Salmos 12

₁Ñaq qomi' 'anca'alaxatrec 'Am Nataxala',

ten mashe qaica so 'amqaanataxanaxaicpi

maye ỹoqta 'am quetegue co'ollaxa,

mashe qaica so shiỹaxauapi maye ỹataqta huesota da lataxac.

₂Ñi 'oonolec qalaq maiche ỹatenachettac ca lỹa,

da detaqa qalaq naua la'aqtaqa ỹataqta ỹagaqnapeguec naqa'en na naigui,

qataq saq ỹataxaleguete naua la'aqtaqa.

₃'Am Nataxala' ỹataqta 'anlaxaañi

qome na shepecaiqa naua la'aqtaqa,

qataq na na'amqaanaxaiqa naua la'aqtaqa,

₄nam 'eeta' naxa da la'aqtac: «'Eeso' ya'

ye huo'o na qorap da yaqto' huo'o ca sañoxotaq,

cha'aye na qara'aqtaqa maye qomi' mpaxaaleguete,

qaq ¿negue't ca ishet da qomi' ỹamaqta'ape?»

₅Qaq 'era da la'aqtac Ñim Nataxala', 'eeta':

«Nagui maye ñachaañi da ñeca'alaxatec

nam qaica ca nyacnataguec, qataq na choxoraqpi

maye ỹataqta qanhuottalec nache sanem namayepi,

da ntaunaguec maye ỹataqta iuattaique.»

₆Naua la'aqtaqa Ñim Nataxala' ỹataqta qui'itte',

'eeta'ama na ỹataqta no'on nda'a't lcat plata,

maye siete da qaỹe'eguelaxaalec da qanqatel da yaqto' qui'itta.

₇'Am Nataxala' ỹataqta qomi' 'antela'alo qome,

qataq nache 'eetai' qome da qomi' 'antelaqna'agueta ne'ena shiỹaxauapi.

₈Cha'aye ne'ena qauemaicpi 'enauac da coleetega't

nache na shiỹaxauapi ỹo'oxoreetac na qauemsat.