Salmos 2

₁¿Ta'ainco' ye lliỹa't na ỹotta'a't shiỹaxauapi,

qataq na nhuo' le'ecpi da lapaqtapiguiñi da ỹo'ot na qaica ca naigui?

₂Na nta'alpi qataq na nataxala'pi ana 'alhua,

qalaq huaxaỹa't qome da dataỹa'aguet Ñim Nataxala',

qataq ca nta'a maye lca'aguishec Ñimaye.

₃Nache 'eeta': «Ñaq ñeqataq na lcoñetaxanaxatpi Ñimaye,

ñaq ñesoxoueeguesop na laqtaxanaxatpi.»

₄Qaq Ñim neto'ot na piguem choche lashetac qome,

Ñim Nataxala' qalaq ỹe'enai' qome namayepi.

₅Ime qome, nache dalemata nache iquichoqchet,

nache irolec da lta'araic lalemataic da 'enapega, 'eeta':

₆«Mashe sogote da sauo'o ñi nta'a da ilo'ogue añi Sión,

añim qui'itta ñeqasoxonaxa.»

₇Qaq aỹem sa'axatec qome da lhuennataxac Ñim Nataxala',

cha'aye Ñimaye aỹem 'enapega, 'eeta':

«'Am, nache 'am ỹalec, aỹem 'am seco'oic na na'a'q.

₈Qaq aỹem 'auỹaxanot qome, nache 'am sanem

na ỹotta'a't shiỹaxauapi da yaqto' 'aralamaxatpi,

qataq ivira'alo qome naua loga'te ana 'alhua

da 'am sanem da 'aralamaxat.

₉Nache 'aurolec qome aca 'arashelte lcat,

da 'anlaxaañi na nta'alpi nache ỹataqta 'aulaxachigui,

'eeta'am 'anqa'en aca naco'oña 'alhua.»

₁₀Qaq qami' nta'alpi ỹataqta qauennataxañi qome,

qataq qami' nataxala'pi ana 'alhua,

ỹataqta qanañañiiguet qome da napaxaguenataxanaxac.

₁₁Qataq da qauo'onataxañiỹot Ñim Nataxala',

qalaq ỹataqta huo'o naq 'enec qanqa'eñi,

qataq ỹataqta qauamaichiguiñi da qavio'oxoyiñi Ñimaye.

₁₂Qataq qavio'oxoyiñi Ñim Nataxala',

yaqto' saishet da dalemata, cha'aye saiuena'a

da dalemata nache qaullivi da huangui na nqa'aic,

cha'aye da lalemataic ishet da nque'elaxatta da 'eroigui.

¡Qaq ỹataqta machiguiñi qome ca nmittaique da ltelaxanaqtaic Ñimaye!