1Ime, nache so namaxashec piguem le'ec aỹem ỹachaxana so tala maye chegoqtapoigui da nca'alaxa chochaq tatec. Se'eso tala chegoqteua'a aso nso'onaxaqui Ñim Lo'onatac 'Enauacna qataq Ñim Qagueta Llalec, somaye ỹataqta chauec, 'eeta'am na 'etaxat da ỹataqta qui'itta. 2Qaq nam laiñi so nqa'aic maye laiñiguishec se'eso nỹecpi, nache nacchiguingui se'eso 'etaxat. Qaq naua loiguiye se'eso tala huo'o ana qo'oipaq maye huo'o ana ala ye 'oonolec ca'agoxoic, qaq damaye 'eeta' doce da huo'o ana ala ye 'oonolec vi'i. Qaq ana ala ỹan da nca'alaxa chochaq tatec, qaq ana laue qalaq natannaxanaqte da nataren na lalolaxapi 'enauac na shiỹaxauapi maye huetalec ana 'alhua.
3Qaq yi'iye nỹecpi qaica da hueta'a ca sa ỹaỹamaxaren Ñim Lo'onatac 'Enauacna. Yemaye, nache hueta'a añi nso'onaxaqui Ñim Lo'onatac 'Enauacna qataq Ñim Qagueta Llalec, qaq nam lo'onataxanaxanecpi Ñimaye, nache ỹo'oxoreetac. 4Huaña, nache qanma'ai' da qanauane' Ñim Lo'onatac 'Enauacna. Qaq da le'enaxat Ñimaye, nache nanettalec naua lata'api namayepi. 5Huaña, nache saishet da huo'o ca pe. Qaq nam netaña yemaye saishet da iuen aca lcoỹaraxanaxaqui qataq añi nala', cha'aye Ñim Lo'onatac 'Enauacna maye Nataxala' icoỹattalec. Qaq namayepi nache chochaq tatec da lo'onataxanaxac.
So Jesús ỹachaxanapec da saqaỹaloq da ñe'eguelaq
6Ime, nache so namaxashec piguem le'ec aỹem 'enapega, 'eeta':
«Ne'ena na'aqtacpi ỹataqta 'eesa, qaq namayepi ishet da qaipi'iỹa'a. Qaq Ñim Lo'onatac 'Enauacna maye Nataxala' Ñim ỹanem So Saqcha'a la'añaxac nam la'aqtaxanaxanecpi nacheñi Ñim namaq na lamaxashec da yaqto' ỹachaxana na lo'onataxanaxanecpi nam mashe nayeeta'a da yo'oq.»
Nache So Jesús 'enapeco': 7«¡Ỹataqta qana'axaỹaxañiichiguiñi! ¡Aỹem saqaỹaloq da ñanac! Qaq Ñim Lo'onatac 'Enauacna ỹaalec da nqouagaxa cam ỹalaxalec de'era na'aqtaxanaxac maye nanettalec ana'ana nere.»
8Qaq aỹem Juan sa'aqchigui qataq sauaachigui 'enauac ne'enapi. Qaq can ime da sa'aqchigui qataq sauaachigui, nache aỹem sa'aroto naua illecte so namaxashec piguem le'ec maye aỹem ỹachaxaatega 'enauac ne'ena da sauotaique da ñatamnot. 9Qalaxaye somaye aỹem 'enapega, 'eeta': «Saishet da nache qonetec de'era, 'avio'oxoren Ñim Lo'onatac 'Enauacna, cha'aye 'enauac qomi' lo'onataxanaxanecpi Ñimaye, 'am qataq aỹem qataq na la'aqtaxanaxanecpi, qataq 'enauac nam ỹalaxaguet da la'aqtac Ñimaye.»
10Nataqa'en aỹem 'enapega, 'eeta':
«Saishet qome da 'oxooñi de'era la'aqtaxanaxac Ñim Lo'onatac 'Enauacna maye nanettalec ana'ana nere. Cha'aye mashe saqaỹapeque ye laloqo' da ipacchiguilo naua nanettrañi. 11'Aua'aqta'a ca 'etaxaloxoic da queto'ot da ỹo'ottac ca qauem; qaq ca nshepaxan da ntoonaxac, nache queto'ot da ỹo'ottac nam lataxacpi maye nshepaxan. Qaq cam ỹo'ottac cam ỹaỹamaqchiguiñi, nache 'aua'aqta'a da queto'ot da ỹo'ottac, qaq cam ỹanot da nachaalataxac Ñim Lo'onatac 'Enauacna, nache 'aua'aqta'a da ỹataqta nañanot Ñimaye.»
Nache So Jesús 'enapeco':
12«¡Ỹataqta qana'axaỹaxañiichiguiñi qome! ¡Aỹem saqaỹaloq da ñanac! Nache ñachetac ca nsheetenaxat ñi 'oonolec shiỹaxaua, ipacchigui cam ỹo'ot co'ollaxa. 13Qaq Aỹem maye Nachaỹem la'auaxanec, qataq Aỹem loga't, Nachaỹem maye sa'auchiguiñi qataq sepa'atec.»
14Nam ỹaxaañi da ỹo'ottac na qauem, nache Ñim Lo'onatac 'Enauacna ỹaalec ca nqouagaxa, nache ỹami' da nhuanaua'a da chec ana ala ara qo'oipaq maye chegaqaigui da nca'alaxa maye chochaq tatec. Namayepi ishet da inoxoneua'a na lasompi yi'iye nỹecpi. 15Qalaxaye pa'atauec qome na ỹo'otta'ape naua qauema, qataq na ỹo'ottac da ldanaxanaxac, qataq nam huetapeeguet ana saishet da lhua, qataq na laataxanaxaicpi, qataq nam natameetacot nam saq 'en, qataq 'enauac nam nqopita da ỹo'ot da latenataxanaxac qataq napaxagueetega na qauem.
Nache So Jesús 'enapeco': 16«Aỹem samaq so ỹamaxashec piguem le'ec, da yaqto' da'aqtaxanem 'enauac de'era nam Aỹem ỹa'amaqteetac. Qaq Nachaỹem maye sachegoxoguet so nta'a David. Qataq nache Aỹem huaqaañi yo'oxoñi lashe maye ỹataqta 'eroigui da yo'oxoñitai'.»
17Qaq So Saqcha'a La'añaxac Ñim Lo'onatac 'Enauacna qataq aso huotaique da lhua Ñim Qagueta Llalec 'eeta': «¡Ña 'auanac 'am Qarataxala' Jesús!»
Qataq 'enauac nam hua'axaỹa de'era na'aqtac, qaq nataqa'en 'eeta': «¡Ña 'auanac 'am Qarataxala' Jesús!»
Qaq cam ilem na laquip, qaq da nshapeque da nỹom, qaq no'on da anac, nache nỹomgui ca 'etaxat maye chegaqaigui da nca'alaxa chochaq tatec. Qaq camaye choche qoỹaatem.
18Qaq 'enauac qome na hua'aqchigui de'era la'aqtaxanaxac Ñim Lo'onatac 'Enauacna maye nanettalec ana'ana nere, aỹem seqata namayepi, sheeta': Da huo'o ca nqottenec nam nanettalec ana'ana nere, nache Ñim Lo'onatac 'Enauacna ỹauo'o ca lta'araic nque'eenaxac, iuaxaneque naua napaxaco maye nanettaleguete ana'ana nere. 19Qataq da huo'o ca nqat ca 'oonolec ne'ena la'aqtaxanaxacpi Ñim Lo'onatac 'Enauacna maye nanettalec ana'ana nere, nache Ñim Lo'onatac 'Enauacna saishet da ỹashenem da ỹacona ana ala ara qo'oipaq maye chegaqaigui da nca'alaxa, qataq saishet da ỹashenem da hueta'a ye nỹecpi maye ỹataqta qui'itta, ipacchigui da la'aqtaxanaxac ana'ana nere.
20Qaq som ỹa'axattac de'era 'eeta': «Aja', Aỹem ỹoqta 'eesa da saqaỹaloq da ñanac.»
¡Aja', nache 'eetec! ¡Ña 'auanac, 'am Qarataxala' Jesús!
21Qaq da lsoxoyec So Qarataxala' Jesús, nache 'eetai' da qami' nnaictagueto. Aja', nache 'eetec.
