Da ỹataqta qaipi'iỹa'a Ñim Nataxala'
1Ñim Nataxala' nacheñi Ñim ỹe'eguenaxala'.
Qaq ỹoqo'oye qaica ca aỹem 'enapega, 'eeta':
«'Aue, 'avi'iguena añi qasoxonaxa
qoneta'am qome ca qoỹo.
2Ñaq 'aumeten na qauemaicpi da ỹa'añaxaalec na lchecnec,
nache ỹanagui na lquet ana lchecna,
qataq hueta'a ca ỹataqta ỹapochiguiñi,
da yaqto' ỹaỹen na no'on da lataxac.
3Qaq da ivita da nlaguiñi na na'attalec 'enauacna,
nache ¿hua'ago' ca 'eetec ca ỹale maye no'on da lataxac?»
4Qaq Ñim Nataxala' qalaq hueta'a
añi qui'itta lalamaqte atamnaxaqui,
Ñim Nataxala' qalaq netaña ca nso'onqa' na piguem,
nache saishet da nqachegoxoyiñi naqa'en naua la'ai'te,
da nauaatac na shiỹaxauapi.
5Ñim Nataxala' nache nauaatac
na no'on da lataxac qataq na qauemaicpi,
qataq ỹataqta ỹaỹemec na lqopitaxat da nloquiaxac.
6Qataq talec naqa'en na qauemaicpi,
na auot maye 'eeta'am ana 'ettaigui
poqo qataq na 'ettaigui quiquiaxaraic,
qataq anacot ca la'at maye ỹavigaxat 'enauacna,
da ỹanem namayepi da 'itchiguiñi nhuaxanaguec.
7Ñim Nataxala' ỹataqta no'on da lataxac,
qataq ỹauotec ca nalochiguiñi da lataxac,
ỹoqo'oye na huesota da lataxac ishet qome
da ilogui da lashiguiỹaxac Ñimaye.
