Salmos 141

₁'Am seỹaxanot 'Am Nataxala', sa 'anaỹaloxon qome da 'auanac,

ñaq 'aua'axaỹa da ivilỹaxac da 'am seỹaxanot.

₂Ñaq 'am iviro'ot qome da ñatamnaxac,

'eeta'am ca nchenaxanaxat maye ama na laita,

naua ihuaxaye maye 'am sachaxaato'oto,

qalaq 'eeta'am ca nachetaqtaxanaxat da mashe avit.

₃'Am Nataxala', ñaq 'auauo'o qome ca nauaatac na aỹap,

cam nauaatac da detaqa na aỹap.

₄Saishet qome da 'auasheetem añi iquiyaqte da ỹo'ot ca saỹaỹamaxañi,

saishet qome da salecaua'a 'anqa'en ca saỹaỹamaxañi,

saishet qome da salectaua'a ca lquia'axac ca qauemaicpi.

₅Cam no'on da lataxac no'on qome da ỹo'ot ca ñeuaxanaguec,

qaq camaye nacheca qome ca nchoxonnataxanaxa,

qalaxaye saishet qome da qaicorelec na iqaic ca no'on na laita ncoraxat na qauemaicpi,

cha'aye da ñatamnaxac nache 'eetai' naxa,

da dataỹa'aguet nam qauem maye ỹo'ottac namayepi.

₆Na lataxala'pi namayepi, qom chegoqtelec aca coma' da qaỹasaxauec,

nache ỹaỹaten qome da naua ỹa'aqtaqa ỹataqta 'eesora.

₇Na lpi'inecpi nlagaxattac qome da huetaua'a na laỹe aca huachiqui,

'eeta'am da qanqalagoxotsheguem na 'alhua.

₈'Am Nataxala', 'am selotot,

cha'aye 'am hueto'ot da ñaquitaxac, saishet qome da aỹem qoca'ai.

₉Aỹem 'anca'alaxateeguesop qome ana nqoinapi maye qoỹanangui na ỹec,

anam lqoinapi na qauemaicpi maye ỹanangui so ỹec.

₁₀Ñaq maiche lpachigui qome na lqoinaxanaxatpi na qauemaicpi,

aỹem qalaq nache ashecta qome.