' ỹanaña na piguem añi nso'onaxaqui,

qataq da lo'onataxanaxac ilo'ogue 'enauacna.

₂₀Qavio'oxoyiñi qome Ñim Nataxala' qami' namaxashecpi piguem le'ecpi

maye qami' 'añaxaicpi qataq qaupaquiichiguilo naua la'aqtaqa,

qataq qaualaqaigueta naua lamaxasoxonaxaco Ñimaye.

₂₁Qataq qavio'oxoreñi Ñim Nataxala'

'enauac qami' maye nalleppi Ñimaye,

qataq lamaxashecpi maye qauo'ocheetac na 'eetapeguec Ñimaye.

₂₂Qataq ỹo'oxoren qome Ñim Nataxala' 'enauac nam lo'onatacpi Ñimaye,

qataq 'enauac nam pa'aiguelo nam ilotague' Ñimaye.

¡Ayem, semato'ot da ñachaalataxac da sho'oxoren Ñim Nataxala'!