Ñim Nta'a maye huo'o da llo'oxoyec
1Ñim Nataxala' lalamaqte 'enauac ana 'alhua,
qataq 'enauac nam huetalec anamaye,
qataq nam netalecpi anamaye.
2Cha'aye Ñimaye lapaxañi co'ollaxa
so lo'oxonaxala' ana 'alhua,
nache na'attalec naqa'en aso auaxai qataq na talapi.
3¿Qaq negue'tom ca ishet da huenotsheguema
añi qasoxonaxa maye lalamaqte Ñim Nataxala'?
¿Qataq negue'tom ca ishet da hueta'a
añi qui'itta atamnaxaqui maye lalamaqte Ñimaye?
4Qomye nachecata ca qui'itte' naua lhua'q
qataq ỹaỹamaqta da lquiyaqteỹaxac,
qataq saishet da natameetacot na nqolacpiolec,
qataq saishet da ỹanot ca la'aqtac
nam saq 'en atamnaxala'pi.
5Qaq camaye nacheca ca talec
ca lchoxonnataxanaxa Ñim Nataxala',
Ñim Natamnaxala' maye lca'alaxaqui camaye,
qataq ỹo'otec ca ỹaỹamaqchiguiñi lataxac.
6Qaq 'era qome da 'eetec 'enauac
na nmitaique Ñim Nataxala', nam ỹataqta
nmittaique da nauane' Ñim Natamnaxala' so Jacob.
7Ña nauatoiguilo qome qanqa'eñi
naua togosha'aape laso'omi.
Nache 'enauac qome da nauattaigui namayepi,
yaqto' inoxoneuo na nta'a maye ỹo'oxoraic.
8¿Negue't que'eca nta'a maye ỹo'oxoraic?
Qomye nacheñi Ñim Nataxala' maye 'amaqtaqaic qataq 'añaxaic,
Ñim Nataxala' maye 'añaxaic da huo'o da alaataxac.
9Ña nauatoiguilo qome qanqa'eñi naua togosha'aape laso'omi.
Nache 'enauac qome nauattaigui namayepi,
yaqto' inoxoneuo na nta'a maye ỹo'oxoraic.
10¿Negue't que'eca nta'a maye ỹo'oxoraic?
Qomye nacheñi Ñim Nataxala' maye Qaica ca Ỹaqalanapec.
Nacheñi ñi Nta'a maye ỹo'oxoraic.
