Apocalipsis 20

₁Qaq can ime de'era, nache sela'aguet so namaxashec piguem le'ec chegoqtot na piguem, Qaq somaye lasoqta'a so lta'araic ncoñetaxanaxat lcat qataq aso lvinaqte so llegueuo so laponqa' na leuaxaicpi. ₂Qaq se'eso namaxashec, somaye loxonec so shiguiỹac maye 'eeta'am na na'araxanaq som la'atchiguiñi, maye ỹo'ot co'ollaxa da qauem somaye le'enaxat nataqa'en da pa'aguenataxanaxaic, nache icoñerai' mil vi'iye. ₃Nache ỹasaxaña cam laponqa' na leuaxaicpi, qataq ỹapogoña. Ime, nache ivingui aso lvinaqte so lasom qataq itoqoolec aso la'anaxanaqte, da yaqto' so shiguiỹac leguemaxaic saishet da qaltaq nnoxoosheguem da ỹatenachet na ỹotta'a't shiỹaxauapi, choche ivitta'a da inoxoore'c caua mil vi'iye. Qaq qom mashe inoxoore'c que'ecaua vi'iye, nache somaye cara'ac da qaisouec.

₄Qaq can ime, nache sela'a aso so'onaxaquipi. Qaq asomayepi nso'ootangui som qaỹalauatpi co'ollaxa, souaxat da saishet da ỹaxanec da lpi'iỹaxac So Jesús, qataq da la'aqtaxanaxac Ñim Lo'onatac 'Enauacna. Somayepi nacheso so saishet da ỹo'oxoren so shiguiỹac leguemaxaic qataq som ne'enaqtac maye lqui'i somaye, qataq saishet da nasheneguet aso la'anaxanaqte da yaqto' qaỹa'an na latap, qataq na lhuaq. Qataq sela'a somayepi da qaltaq nca'alec, nache Ñim Lo'onatac 'Enauacna ỹami' da lo'onataxanaxaua Ñim Lca'aguishec Ñimaye, choche iviraxattraue'c caua mil vi'iye. _5-6Somayepi nacheso som la'auaxanec da nca'alec; cha'aye somayepi ỹaconeguet da lta'araic nqouagaxa qataq ỹalegoigui nam ỹataqta lalamaxatpi Ñim Lo'onatac 'Enauacna. Huaña, nache saishet da qaỹoqtaique Ñimaye qataq Som Lca'aguishec Ñimaye, qataq lo'onataxanaxaua, choche ivittraue'c caua mil vi'iye. Qaq na laỹepi leuaxaicpi saishet da ỹe'eguelaxalec da nca'alec, choche ivitta'a da ivilde'c caua mil vi'iye.

₇Qaq qom mashe inoxoore'c caua mil vi'iye, nache so pa'aguenataxanaxaic qaisoueeguesop da ncoñetaguec. ₈Nache nnoxoosheguem da yaqto' ỹatenachet na shiỹaxauapi maye hueta'a ye Gog qataq Magog maye naigui 'enauac na ỹotta'a't shiỹaxauapi ana 'alhua. Nache so pa'aguenataxanaxaic laỹona't na nalleppi ne'ena ỹotta'a't shiỹaxauapi da yaqto' nalat naqa'en; qaq namayepi saishet da qaivi' da qanaloqten, 'eeta'am da 'eetec da saishet da ishet da qanaloqten na lsoche na delec maye hueto'ot na loigue aso auaxai. ₉Nache somayepi ỹataqta imauec ana 'alhua da coleeteguelec, qataq qaicoleesop nam lalamaxatpi Ñim Lo'onatac 'Enauacna qataq ye nỹecpi maye lauotaxat Ñimaye, qalaxaye anac so norec chegoqo'ot na piguem, nache ỹavigaxat 'enauac somayepi. ₁₀Qaq so pa'aguenataxanaxaic maye ỹatenachet somayepi, qaỹasaxangui so lta'araic norec maye huaña da ỹavictac na quiquiaxaraic, som huaña da qaỹasaxangui co'ollaxa so shiguiỹac leguemaxaic qataq so 'eetega da la'aqtaxanaxanec Ñim Lo'onatac 'Enauacna qalaxaye saq 'en. Huaña, nache huo'o da nque'eenaxac somayepi chochaq tatec ye na'a'q qataq ye pe.

₁₁Qaq can ime de'era, nache sela'a aso late'erai so'onaxaqui lapagaxai qataq som nso'ootangui asomaye. Huaña, nache ana 'alhua qataq na piguem ỹataqta nlagaxatapec, nache qaica ca ishet da qaltaq ila'a. ₁₂Nache sela'a 'enauac nam ileu co'ollaxa nam qaica ca la'amaqchec qataq na 'añaxaicpi, nachattaua'a aso so'onaxaqui. Huaña, nache qaỹauachigui aso nerepi maye nanettalec nam ỹo'ot ñim 'oonolec shiỹaxaua. Nataqa'en qaỹauachigui aso lỹa nere maye naneraxalate nam qanca'alaxatec qataq chochaq tatec da hueta'aguet Ñim Lo'onatac 'Enauacna. Qaq nam leuaxaicpi qanmit ñi 'oonolec qaipagaqchiichigui nam ỹo'otpi maye nanettalec asa'aso nerepi. ₁₃Qaq nam ileuangui aso auaxai nataqa'en nachaateua'a Ñim Lo'onatac 'Enauacna da yaqto' Ñimaye nmit namayepi, nataqa'en nam huetaigui da lo'onataxanaxac da nleuaxa, nachaateuo da nataqa'en qanmit. Nache 'enauac na leuaxaicpi qanmit ñi 'oonolec qaipagaqchiichigui nam ỹo'otpi. ₁₄Ime, nache so nleuaxa qataq da lo'onataxanaxac somaye qaỹasaxayingui so lta'araic norec. Qaq nam tangui se'eso lta'araic norec, nache chochaq tatec da sa nauane' Ñim Lo'onatac 'Enauacna. ₁₅Qaq nacheye nataqa'en ye qaỹasaxangui 'enauac nam saishet da nanettalec ca le'enaxat aso naneraxalate nam chochaq tatec da nachaalataxac.