Da lauotaxanaqtaic Ñim Lo'onatac 'Enauacna
1¡Qantoñiitapigui' da qauo'oñi da le'enaxat
Ñim Lo'onatac 'Enauacna, maye nacheñi Ñim qara'añaxac!
¡Qaua'alaqaitai' da qavio'oxoyiñiitac Ñim Natamnaxala' so Jacob!
2Qauo'onaxañiita'ai' ana nasaquiaxanata da qauo'oñi na no'onecpi,
qataq ana nvique arpa, salterio, maye ỹo'oxoraq da l-lamaxa.
3Qataq qauashiiyigui ana peenaq lcoue
da ivita da dalaxaic so ca'agoxoic,
qataq da ivita da nlaqchigui so ca'agoxoic,
maye huetoigui naxa da so'otaq da qarquia'axac.
4Cha'aye nachera da lamaxasoxonaxac
Ñim Natamnaxala' so Jacob maye ỹanem na Israel le'ecpi.
5Qataq nachera da lapaxañi naỹamaxataxac,
co'ollaq naỹamaxate' so José, co'ollaq ca'ai ye 'alhua Egipto.
Qaq aỹem sa'aqchigui so nvilỹaxac maye sa saỹaaneguet, 'eeta':
6«'Am ñeqateeguesop so 'aya'ac maye huetaleguete naua 'arallaco,
qataq naua 'arhuaxaye da yaqto' saqallegueme da ỹache na qapa'atta.
7Qaq co'ollaq huo'o da 'anque'eenaxac
nache aỹem 'aỹaxana nache Aỹem 'am ñeca'alaxatec,
qataq 'am sasateguet co'ollaq sootaigui se'eso lo'oc maye ỹalattapigui,
qataq 'am she'eguen co'ollaq huaña so 'etaxat ye Meribá.»
8Ña qana'axaỹaxañiỹa da iviraqtaxanaxac
qami' nhuo' le'ecpi maye ỹalamaxatpi.
¡Da iyoxo' da aỹem qana'axaỹañiỹa qami' Israel le'ecpi!
9Saishet qome da 'auauo'o ca 'anatamnaxala' chegaqauec,
qataq saishet da 'anatameetacot ca ỹaqa'a atamnaxala'.
10Aỹem, nachaỹem Nataxala' maye 'Anatamnaxala',
maye 'am ñeqateeguesop co'ollaxa ye 'alhua Egipto,
ñaq 'auauachigui na 'ap, nache ỹataqta 'am comaraxaic ñaqa'en.
11Qalaxaye ne'ena ỹalamaxat nhuo' le'ecpi saishet da aỹem hua'axaỹa,
¡na Israel le'ecpi saishet da aỹem ỹalaxaguet!
12Qaq ỹoqo'oye namayepi saxanec da quegue ca maiche 'eetapeguec,
qataq maicheye ca lauela da ỹo'ot.
13¡Qamaq taxa da aỹem na'axaỹaxana ne'ena ỹalamaxat nhuo' le'ecpi!
¡Qataq da quetegue taxa da ñeqa'aicỹaxac ne'ena Israel le'ecpi,
14nache sasaỹaloxon taxa da selaxachigui ne'ena mpa'aguenaxauapi,
qataq sauo'o da nhuaxanaguec nam ipa'agueetacpi namayepi!
15Nache na nquiỹatapega Ñim Nataxala', ỹe'eguenot taxa Ñimaye,
qalaxaye chochaq tatec taxa da nhuaxanaguec namayepi.
16Nache Ñim Lo'onatac 'Enauacna ỹanem taxa
na lalamaxat nhuo' le'ecpi da chectac na ỹataqta no'on trigo,
qataq ỹanem taxa na no'onaxa le'ec
te'esaq lta'a lli'i da yaqto' saishet da iqouat.
