Da ltaunaxanaxac Ñim Lo'onatac 'Enauacna
1'Am 'Aro'onatac 'Enauacna, maye 'am sho'oxoreetac naxa,
saishet da sa 'auasateguet da ñatamnaxac.
2Cha'aye na qauemaicpi qataq shepecaicpi, aỹem dataỹa'aguet,
ỹauota'aisalo naua saq 'e'n la'aqtaqa da aỹem detaqtega,
3aỹem nquiỹa da aỹem detaqtega namayepi,
qataq qaica ca sasouaxat qalaq aỹem iloquiaxaatac.
4Da ỹauotaxanaqtaic namayepi
qalaq nmeneguet naqa'en da lsheunaxanaxac,
qalaxaye aỹem ñatameetac.
5Aỹem so'otec da no'on qalaq namayepi aỹem ỹo'otec da qauem,
qaq namayepi aỹem ỹauotec taxa qalaq nda'a't da aỹem nquiỹa.
6Ñaq 'auo'ot da nmit 'anqa'en namayepi ca qauemaic,
nache que'eca qauemaic ỹauo'o ca nhuaxanaguec cam huo'o da lasouaxashet.
7Yaqto' camaye ỹa'axat ca lasouaxashet namayepi qom qanmit,
qataq naua maiche la'aqtaqa nachenaua nam ỹo'o't ca nhuaxanaguec.
8Qataq sa qaỹauec qome da nachaalataxac,
nache da lo'onataxanaxac talec qome ca ỹaqa'a.
9Qataq na llalaqpi qaica qome ca lta'a,
qataq pa'ai aca lhua.
10Nache chochaq tatacra' ca llalaqpi qataq dashelaxaatac,
qataq ca'ai qanqa'en ca mashe nlaguiñi lma' da nmitaique ca aloq.
11Nache ca lavigaqtaxanaxala' ỹacona qome na logoxoshetpi,
qataq ca ỹaqa'a ca chegaqa'ague decachiỹa na la'añaqtegueshecpi.
12Qataq qaica ca nqouaguec,
qataq qaica ca ichoxoren na llalaqpi maye saploqpi.
13Qataq nmichiguiñi qome 'enauac na chegoxoguetpi,
qataq qaỹapalaxat qome da le'enaxat qom huo'o ca dalaxaic ñalaqpi.
14Qataq Ñim Nataxala' saishet qome da icoua'ai na lasouaxashetpi so lta'a,
qataq saishet da icoua'ai na lasouaxashetpi aso late'e.
15Qataq Ñim Nataxala' saishet qome da icoua'ai,
qataq Ñimaye ỹapalaxat qome da le'enaxat maye huetalec ana 'alhua.
16Souaxat da icoua'ai da ỹo'ot da nchoxonnataxanaxa,
qataq icaatac nache iviraxatta'a da ỹalauat na choxoraqpi,
qataq na huo'o da nque'eenaxac qataq na huo'o da lhuenaxanaxa.
17Qaq souaxat da nqopita da lsheunaxanaxac,
nache de'era lsheunaxanaxac maiche talec.
Qataq souaxat da saỹaconeguet da nchoxonnataxanaxa,
nache damaye ca'ai somaye.
18Qataq nqopita da 'eco' alogo da ỹaatrañi da nsheunaxanaxac,
nache damaye quigui da lo'ocỹaxac 'eeta'am na 'etaxat
qataq 'eeta'am na aceite da quiguilo naua lpi'ineqa,
19qataq 'eeta'am ca lapo' da napotaña,
qataq 'eeta'am ca nsaataxaqui da ỹaxatchiguiñi 'enauaque naua na'axa'te.
20Qaq 'era da 'eetec qom isheeten Ñim Nataxala' na aỹem ipa'agueetac,
qataq nam qauema naua la'aqtaqa da aỹem detaqtega.
21Qalaxaye 'Am Nataxala',
aỹem 'auaỹamaxatta qome souaxat da 'are'enaxat,
qataq aỹem 'anca'alaxatec souaxat da 'arsoxoyec
qataq da lta'araic 'arauotaxanaqtaic.
22Cha'aye aỹem huo'o da iuogoxo qataq da iuenaxanaxa,
qataq añi iquiyaqte que'emaq.
23Qataq sheeta'am ca lpaqal da nquicta'a da pal,
qataq aỹem ỹache na la'at sheeta'am aca shiiquioxoi.
24Qataq naua illecte nquictrañi da la'añaxa'c
souaxat da qaica ca sachec,
qataq na ỹo'oc lapaxagueta naua ipi'ineqa.
25Nache namayepi aỹem ne'eetapigui,
qataq da aỹem ila'a qalaq iconnaxaatac na lqaic.
26'Am Nataxala' maye 'Am Ñatamnaxala', ñaq aỹem 'autauan,
qataq aỹem 'anca'alaxatec souaxat da 'arauotaxanaqtaic.
27Yaqto' qaỹaỹateeta de'era 'Am Nataxala',
da maiche 'am 'auo'ot damaye.
28Ỹoqo'oye na'aictoxo' namayepi da aỹem isheueetac,
qalaxaye 'am aỹem 'auchoxoren qome.
Namayepi ishet da aỹem iloquiaxan,
qalaxaye huo'o qome da la'aloxo,
cha'aye ne'ena 'aramaxashec huo'o qome da ntonaxac.
29Qaq na aỹem ipa'agueetac qalaq huetalec qome da la'aloxo,
nache damaye 'eeta'am qome ca lapo' da napotaña.
30Qalaxaye aỹem sanot qome da ña'achecỹaxac Ñim Nataxala',
qataq sho'oxoren da salecta'aguet na qalota shiỹaxauapi.
31Cha'aye Ñimaye iueelec na choxoraq,
da yaqto' nca'alaxateeguesop nam ỹo'ottac da nhuaxanaguec namayepi.
