Salmos 57

₁¡Ñaq aỹem 'auchoxoren qome 'Am Ñatamnaxala',

ñaq aỹem 'auchoxoren qome!

Cha'aye nache 'amta da 'am sepe'etega,

aỹem she'eguenot qome na lpaqal naua 'araua't,

choche ivitta'a da inoxonec na lchecpi.

₂Aỹem ñachoxonnot Ñim Lo'onatac 'Enauacna maye Nataỹaña 'enauacna,

Ñim Lo'onatac 'Enauacna maye aỹem itauaatac naxa.

₃Ñimaye ỹachegoxottot qome na piguem,

da aỹem namaxa da ltaunaxanaxac nache aỹem nca'alaxatec,

aỹem nca'alaxateeguesop na aỹem nquiỹategapi qataq aỹem icaatac,

Ñim Lo'onatac 'Enauacna aỹem namaxa qome da lsoxoyec qataq da 'eesa lataxac.

₄Aỹem sootangui na llonpi,

aỹem coleesop na shiỹaxauapi maye chec na lỹa,

naua lhue namayepi qalaq 'eeta'am ana taquiaxai

qataq ana checna,

qaq na lachaxat 'eeta'am na ỹeelonec maye qaiqueuocta.

₅Qalaxaye, 'Am Ñatamnaxala',

'am, 'anataỹaña na piguem,

da 'ayo'oxoyec imattalec 'enauac ana 'alhua.

₆Na ñepa'aguenaxauapi ỹauo'o aso lqoina da aỹem nqovin,

nache ỹo'ot da qaica ca ỹa'añaxac,

qataq ỹo'ot aso lshere ỹanangui so ñeqa'aic,

qalaxaye namayepi maiche tangui asa'aso lshere.

₇Da iquiyaqteỹaxac ỹataqta lhuotta, 'Am Ñatamnaxala',

da iquiyaqteỹaxac ỹataqta lhuotta da so'on ca no'onec.

₈Ñaq 'anlouec 'am saqcha'a ica'alaxa,

ñaq qanloiuec qami' nviquepi arpa qataq salterio,

cha'aye mashe ñelouec nagui da nvi' na dalaxaic na'a'q.

₉Nache so'on da ỹo'onec da 'am sho'oxoren 'Am Nataxala',

da sootangui na ỹotta'a't shiỹaxauapi maye netaleguete naua 'aleu'.

₁₀Cha'aye da 'arsoxoyec ỹataqta lta'araic, iviro'ot na piguem,

qataq naua 'eesora 'ara'aqtaqa iviro'oto na piguem.

₁₁Qaq 'Am Ñatamnaxala', 'am qonetalec na piguem,

qaq da 'ayo'oxoyec qalaq imattalec 'enauac ana 'alhua.