Da qoỹan da 'achecỹaxac souaxat da noxonaxanaxac
1'Am Nataxala', aỹem ỹataqta 'am sauotec,
cha'aye nache 'am ỹa'añaxac.
2'Am, aỹem 'ampaxattalec qoneta'am aca coma' maye ỹe'eguenaxaqui,
nache 'am, aỹem 'antela'a qataq aỹem 'anca'alaxattauec,
'am, maye nache 'am ipaqtaxanaxat,
qataq ñeqañoxotaqa' maye ỹataqta qaỹoqotcheguemec.
3'Am Nataxala', 'am maye 'itchiguiñi da 'am qaỹo'oxoren,
cha'aye naxa da 'am seỹaxana nache aỹem
'anca'alaxateeguesop na ñepa'aguenaxauapi.
4Da nleuaxa qalaq aỹem lpachigui naqa'en so lqoinaxanaxat,
qataq ỹo'ot da icolanaxa so la'auaxac maye nlaxaañi 'enauacna.
5Qataq na lqoinaxanaxatpi añi huachiqui mashe aỹem loxonec,
nache mashe sootaigui aso lqoina maye dalaataxanapec.
6Qaq co'ollaq souaigui da iuogoxo nache seỹaxana Ñim Nataxala',
seỹaxanot da aỹem itauan Ñim Lo'onatac 'Enauacna,
qaq Ñimaye aỹem hua'axaỹa co'ollaq huaña
añi atamnaxaqui maye lalamaqte,
cha'aye da ỹa'alaxac ishet da ivira'a da hua'axaỹa Ñimaye.
7Qaq huaña nache daỹapec qataq cholaxan ana 'alhua,
qataq daỹa'ape naua na'attaleguete ana qasoxonaxapi,
ỹataqta cholaxa'n souaxat da lalemataic Ñimaye.
8Na lmic qalaq naviigui na lmala'q,
na alap qalaq chegaqaigui na norec maye davigaqtaxanapec,
qataq ana 'ettaigui poqopi.
9Qataq ỹauachigui na piguem nache huenotec,
nache petaigui so sansattec lo'oc.
10Qataq nelec so huo'oi naua laua't le'enaxat querubín,
nache huaỹo quetaigui na la'at.
11Qataq ỹauo'o nqañoxotaxaqui so lta'araic napalaxa
maye coleesop Ñimaye,
qataq ỹauo'o lpe'l so sansattec lo'oc maye nlaqchigui na 'etaxat.
12Nache na le'eraxa Ñimaye chegaqaigui so lo'oc,
qataq aso lache qataq aso 'ettaigui poqopi.
13Ñim Nataxala' maye Nataỹaña 'enauacna
ỹalachigui naqa'en na piguem da lavilỹaxac,
nache lỹatec ana lache qataq ana 'ettaigui poqopi.
14Ñimaye ỹasaxauec na lqashelgaxa
'eeta'am naqa'en ana checna,
nache na ñepa'aguenaxauapi datauec qataq nlagaxattac.
15Huaña nache yo'oqta na pa'aguiñi aso auaxai,
qataq na na'attalec ana 'alhua ishet da qaila'a,
souaxat da 'arvilỹaxac dequichoqtaxan 'Am Nataxala',
qataq souaxat so lta'araic 'ara'at maye 'auasheerelec anamaye.
16Ñim Lo'onatac 'Enauacna ỹauota'a lhuaq
da aỹem ỹacona co'ollaq hueta'a ye qaỹoqotcheguema,
nache aỹem nqatsheguem da sootangui aso qaỹoqchiguingui auaxai.
17Ñimaye aỹem nca'alaxateeguesop
na depa'aguenataxaatac maye ỹataqta 'añaxaicpi
maye aỹem nquiỹatega qataq aỹem napacalec da la'añaxac.
18Qataq aỹem iloquiaxan namayepi co'ollaq sootapoigui da qauem,
qalaxaye Ñim Nataxala' aỹem itauan.
19Aỹem nqatec nache aỹem ỹanalec ye qalochiguiñi iraqa',
aỹem nca'alaxatec cha'aye aỹem ỹauotec.
20Ñim Nataxala' ỹauo'o da ñesheetenaguec
souaxat da qui'itta ỹataxac, qataq souaxat da qui'itte' naua ihua'q,
21cha'aye aỹem ỹataqta shectegue da nqa'aicỹaxac Ñim Nataxala',
qataq saỹauanago' da sheca'ai Ñim Lo'onatac 'Enauacna.
22Ỹataqta 'enauac da ñetoueeta'ac na lapaxañi lataxacpi,
qataq saishet da saxanec na lqataxacpi Ñimaye.
23Da ỹataxac da sooto'ot Ñimaye qalaq ỹataqta qui'itta ñaqa'en,
qataq saishet da so'ot na qauemsat.
24Ñim Nataxala' ỹauo'o da ñesheetenaguec souaxat da qui'itta ỹataxac.
25Qataq 'am Nataxala' 'auchoxoren ca choxonnataxanaxaic,
qataq 'auo'otec da no'on ca no'on da lataxac,
26qataq da qui'itta 'arataxac 'auachaxana ca qui'itta da lataxac,
qalaxaye sa 'anqalaate' da 'anapacalec ca shepecaiqa naua la'aqtaqa.
27Qataq 'am 'anca'alaxatec ca ỹataqta choxoraq,
qalaxaye ỹataqta huetaiya' 'anqa'en na ño'oxonnaxaicpi.
28'Am Nataxala', aỹem 'ettalec 'anqa'en,
'Am Ñatamnaxala', aỹem 'aucoỹattalec da sootaigui na napalaxa.
29Qaq de'era 'artaunaxanaxac ỹo'ot da ishet da seloquiaxan ca alleppi,
qataq ishet da senoxotaueegue da laỹe ca lpaqtaxat ca huaqta'a't nỹecpi.
30Da nqa'aicỹaxac Ñim Lo'onatac 'Enauacna ỹataqta ỹaỹamaqchiguiñi,
qataq naua ỹachaxana'ape Ñim Nataxala' ỹo'o't da aquitaxac,
Ñim Lo'onatac 'Enauacna mpaxattalec nam ỹataqta pi'iỹa'a Ñimaye.
31¿Negue'tom ca lỹa Lo'onatac 'Enauacna ye nacheñita Ñimaye?
Qataq ¿negue'tom ca lỹa qaramta
ye nacheñita Ñim Qanatamnaxala'?
32Qaq Ñim Lo'onatac 'Enauacna,
nacheñi ñi ỹo'ot da ỹa'añaxac, qataq ỹo'ot
da nalochiguiñi da ỹecỹaxac,
33qataq ỹo'ot da sailaua'aguelo naua ichel,
'eeta'am naqa'en ana chegaxango,
qataq ỹo'ot da aỹem qaramchiguiñi
da shectalec na qaỹoqotcheguema 'alhua,
34qataq aỹem ỹapaxaguenec da iloquiaxac,
qataq ỹauo'o da ỹa'añaxac da sauec na checnec maye lcat bronce.
35'Am, aỹem mpaxattalec 'anqa'en da 'arca'alaqtaxanaxac,
qataq aỹem 'anasoqtañi 'auauota'a na 'arhuaq 'oic,
da 'arauotaxanaqtaic ỹo'ot da qaica ca seueetac.
36No'oitegue 'anqa'en da ỹecỹaxac,
ỹoqo'oye naua ichel saishet da salleerauec.
37Co'ollaq secaatac so ñepa'aguenaxauapi
nache ishet da sevi', qataq saishet da ye'eguelaq
co'ollaq saxanaxa da nlachiguiñi ñaqa'en somayepi.
38Ỹataqta huetaiya' ñaqa'en somayepi.
Nache saishet da qaltaq ñisheguem.
Huañi nache 'enauac hueto'oto naua ichel.
39'Am aỹem 'aỹa'anem co'ollaxa da ỹa'añaxac
da seloqui qataq 'auo'otec da aỹem
ỹa'aroto naua l-llecte na 'etaxaloxoicpi,
40qataq dataueeguesop 'anqa'en aỹem na ñepa'aguenaxauapi.
Ỹoqo'oye ishet da ñelaxaañi na aỹem nquiỹatapega.
41Nache iỹaxaataique da qaitauan,
qalaxaye saishet da huo'o ca itauan,
qataq iỹaxaatega Ñim Nataxala' qalaxaye saishet da ỹasateguet.
42Ỹataqta selaxachigui 'eeta'am ñaqa'en
na lsoche na 'alhua maye huaỹoxon naqa'en na la'at,
qataq sapetapigui 'eeta'am ñaqa'en na nshaxa na nqa'aic.
43Aỹem 'anca'alaxateeguesop da l-loquiaxac na shiỹaxauapi.
Qataq aỹem 'aỹa'anem da aỹem lataxala'
na ỹotta'a't shiỹaxauapi ana 'alhua,
qataq aỹem do'onataxaatacot na shiỹaxauapi maye saishet da sauatton.
44Qaq da aỹem hua'axaỹa nache aỹem ỹalaxaguet,
qataq na chegaqauec shiỹaxauapi aỹem ỹo'oxoreetac,
45qaq na shiỹaxauapi maye chegaqauec qalaq nlauchiguiñi,
qataq iviloxol da jec da ca'ai ca lle'eguenaxaqui.
46Ñim Nataxala' maye aỹem mpaxattalec
nache 'eetai' qome da qaỹo'oxoreetac,
qataq 'amaqtaqaic qanqa'en Ñim Lo'onatac 'Enauacna maye ica'alaxaqui.
47Ñim Lo'onatac 'Enauacna nacheñi ñi aỹem iueelec co'ollaxa,
qataq hueto'ot naqa'en aỹem na shiỹaxauapi.
48Ñimaye aỹem nca'alaxateeguesop
da lalemataic na ñepa'aguenaxauapi,
nam saỹalaqpi maye aỹem mpa'aguene'.
'Am Nataxala' 'am maye aỹem 'anca'alaxateeguesop
na shiỹaxauapi maye qaica ca iren.
49Qaq ỹoqo'oye ỹataqta 'am sho'oxoren
da sootaigui na ỹotta'a't shiỹaxauapi,
qataq so'ootac da llo'oxoyec da 'are'enaxat.
50Qataq ỹataqta 'aỹa'anem da lta'araic
loxonaxanaxac na nta'a maye 'arca'aguishec,
qataq nache 'eetai' qome da 'arauoche
na David qataq ca chegoxoguet llalaqpi.
