Salmos 58

₁Qami' maye qami' 'añaxaicpi,

¿peta'a 'eesa da ỹaỹamaqchiguiñi da huo'o ca qauo'oche,

qataq da qanmiche na shiỹaxauapi?

₂'A'i saishet, cha'aye nda'a't da qauo'oche' naua qauema qarhuennataxacolli',

nache qauo'ocheeteua'a da huo'o da loquiaxac ne'ena 'alhua.

₃Cha'aye na qauemaicpi nale'ena da lle'etaxaloxo

co'ollaq ñaq huetauo, qataq na tenataxanaxaicpi

nale'ena da dasheuec co'ollaq ñaq saxanaxa da ñiguiñi.

₄Cha'aye na lshenataxanaxa namayepi 'eeta'am na na'araxanaq,

qataq 'eeta'am na na'araxanaq maye ỹe'enaxat da sa hua'aqa,

₅da yaqto' saishet da hua'axaỹa da lavilỹaxac ca 'iyaxaic lta'a,

cam sanqalaate' da naueguela't ca nhuennataxa.

₆'Am Ñatamnaxala', ñaq 'aunoxo'n qome naua lhue namayepi,

'Am Nataxala', ñaq 'aunoxo'n qome naua lhue lapiataxanaqte ne'ena llonpi.

₇Yaqto' deqat qome namayepi 'eeta'am na 'etaxat da ỹa'auatec,

nache deqaqa 'eeta'am na 'auaqpi maye huetangui na nqa'aic.

₈Nache nlaguiñi 'eeta'am ana nashiỹo da nlaguiñi na lsallaxataxa.

Qataq 'eeta'am na nogotolec da nsollañi,

nache saishet da nauane' da ilogui na yo'oqchiguiñi.

₉Qataq ỹavic 'eeta'am ana ỹaxat,

qom saxanaxa da dauattonaxan.

Qataq saỹala'ac na la'at da napogosheguem

'eeta'am naqa'en na 'auaqpi darala huo'otaq deqaqta.

₁₀Qaq ca no'on da lataxac

qalaq machiguiñi qom ila'a da huo'o da lvi',

qataq qom huaguilo naua lapia'ate,

na ltago'q na qauemaicpi.

₁₁Huaña qome nache na shiỹaxauapi, 'eeta':

«Ỹataqta 'eesa da huo'o da nsheetenaguec na no'on da lataxac,

cha'aye huo'o Ñim Lo'onatac 'Enauacna maye nmit na huetalec ana 'alhua.»