Salmos 83

₁'Am Ñatamnaxala', saishet qome da 'aue'enaxaatai',

qataq saishet qome da 'añe'emaxat qataq da choche 'avi'imaqtom.

₂Ña 'aumeten na 'ampa'aguenaxauapi maye 'am nquiỹatega,

namayepi ỹataqta huotaique da 'am dataỹa'aguet.

₃Qataq ỹataqta sa nqalaate' da lapaxañi na 'eetapeguecpi,

da yaqto' dataỹa'aguet na 'aralamaxat nhuo' le'ecpi,

qataq detaxaỹapigui da dataỹa'aguet na 'ampaxattalecpi.

₄Qataq 'eeta': «Ña qauanaqui da yaqto'

ỹataqta ñelaxataqchiguiñi ne'ena nhuo' le'ecpi,

qaq yaqto' saishet da qaltaq qaiuennatapega da le'enaxat so Israel».

₅Nache namayepi 'eeta'am ca 'oonolec ỹale,

da naỹamaxara't da 'am dataỹa'aguet.

₆Nam Edom le'ecpi maye netaigui na lpe'lpi,

qataq na Ismael le'ecpi qataq nam chegoxoguetpi aso Agar, Moab,

₇Gebal, Amón, Amalec,

qataq na filisteopi, qataq na lma' ye Tiro,

₈nache nataqa'en na asiiriopi da huaxaiguet namayepi,

qataq itaunaua'a nam chegoxoguetpi so Lot.

₉Qaq namayepi 'aue'enaxatchigui qome

da qonetec co'ollaxa so Madián le'ecpi,

qataq da qonetec so Sísara qataq so Jabín

co'ollaq huaña so la'auaxac Cisón,

₁₀soua nlachiyiñi co'ollaq huaña ye Endor,

nache 'eeta'am na huaca la'atec da ỹaleeguet na 'alhua.

₁₁Qaq nache qonetec qome na nalleppi 'amaqtaqaicpi,

da qonetec co'ollaxa so Oreb qataq so Zeeb,

qataq 'enauac na llalaqpi na nta'alpi,

'aue'enaxatteguet da qonetec co'ollaxa so Sébah qataq so Salmuná,

₁₂maye nshetaique da ỹauo'o lalamaxat na 'auaqpisat na 'alhua,

maye lalamaxat Ñim Lo'onatac 'Enauacna.

₁₃'Am Ñatamnaxala', ñaq huaỹoxon qome

'anqa'en namayepi 'eeta'am ana huoue,

qataq ana qo'oipaq laue deqaqta maye ỹaỹoxonaqchet na la'at,

₁₄qataq na norec da ỹavigaxat na aviaq,

qataq na norec le'eraxa da ỹavigat ana qasoxonaxapi,

₁₅ña 'aucanapec qome namayepi,

'aurolec na la'at lta'araic qataq 'aucolanaqchet qome

'auroleguete naua la'a'che lta'al.

₁₆Ñaq 'auo'ot qome da la'aloxo namayepi, 'Am Nataxala',

yaqto' namayepi ishet da iỹaxana da 'are'enaxat.

₁₇Qataq chochaq tatec qome 'anqa'en de'era la'aloxo namayepi,

qataq nache lỹachiguiñi' qome de'era la'aloxo qom ileu.

₁₈Yaqto' namayepi ỹaỹateeta da nache 'Am Nataxala',

qataq da nache 'amta da 'Anataỹaña 'Enauacna,

maye 'aulo'ogue 'enauac ana 'alhua.