'Am Nataxala' ñaq qomi' 'anca'alaxatrec
1'Am Nataxala', ỹataqta huo'o da 'archoxonnataxanaxa
co'ollaxa ne'ena 'aralamaxat 'alhua,
cha'aye 'avi'eguelaxalec co'ollaxa da 'anauaxaỹaxaasheguem so Jacob.
2Qataq 'auapalaxat da lle'etaxaloxo na 'aralamaxatpi nhuo' le'ecpi,
qataq 'enauac na lasouaxashetpi.
3Qataq 'avia'axaneguet 'enauac da 'aralemataic,
qataq 'anllañi da ỹataqta lta'araic 'annogoxonaxac.
4'Am Atamnaxala' maye qarca'alaxaqui,
ñaq qomi' 'anca'alaxatrec,
ñaq 'avia'axaneguet da 'aralemataic da shenaqta.
5¿Qalqo' chochaq tatec peta'a da qomi' 'aunotegalo?
Qataq ¿chochaq tatec peta'a da 'aralemataic?
6Qataq ¿saishet peta'a da qomi' 'avi'eguelaxatema qome da qanachaalataxac,
da yaqto' na 'aralamaxatpi nhuo' le'ecpi 'am ntootapeguec?
7'Am Nataxala' ñaq qomi' 'auachaxanalo da 'arauotaxanaqtaic,
qataq qomi' taleguete 'anqa'en da 'arca'alaqtaxanaxac.
8Aỹem ña'axaỹaxana qome ca la'aqtac Ñim Nataxala',
cha'aye Ñimaye ỹa'axatem qome da nlagaxayec
na lalamaxat nhuo' le'ecpi, yaqto' namayepi
saishet da ỹe'eguelaxa da lle'etaxaloxo.
9Cha'aye Ñimaye ỹataqta saqaỹapeque da
nca'alaxatec na huo'o naq 'enec naqa'en Ñimaye,
yaqto' da llo'oxoyec nache 'eetai' da hueta'a ne'ena qana'alhua.
10Da nauotaxanaqtaic qataq da 'eesa lataxac nauana't qome,
da nlagaxayec qataq da nalochiguiñi lataxac qalaq napigoqtega't qome.
11Ana 'alhua qalaq ñaxaalec qome da 'eesa lataxac,
qaq da nalochiguiñi lataxac qalaq chegoqtot qome
na piguem da lmeenaxanaxac.
12Ñim Nataxala' qomi' ỹanema qome ca qaraỹamaxa,
nache na qana'alhua huo'o qome da alaỹaxac.
13Qaq da nalochiguiñi lataxac
qalaq hua'auta'ague qome da llec Ñimaye,
nache da lqauaxac ỹo'otegue qome da qanqa'aicỹaxac.
