Da iquiyaqteỹaxac ỹataqta lhuotta
1'Am Ñatamnaxala', da iquiyaqteỹaxac ỹataqta lhuotta,
aỹem so'on qome ca ỹo'onec da 'am sho'oxoren.
2Ñaq 'anlouec qome 'am nvique arpa qataq lira,
aỹem, ñelouec qome na dalaxaic ye na'a'q.
3'Am Nataxala', 'am sho'oxoren qome da sootangui na nhuo' le'ecpi,
so'on ca ỹo'onec da salecta'aguet na ỹotta'a't shiỹaxauapi.
4Cha'aye da 'arauotaxanaqtaic ỹataqta lta'araic,
napacalec ye lcata na piguem,
qataq da sa nquic 'arataxac iviro'ot na piguem.
5Qaq 'Am Ñatamnaxala', 'anataỹaña na piguem,
qataq da 'ayo'oxoyec imattalec 'enauac ana 'alhua.
6Qaq da yaqto' huesouec na 'arauotaxat nhuo' le'ecpi,
nache 'anca'alaxatec, 'auauota'a na 'oiguishec 'arhuaq.
¡Ñaq aỹem 'auasateguet!
7Ñim Lo'onatac 'Enauacna detaqa co'ollaq hueta'a
so npe'l maye lanataqa', nache 'eeta':
«Qom sauegaxan nache ñaloqnec na 'alhua ye Siquén,
qataq secolaxatapigui na ca'amapega't 'alhua ye Sucot.
8Aỹem ỹalamaxat ye Galaad qataq ye Manasés,
qaq ye Efraín 'eeta'am aca lapoqte na iqaic,
qaq ye Judá qalaq 'eeta'am aca ỹashelte.
9Qaq ye Moab qalaq 'eeta'am aca iỹoxonaxaqui,
qaq ye Edom qalaq sasaxalec ca ỹapela',
qaq ye Filistea qalaq sa'alaxalec da sauegaxan.»
10¿Negue'tom ca aỹem ỹauega ye huaqta'a't nỹecpi maye huo'o na lpaqtaxat?
¿Negue'tom ca aỹem ỹachaxana ca nqa'aic
maye taỹa'a ye Edom?
11Cha'aye 'Am Ñatamnaxala',
mashe qomi' sa 'auoonegueta,
qataq mashe saishet da 'annaicapegue' na qanalleppi.
12Ñaq qomi' 'autaua'n da sataỹaqa'aguet na qampa'aguenaxauapi,
cha'aye qaica ca naigui da ltaunaxanaxac ca yo'oqchigui shiỹaxaua.
13Ñim Lo'onatac 'Enauacna nacheñi Ñim qomi' ỹanema da soxonaxanaq,
qataq Ñimaye pigui qome na qampa'aguenaxauapi.
