Salmos 148

₁¡Qaỹo'oxoren qome Ñim Nataxala'!

¡Qavio'oxoyiñi qome Ñim Nataxala', qami' maye qoviito'ot na piguem!

¡Qavio'oxoyiñi qome da qoviita'a na qaỹoqotcheguemec!

₂¡Qavio'oxoreñi 'enauac qami' maye qami' lamaxashecpi Ñimaye!

¡Qavio'oxoyiñi 'enauac qami' maye qami' nalleppi Ñimaye!

₃¡'Am nala', qataq 'am ca'agoxoic, qavio'oxoyiñi qome Ñimaye!

¡Qami' huaqaañipi maye qami' 'ettaiguipi, qavio'oxoyiñi qome Ñimaye!

₄¡'Am piguem maye 'am qaỹoqotcheguemec, 'avio'oxoren qome Ñimaye,

qataq 'am 'etaxat maye qouetalec nam piguem!

₅Qavio'oxoyiñi qome da le'enaxat Ñim Nataxala',

cha'aye Ñimaye co'ollaq ỹan da la'aqtac, nache yo'oq 'enauacna,

₆Ñimaye ỹa'ayiñi 'enauac namayepi qaq nache sa deraỹai' naqa'en,

qataq lapaxañi da lqataxac maye saishet da qanaralaxat.

₇Qavio'oxoyiñi qome Ñim Nataxala', qami' maye qoviitalec ana 'alhua,

qami' lta'araicpi shiguiỹacpi maye qoviitangui ana auaxai,

qataq 'am qaỹoqchiguingui auaxai.

₈Qataq na nqashelgaxa, lache, aloñi qataq na sheue,

qataq na lta'araic la'at maye ỹalaxaguet da namaxasaguec.

₉Ana qasoxonaxapi, ana lcomaraxalatepi,

ana qo'oipaqpi maye huo'o ana ala qataq 'enauac ana cedropi.

₁₀Na shiguiỹacpi huauec qataq na ishet da nlo,

na maỹopi, qataq na hualectapigui'pi.

₁₁Qataq na nta'alpi maye netalec ana 'alhua,

'enauac na ỹotta'a't shiỹaxauapi, qataq nam nataxala'pi

qataq na nta'alpi ana'ana 'alhua.

₁₂Na nsoxoppi qataq na qa'ampi,

ỹa'axaiquipi qataq na ñaqpiolec.

₁₃Qavio'oxoyiñi qome da le'enaxat Ñim Nataxala',

cha'aye nacherata da le'enaxat Ñimaye da Nataỹaña 'Enauacna,

da llo'oxoyec imattalec na piguem qataq ana 'alhua.

₁₄Ñimaye ỹanem co'ollaxa da la'añaxac na lalamaxat nhuo' le'ecpi.

Qaq ñaq ỹo'oxoren qome 'enauac na pe'etegapi Ñimaye,

na Israel le'ecpi maye sa iỹotaique Ñimaye.

¡Qaỹo'oxoren qome Ñim Nataxala'!