Na 'aro'onatacpi ỹataqta ỹo'oxoraq
1Ỹataqta qauamaichiguiñi da qavio'oxoyiñi Ñim Lo'onatac 'Enauacna,
'enauac qami' maye qoñiitalec ana 'alhua,
2qauo'oñi na no'onecpi maye ỹo'ot da llo'oxoyec da le'enaxat Ñimaye,
qataq qauo'oñi na no'onecpi maye ỹo'oxoraicpi.
3Qoñiita': «Na 'aro'onatacpi ỹo'ot da na'aalaxa.
Qaq souaxat da 'ara'añaxac,
nache na 'ampa'aguenaxauapi huañi,
souaxat da lcolanaxa da qoneta.
4Qataq 'enauac na netalec ana 'alhua 'am natamnot,
qataq ỹo'ootac na no'onecpi da ỹo'oxoren da 'are'enaxat.»
5Ñaq qauanaqui qome da qaumichiñi na lo'onatacpi Ñim Lo'onatac 'Enauacna,
maye ỹo'ot da na'aalaxa maye ỹo'otec na shiỹaxauapi,
6cha'aye ỹo'otec aso auaxai da deqaqtelec naqa'en na 'alhua,
nache so sachegoxosoxoguet qarta'alpi petañi da ỹa'axasoxoolec se'eso tala,
ỹoqo'oye ñetonaqtapeguec Ñim Lo'onatac 'Enauacna.
7Qaq de'era la'añaxac nache 'eetai' naqa'en da ilotague' 'enauacna,
da lmeenaxanaxac nauaatalec naqa'en na ỹotta'a't nhuo' le'ecpi,
yaqto' na saishet da ỹalaq saishet da nachaata'aguet Ñimaye.
8¡Qami' ỹotta'a't nhuo' le'ecpi, qavio'oxoyiñi Ñim Qanatamnaxala'!
Ỹataqta qana'axanñiqui na no'onecpi da qavio'oxoyiñi Ñimaye.
9Cha'aye Ñimaye nache 'eetai' naqa'en da ñeca'alaqtauec,
qataq saishet da souaqañi naqa'en.
10'Am Qanatamnaxala', qomi' 'auo'oteque da qañe'eguenataguec,
da yaqto' qomi' 'auqui'itaxatte', shenaqta'am 'anqa'en na lcat plata.
11Qomi' huaiguilo 'anqa'en so naleguec,
qataq qomi' 'auasaxaleguete so qapa'atta qaya'ac.
12Qataq 'aua'aqta'a da camachaqca ca qomi' petapiguilo,
nache qolaqtaigui 'anqa'en na 'etaxat qataq na norec,
qalaxaye huo'o 'anqa'en da qardaqa'.
13Qaq senoxonoigui qome añi 'aralamaqte atamnaxaqui,
nache 'am sanot aca savigaxat ỹachetaqtaxanaqte,
yaqto' sepacchiguilo naua ỹa'aqtaqa maye 'am sanoto co'ollaxa,
14naua ỹa'aqtaqa maye 'am sachaxanapecoto,
co'ollaq souaigui so lchec.
15'Am sanot qome aca nachetaqtaxanaqte qaỹavigaxatta,
maye sachegoxotaigui na ỹataqta chaxaraic shiguiỹacpi,
'am sanot ca huaca qataq ca quetaq lhuaraic,
qataq ca savigaxat lapat na qagueta llalec.
16Qauanaqui qome 'enauac da qoñiita,
nam huo'o naq 'enec naqa'en Ñim Lo'onatac 'Enauacna,
qana'axaỹaxañiichigui da qami' sa'axatema da aỹem ỹo'otec Ñimaye.
17Sauota'a ñi ỹachaxat qataq naua ỹa'aqtaqa
da seỹaxana qataq sho'oxoren Ñimaye.
18Qaq taxa da huo'o ca qauem iuennataxac,
nache Ñim Nataxala' saishet taxa da aỹem hua'axaỹa.
19Qalaxaye Ñimaye aỹem hua'axaỹa,
qataq ilo'oguet de'era ñatamnaxac.
20Ỹataqta qaỹo'oxoren qome Ñim Lo'onatac 'Enauacna,
ñim saishet da iquiyaqa'aguet da ñatamnaxac,
qataq saishet da aỹem illapeguem da lsoxoyec.
