Salmos 23

₁Ñim Nataxala' nacheñi ñi aỹem iuattague',

qaica naqa'en ca seueetaique.

₂Da aỹem nmataxanec qalaq soua'a naqa'en

ca huaña na no'on 'auaqpi, qataq aỹem

ỹauega ca huaña na ỹe'emaqta 'etaxat.

₃Qataq dalaxaic naqa'en da ỹa'añaxac,

qataq aỹem ỹauecteuga ca nalochiguiñi nqa'aic,

souaxat da llo'oxoyec da le'enaxat.

₄Qaq na'aictaxa da shectangui ca ỹataqta napalñi ca'amegue,

qalaq saishet da huo'o ca she'etaique,

cha'aye 'Am Nataxala', aỹem qoueta'aguet,

aso 'arashelte qataq so 'ampon, ỹataqta aỹem ỹa'añaqche't.

₅Qataq 'auqataxanai' so iquia'axac,

ỹauaachigui 'anqa'en na ñepa'aguenaxauapi,

qataq 'aucorelec na iqaic so coraxat,

qataq ipaxaatapeguelec 'anqa'en aso ỹaquipiaxaqui.

₆Da 'arauotaxanaqtaic qataq da 'arsoxoyec

qalaq aỹem sa iỹotec, 'enauaque

naua na'axa'te da ñachaalataxac,

qaq ñi 'arma', 'Am Nataxala', qalaq

nache 'eetai' qome da soota'a.