Salmos 88

₁'Am Nataxala', 'Am Atamnaxala' maye ica'alaxaqui,

ye na'a'q qataq ye pe, 'am seỹaxaatacot da aỹem 'autauan,

₂Ñaq 'auasateguet qome da ñeqouagaxaunaxac,

qataq 'aua'axaỹa da iỹaxanaxac.

₃Cha'aye ỹataqta qalota na qauemsat maye aỹem talec,

nache mashe sootaua'a na laỹe añi huachiqui.

₄Qataq mashe salectaigui qanqa'en na leuaxaicpi,

sheeta'am ca mashe qaica ca la'añaxac.

₅Aỹem qaỹalata'a't, salectaigui na leuaxaicpi,

sheeta'am ca ileuaigui ca alaataxac maye mashe qailareñi,

cam mashe 'aucoua'ai cha'aye saishet da 'ampaxattalec.

₆Nache aỹem 'auasaxangui aca qaỹoqtegue nshere,

acam qaỹoqchiguingui maye ỹataqta napalñi.

₇Qaq ỹataqta aỹem huetalec da 'aralemataic,

nache 'auo'ot da ana lapaxa aỹem iyiiñi naqa'en.

₈Qataq 'auo'otec da aỹem ỹalat na ñauochaxauapi,

qataq da aỹem deqaiga namayepi.

Nache sheeta'am ca ncoñeteguishec maye saishet da datauec.

₉Naua ỹa'ai'te qalaq mashe huotaique da sa nauaayiñi souaxat da ñenoinaxac.

Qaq 'enauaque naua na'axa'te da 'am seỹaxaatacot, 'Am Nataxala',

'am sachaxaato'oto naua ihuaxaye.

₁₀¿Peta'a isheto' da 'auachaxana ca ỹo'ot da na'aalaxa na leuaxaicpi?

¿Peta'a isheto' da 'am ỹanot da na'achecỹaxac na leuaxaicpi?

₁₁¿Peta'a isheto' da qaỹa'axattac

da 'arauotaxanaqtaic da huaña aca huachiqui,

qataq da 'eesa 'arataxac da huaña ye lma' na leuaxaicpi?

₁₂Cha'aye ye huaña na napalaxa,

¿peta'a isheto' da qaỹauatton na 'auo'otpi maye ỹo'ot da na'aalaxa,

huo'otaq na 'auo'otpi maye ỹaỹamaqchiguiñi da lataxac,

da huaña ca 'alhua maye qaica ca qaiuennatapega?

₁₃Ỹoqo'oye aỹem, 'am seỹaxaatacot

da aỹem 'autauan, 'Am Nataxala',

ye nte'eta qalaq 'am ñeqouagaxaueetacot.

₁₄Qalaq ¿ta'ainco' da aỹem 'auo'otan, 'Am Nataxala'?

¿Ta'ainco' ye aỹem 'oxocheesop da 'arashiguiỹaxac?

₁₅Cha'aye nache chegoqchiguiña co'ollaq ñaq aỹem nsoqolec,

da huo'o da iuogoxo qataq huac da seleu,

aỹem 'anamaxa na qalota ñeque'eenaxac

qaq mashe sa ñalo'oguet.

₁₆Aỹem talec 'anqa'en da 'arayeloxo,

qaq damaye mashe aỹem loxonec,

₁₇nache 'enauac ye na'a'q da aỹem coleesop

'eeta'am na 'etaxat,

nache ivitta'a da aỹem ỹapolec.

₁₈Qataq aỹem ca'ai 'anqa'en

na ñauochaxauapi qataq na ỹaỹepi,

qaq nagui nda'a't da ñauochaxaua na napalaxa.