So tonaxac maye huo'ot na piguem
1Qaq can ime de'era, nache sa'axaỹa da lavilỹaxac so ỹataqta qalota shiỹaxauapi ỹataqta alam, chemqot na piguem, 'eeta':
«¡'Enauac qome da qaỹo'oxoren Ñim Nataxala'!
Ñim Qarta'a maye Lo'onatac 'Enauacna ỹataqta 'añaxaic,
ỹoqo'oye qomi' nca'alaxatre'c.
Qaq ỹoqo'oye nacheñi ñi lalamaxat
da na'añaxac qataq da ño'oxoyec.
2Cha'aye Ñim Lo'onatac 'Enauacna saishet da depe'enaxan da huo'o ye nmit
qataq ipagaqchiichigui da 'eesa lataxac.
Ỹauo'o da nhuaxanaguec añi ỹataqta lta'araic da lquisheguetaxac
maye ỹapaxaguenec 'enauac na huetalec ana 'alhua,
da natamnot nam qanatameetacotpi maye saq 'en.
Qataq qaỹo'ot da nhuaxanaguec, souaxat da ỹalauat nam lo'onataxanaxanecpi Ñimaye.»
3Ime, qaltaq ñe'eguelaxasheguem se'eso sa'aqtega maye ỹataqta alam nvilỹaxac, 'eeta':
«¡'Enauac qome da qaỹo'oxoren Ñim Lo'onatac 'Enauacna!
Cha'aye na lmala'q nam norec
maye ỹavigaxat ayem ỹataqta lta'araic da lquisheguetaxac,
chochaq tatec da nchetapiguisheguem.»
4Nache soua veinticuatro nqueroxonqa qataq soua cuatro shiguiỹa'c maye nca'altraue'c, soomaye nqapaxanegueta ana 'alhua. Nache 'eetra' da la'aqta'c: «¡Aja', nache 'eetec! ¡'Enauac qome da qaỹo'oxoren Ñim Lo'onatac 'Enauacna!» Ime, nache ỹo'oxoreeta'ape Ñimaye maye nso'ootangui aso nso'onaxaqui da nta'a.
5Nache sa'axaỹa so nvilỹaxac chemaqtelec som hueta'a aso so'onaxaqui, 'eeta':
«¡'Enauac qome da qaỹo'oxoren Ñim Qarta'a maye Lo'onatac 'Enauacna!
¡'Enauac nam huetalec ana 'alhua ỹo'oxoren qome Ñimaye,
nam 'añaxaicpi qataq nam qaica ca la'amaqchec,
qataq nam do'onataxaatacot Ñimaye qataq nam huo'o naq 'enec naqa'en!»
Da ño'oxonnataxanaxac
6Qaq can ime de'era, nache sa'axaỹa da lavilỹaxac so ỹataqta qalota shiỹaxauapi ỹataqta alam, 'eeta'am da l-lamaxa na lta'araic la'auaxac qataq na lta'araic nalataxa, 'eeta':
«¡'Enauac qome da qaỹo'oxoren Ñim Lo'onatac 'Enauacna,
Ñim Nataxala' maye qaica ca ỹaqalanapec,
cha'aye Ñimaye mashe do'onataxan!
7Qaq ỹoqo'oye ỹataqta samaqtapiguiñi qome,
qataq qomi' nlaqchiguilo da qantonaxac, qataq sho'oxorenaq Ñimaye,
cha'aye mashe ivita ye laloqo'
da huaron Ñi Qagueta Llalec.
Añi lhua mashe sogote da naỹamaxattai',
maye nachena nam 'amqaanataxanaxaicpi;
8Ñim Lo'onatac 'Enauacna no'otaxanaxan ỹanaxanaxaangui na no'on nogoxot maye chegaqaigui na lino,
ỹataqta qui'itta qataq qashelectapiguiñi da lyac.»
Qaq se'esoua nogo maye chegaqaiguilo na lino,
naigui dam no'on ỹo'ottac nam lalamaxatpi Ñim Lo'onatac 'Enauacna.
9Nache som namaxashec piguem le'ec aỹem 'enapega, 'eeta': «'Iyiñi qome de'era 'eeta': Ỹataqta machiguiñi 'enauac qome na qaicoyeguen da ỹalectaua'a ca nquia'axac da huaigui ca laronaxac Ñi Qagueta Llalec.»
Nataqa'en aỹem 'enapega 'eeta': «'Era da la'aqtac Ñim Lo'onatac 'Enauacna, qaq Ñimaye saishet da datenataxan.»
10Nache aỹem sa'aroto naua illecte so namaxashec piguem le'ec da yaqto' sho'oxoren, qalaxaye somaye aỹem 'enapega, 'eeta': «¡Saishet da nache qonetec de'era! No'on da 'avio'oxoren qome Ñim Lo'onatac 'Enauacna, cha'aye aỹem nataqa'en so'onataxaatacot sheeta'am 'am, qataq 'enauac nam queto'ot da ỹa'amaqteetac da na'aqtaxanaxac maye chegoqo'ot So Jesús.»
Cha'aye de'era la'aqtaxanaxac So Jesús, maye ỹapaxaguenec namayepi nachera da ỹa'añaqchet na shiỹaxauapi, yaqto' nache queto'ot da ỹa'axattac damaye.
Da lauegaxanaxac so netalec so caaỹo lapagaxaic
11Ime, nache sela'a na piguem da nauatoigui, nache sela'a so caaỹo lapagaxaic. Qaq som netalec le'enaxat «Ipacchiguilo naua la'aqtaqa» qataq «'Eesa», cha'aye somaye ỹataqta ỹaỹamaqchiguiñi da lo'onataxanaxac da nta'a huo'otaq da taỹa ca alaataxac. 12Qaq naua la'ai'te 'eeta'ama na le'eraxa na norec; qaq na lqaic netagui ana ỹataqta qalota naro'o na nta'a, qataq nanettalec so ne'enaxat maye chaqsota Somaye da ỹaỹaten. 13Qaq Somaye soua ỹaatrañi alogo ỹataqta huaguilo na ntago'q, qaq da le'enaxat Somaye, 'eeta': «La'aqtac Ñim Lo'onatac 'Enauacna.» 14Qaq ca'attaueegue Somaye so alleppi piguem le'ecpi, ỹaatrañi naua alogo maye chegaqaiguilo na lino, ỹataqta ỹapaga'q qataq qui'itte', netalec na caaỹo lapagaxaicpi. 15Qaq na alap Somaye chegaqaigui so ỹeelonec ỹataqta ỹaxaraic, naigui da la'aqtaxanaxac maye huo'o da la'añaxac; qaq nacheso se'eso ỹeelonec da chegoqchigui da nauec na ỹotta'a't shiỹaxauapi. Qataq da yaqto' ilo'ogue namayepi irolec da la'añaxac. Qaq Somaye nlom na lli'i ana uva da ỹo'ot na lataxa, qaq damaye naigui da lta'araic layeloxo Ñim Lo'onatac 'Enauacna maye qaica ca ỹaqalanapec. 16Qaq Somaye so lapo' qataq na ltele'eta nache nanettalec so le'enaxat, 'eeta': «Lta'a na nta'alpi qataq Lataxala' na nataxala'pi.»
17Ime, qaq sela'a so namaxashec piguem le'ec petalec añi nala', somaye ỹataqta na'axannec da lỹaxanaxac da iỹaxana 'enauac na maỹopi maye chec na lapat maye huaỹotac, queto'ot na piguem, 'eeta':
«Qauanaqui, qalapoñiỹa't, da yaqto' qaualliquiitaua'a ca lta'araic lquia'axac Ñim Lo'onatac 'Enauacna. 18Yaqto' qolliqui na lapat na nta'alpi, qataq na huataxanaq lta'alpi, qataq nam 'añaxaicpi alaataxaicpi. Nataqa'en qolliqui na lapat na caipi, qataq nam netalecpi; qataq qolliqui 'enauac na ỹotta'a't lapat na shiỹaxauapi, nam huesochiguiñipi qataq na nlatacpi, qataq na 'amaqtaqaicpi qataq nam qaica ca la'amaqchecpi.»
19Ime, nache sela'a so shiguiỹac leguemaxaic qataq na nta'alpi ana 'alhua nnaictague' na nalleppi. Qaq somayepi lapona't, da yaqto' delogui' som netalec so caaỹo lapagaxaic qataq so nalleppi. 20Qaq se'eso shiguiỹac leguemaxaic noxonec, nataqa'en so 'eetega la'aqtaxanaxanec Ñim Lo'onatac 'Enauacna qalaxaye saq 'en maye ỹo'ottac na na'anecpi sa qaỹauanapega, da yaqto' qaỹa'amaqten so shiguiỹac. Qaq se'eso 'eetega da na'aqtaxanaxanec irolec nam saq qaỹauanapegapi da ỹatenachet 'enauac nam nasheeteguet aso la'anaxanaqte so shiguiỹac leguemaxaic, qataq ỹo'oxoreetac so ne'enaqtac maye lqui'i somaye. Qaq se'eso shiguiỹac qataq som 'eetega da na'aqtaxanaxanec, soomaye nache nca'altraue'c qanqa'en da qaỹasaxayingui so lta'araic norec maye huaña da ỹavictac na quiquiaxaraic. 21Ime, nache som netalec so caaỹo lapagaxaic irolec so ỹeelonec maye chegaqaigui na alap da ỹalauat 'enauac so nalleppi so shiguiỹac leguemaxaic. Nache 'enauac nam maỹopi maye chec na lapat ỹataqta lta'araic so lquia'axac da chectac na lapat somayepi.
