Salmos 17

₁'Am Nataxala', ñaq 'aua'axaỹa qome da ñachoxonnaxac,

qataq 'aulo'oguet da ñatamnaxac cha'aye saishet da choche satenataxaatac.

₂Nache 'am qome da aỹem 'ampaxaalec,

cha'aye 'am maye 'auaỹateeta ca nalochiguiñi lataxac.

₃Cha'aye 'am 'auaỹateete' naua iuennataxaco,

qataq ye pe qalaq aỹem 'auchemaxattac qataq aỹem 'avi'egueetac,

qalaxaye saishet da 'auanata ca saỹaỹamaxañi de'era ñachaalataxac.

Qataq na aỹap saishet da chegaqaigui ca saỹaỹamaxañi,

₄da sheeta'am na laỹepi ỹalleppi,

cha'aye mashe sheca'ai da loquiaxac

da yaqto' sepacchigui da 'aramaxasoxonaxac.

₅Cha'aye ỹataqta shectegue da 'anqa'aicỹaxac,

qataq saỹauanega da sheca'ai damaye.

₆'Am Ñatamnaxala', 'am seỹaxanot

cha'aye aỹem 'auasateguet naxa,

ñaq aỹem 'auqocha'a qataq 'aua'axaỹa da ñatamnaxac.

₇Ñaq aỹem 'auachaxana qome da llec da 'arsoxoyec,

'am maye 'anca'alaxateeguesop naxa na mpa'aguenaxauapi,

na nmittaique da 'ara'añaxac da yaqto' 'ampaxattalec.

₈Aỹem 'antela'a qome, 'eeta'am 'anqa'en da 'artelaxa naua 'ara'aillalel,

aỹem 'auacho'ot qome na lpaqal naua 'araua't da aỹem 'oxocheesop

₉na qauemaicpi maye aỹem iloquiaxaatac,

qataq na ñepa'aguenaxauapi maye aỹem coleesop.

₁₀Qaq namayepi ỹataqta sa detelaqtaxan,

qataq da detaqa qalaq ỹataqta na'amqaanaxaiqa naua la'aqtaqa,

₁₁qataq saqaỹapeque da nauaata'ape naua iqauaxaqui',

nache iyaqtai' da aỹem ỹasaxaguet na 'alhua.

₁₂Namayepi 'eeta'am na llonpi maye huo'o da lyaxa da huo'o ca loxonec,

da dauanaxaatac hueta'a ca nqañoxotaqa'.

₁₃Ñaq 'anachaañi qome 'Am Nataxala',

ñaq 'anachaateguet namayepi nache 'auamaxañi,

qataq 'auo'ogoxona ca 'ainec da aỹem 'anca'alaxateeguesop ne'ena qauemaicpi.

₁₄'Aurolec qome da 'ara'añaxac,

'Am Nataxala' da aỹem 'anca'alaxateeguesop namayepi,

qataq ca'ai 'anqa'en ana'ana 'alhua maye nhuanaua'a de'era nachaalataxac.

Ỹoqo'oye 'aua'axaỹa'a qome namayepi da yaqto' qalota da lsallaxa,

qataq da ỹataqta icoma' na llalaqpi da deque'etac,

qataq da ivirauga 'anqa'en da lquia'axac ca laualpi.

₁₅Qalaxaye aỹem, qom saỹaten da qaica ca sasouaxat

nache samachiguiñi da selogui da 'arashiguiỹaxac,

na'aictaxa da choche 'am samato'ot da ñelouec.