Salmos 95

₁Ña qauanaqui, so'otaq da qantonaxac

da so'onaxanaqto'ot Ñim Nataxala',

so'onaxanaqto'ot Ñim qomi' mpaxattaleguete qataq qarca'alaxaqui.

₂Ñeqo'onaxaua'a Ñimaye da sanqot da qana'achec,

qataq so'onaq na no'onecpi da sho'oxorenaq Ñimaye.

₃Cha'aye Ñim Nataxala' maye Lo'onatac 'Enauacna, Ñimaye 'amaqtaqaic,

qataq 'amaqtaqaic Nta'a maye nataỹaña 'enauac na laỹepi atamnaxala'pi.

₄Naua lhua'q Ñimaye qalaq nlletañi na ỹataqta pa'aguiñi ana 'alhua,

qataq nache lalamaqte ana qaỹoqotcheguemec qasoxonaxapi.

₅Qataq lalamaqte nataqa'en aso auaxai,

cha'aye Ñimaye maiche ỹo'ot co'ollaxa,

qataq ỹauota'ai naua lhua'q co'ollaq ỹo'ot ana 'alhua.

₆Qauanaqui qome, sa'araxayiñi naua qarllecte da sho'oxorenaq,

sa'araqoto naua qarllecte Ñim Nataxala' maye qomi' lo'onataqa.

₇Cha'aye Ñimaye nacheñi Ñim Qanatamnaxala',

qataq qomi' nhuo' le'ecpi, qomi' lalamaqa'ate Ñimaye,

shenaqta'am ana qagueta da qomi' ilotagueto.

Qaq qami' da qaua'aqaiỹa nagui da lavilỹaxac Ñimaye maye, 'eeta':

₈«Saishet qome da qaua'añaxachiiguilo naua qarquiyaqchilli',

da 'eeta'am co'ollaq huaña ye Meribá,

qataq da 'eeta'am so na'a'q co'ollaq huaña ye Masah,

yem huaña ye toolec 'alhua,

₉yem huaña co'ollaq aỹem ỹe'eguen so hua'au qarta'ailpi,

na'aictaxa da ỹauaachigui co'ollaxa nam so'otpi.

₁₀Qaq ivi' soua cuarenta vi'iye da salematatega se'eso shiỹaxauapi,

nache shenapec co'ollaxa: ‹Ne'ena shiỹaxauapi ỹataqta isomtapigui',

qataq saishet da ỹalaxagueta naua ỹamaxasoxonaxaco›.

₁₁Qaq ỹoqo'oye huaigui co'ollaxa so ỹalemataic da san so ỹa'aqtac,

da somayepi saishet qome da inoxoneua'a ye 'alhua

maye sachaxanapeguem co'ollaxa, yem huaña taxa da nmatec ñaqa'en.»