Ñim Nataxala' nacheñi ñi Nta'a
1Ñim Nataxala' nacheñi ñi Nta'a,
ỹoqo'oye 'antonapigui' qome 'am 'alhua,
qataq qami' qalota ỹaqauga 'alhuapiole
qantoñiitapigui' qome.
2Na napalñi lo'oc coleesop Ñimaye,
qataq da nalochiguiñi qataq da no'on lataxac,
nachera da na'attalec da lo'onataxanaxac Ñimaye.
3Na norec qalaq hua'auta'ague da taỹa'ague Ñimaye,
nache ỹavigaxat na mpa'aguenaxauapi maye coleesop Ñimaye.
4Na lqashelgaxa Ñimaye qalaq icoỹarelec ana 'alhua,
nache ana 'alhua co'ollaq ila'a nache cholaxan.
5Qaq ana qasoxonaxapi 'eeta'am ana dapic lapa da quiguiñi,
co'ollaq nachaatec Ñim Nataxala',
maye lalamaqte 'enauac ana 'alhua.
6Na piguem ỹa'axatec da lo'onataxanaxac maye nalochiguiñi da lataxac,
nache 'enauac na nhuo' le'ecpi ỹauaachigui da llo'oxoyec Ñimaye.
7Nache 'enauac na atamnaxala'pi natamnot Ñimaye.
Qaq huaña nache huo'o da la'aloxo 'enauac
nam natameetacot na ne'enaqtac atamnaxala'pi
nam ỹo'oxoreetac na atamnaxala'pi maye qaica ca naigui.
8'Am Nataxala', co'ollaq hua'axaỹa de'era ye Sión nache machiguiñi,
qataq ye huaqta'a't nỹecpi ye Judá ntootapigui'
souaxat naua ỹaỹamaqchiyiñi 'aro'onataxanaxaco.
9Cha'aye 'Am Nataxala', maye 'Anataỹaña 'enauacna,
'am, 'anataỹaña 'enauac ana 'alhua,
qataq 'anataỹaña 'enauac na laỹepi atamnaxala'pi.
10Ñim Nataxala', ỹauotec nam saisheteguet na qauem,
qataq mpaxattalec nam ỹataqta ỹalaxaguet Ñimaye,
qataq ỹeltaxaneguet da lhuaqỹaxac nam qauemaicpi.
11Na yo'oqchiguiñi qalaq talec ca no'on da lataxac,
qataq da namaicỹaxac talec ca ỹaỹamaqchiguiñi da lquiyaqteỹaxac.
12Qaq qami' maye no'on da qarataxaqui,
qantoñiitapeguec qome Ñim Nataxala',
qataq qavio'oxoyiñi da qui'itta le'enaxat Ñimaye.
