Ỹataqta 'onaxaic ye 'Arma' 'Am Nataxala'
1Ỹataqta 'onaxaic ye 'arma',
'Am Nataxala' maye Qaica ca 'Auqalanapec.
2Ỹataqta huo'o da iyaxa qataq da ña'añaxataxac,
da sauotaique da soota'a ye nqasoxoc añi atamnaxaqui maye 'aralamaqte.
Qataq imauec da iquiyaqteỹaxac da so'onaxaato'ot,
Ñim Lo'onatac 'Enauacna maye chegoqo'ot da nca'alaxa.
3Cha'aye ivira'a na qoỹopiolec maye nỹec le'ecpi qataq na payogotolec,
ishet da ỹanata na lanataqa' da naña naqa'en ana nca'atoxonaxalatepi,
nache ỹo'ot na lpata'c da netangui naqa'en na llalaqpiolec,
'Am Nataxala' maye Qaica ca 'Auqalanapec,
'am Ita'a maye Ñatamnaxala'.
4Qaq ỹataqta machiguiñi qome na hueta'a
añi atamnaxaqui maye 'aralamaqte,
nam queto'ot da 'am ỹo'oxoreetac.
5Ỹataqta machiguiñi na 'am ỹachegoxotchigui da ntaunaguec,
nam nshetaique da tasheguema ye Sión.
6Qaq namayepi da ỹa'axasoxoolec ye ca'amegue le'enaxat Noinaqa',
nache nañigui naqa'en da huaña na npaxaatasheguem 'etaxat,
qataq na auot nlaqtelec naqa'en da nchoxonnataxanaxa,
7nache namayepi nquictauec da la'añaxac,
qaq da huaña ye Sión, nache nauane' Ñim Lo'onatac 'Enauacna.
8'Am Nataxala' maye Qaica ca 'Auqalanapec,
ñaq 'aua'axaỹa qome da ñeqouagaxaunaxac,
'am maye 'Am Natamnaxala' so Jacob,
ñaq aỹem 'aua'axaỹa qome.
9'Am Atamnaxala' maye qomi' 'ampaxattaleguete,
ñaq 'anqouaguec da 'anamata'a ñi 'arca'aguishec co'ollaxa da yaqto' nta'a.
10Cha'aye ỹactec da no'on da choche 'oonolec na'a'q da soota'a ye 'anqasoxoc,
qaq saq 'ena'ama caua mil na'axa'te da sootauga na pa'auec yemaye.
Ỹoqo'oye sepactague' da selotague' ñi lasom ñi lma' Ñim Ñatamnaxala',
cha'aye saq 'ena'am da soota'a ca hueta'a na qauemaicpi.
11Cha'aye Ñim Lo'onatac 'Enauacna maye Nataxala',
Ñimaye qomi' icoỹattaleguete qataq qomi' npaxattaleguete,
Ñim Nataxala' chochaq ỹaatem da lchoxonnataxanaxa,
'enauac nam nalochiguiñi da lataxac.
12'Am Nataxala' maye Qaica ca 'Auqalanapec,
ỹataqta machiguiñi qome nam shiỹaxauapi maye 'am pi'iỹa'a.
