Salmos 14

₁Na qaica ca ỹaỹaana'a da lhuennataxac,

'eeta': «Qaica ca Lo'onatac 'Enauacna.»

Ỹoqo'oye 'enauac namayepi ỹataqta saỹaỹama'q

naua ỹo'otta'ape qataq ỹataqta qauema,

namayepi ỹataqta qaica ca choche 'oonolec da ỹo'ottac ca no'on.

₂Nache Ñim Nataxala' maye neto'ot na piguem

namataña na shiỹaxauapi cha'aye huotaique da ila'a

ca 'oonolec da ỹaanataxanaxaic huo'otaq da nmittaique Ñimaye.

₃Qalaxaye 'enauac namayepi quetegueto

naua qauema lleco naua lhuennataxaco,

qaica ca ỹo'ottac ca ỹaỹamaqchiguiñi,

qaica da huo'o ca chochaq 'oonolec.

₄Qaica ca laỹaanataxanaxac na ỹo'ottac na qauem,

nam chectac na ỹalamaxatpi, 'eeta'am naqa'en da chec ca nallec,

nam saishet da nqouagaxaueetega da le'enaxat Ñim Nataxala'.

₅Qaq namayepi qome ỹataqta iviloxolaqchet da lcolanaxa,

cha'aye Ñim Lo'onatac 'Enauacna,

Ñimaye ỹataqta hueta'aguet na no'on da lataxac.

₆Ne'ena qauemaicpi ỹataqta qaica ca ỹanaigui

na 'eetapeguecpi na qaica ca ye,

qalaxaye Ñim Nataxala' ỹataqta ntela'a namayepi.

₇'Onaxaictoxo' da chegoqchiguiña añi qasoxonaxa

ye Sión ca lca'alaxa na Israel le'ecpi.

Qom ivita ca na'a'q da Ñim Nataxala'

qaltaq ỹanem ca no'on llecỹaxac na lalamaxatpi,

huaña qome nache ỹataqta machiguiñi na chegoxoguetpi so Jacob,

'enauac na lalamaxatpi somaye maye da lỹa le'enaxat Israel.