So Pablo ỹamaxa aso lere so 'amqaanataxanaxaicpi maye netaña ye Roma
1Qami' ñauochaxau' ỹaqaỹa't, maye qoñiitaña na Roma:
Aỹem lo'onataxanaxanec So Jesucristo qataq aỹem lamaxashec, cha'aye Ñim Lo'onatac 'Enauacna aỹem lca'aguishec da yaqto' sa'axatec da no'on na'axaỹaxac maye iqataxaatai' da qaralamaxat.
2-4Ñim Lo'onatac 'Enauacna ỹachaxanapec co'ollaxa da namaq So Llalec. Qaq de'era nache ỹa'axattac so la'aqtaxanaxanecpi maye nanettalec ana nere maye huetalec na la'aqtacpi Ñimaye. De'era no'on na'axaỹaxac ỹa'axat da So Jesucristo anaỹa ana 'alhua, nache chegoxoguet so nta'a David. Qaq So Jesucristo ileu co'ollaxa qalaxaye Ñim Lo'onatac 'Enauacna qaltaq nca'aleeguesop naqa'en da l-leuaxa. Qaq de'era ỹachaxan da So Jesucristo ỹataqta 'añaxaic Llalec Ñim Lo'onatac 'Enauacna. 5So Jesús aỹem ỹachaxana da lsoxoyec qataq aỹem lca'aguishec da yaqto' so'onataxanot da aỹem lamaxashec, cha'aye Somaye huotaique da 'enauac na shiỹaxauapi ana 'alhua ỹalaxaguet qataq ỹa'amaqten Somaye. 6Qaq qami' maye qoñiitaña na Roma, nache qaualliquiitaigui na laỹepi maye ỹa'amaqten So Jesucristo.
7Ñim Lo'onatac 'Enauacna qami' lca'agui'she da yaqto' qauallicỹoigui na lalamaxatpi Ñimaye. Qaq aỹem seỹaxanot Ñim Lo'onatac 'Enauacna maye Qarta'a qataq So Qarataxala' Jesucristo da qami' ỹachaxanalo da lsoxoyec qataq qami' ỹanema da l-lagaxayec.
So Pablo huo'o da lyaxa da namaqtega na 'amqaanataxanaxaicpi ye Roma
8Da sa'auaxaachiguiñi 'eeta': sachegoxotchigui So Jesucristo da sanot da ña'achecỹaxac Ñim ita'a maye Lo'onatac 'Enauacna souaxat ñi 'oonolec da qoñiita. Cha'aye 'enauac na pa'aiguelo ana 'alhua no'on da qana'aqtaguiqui qataq qaỹaỹaten da huo'o da qarpi'iỹaxaqui Ñim Lo'onatac 'Enauacna qataq qaualaqaiguet. 9Aỹem so'onataxaatacot Ñim Lo'onatac 'Enauacna. Sa'axattac da no'on na'axaỹaxac maye na'aqtaguec So Llalec. Qaq damaye so'ottac, cha'aye ỹataqta iquiyaqteỹaxac. Ñim Lo'onatac 'Enauacna nataqa'en aỹem ỹaỹaten da, nache 'eetai' da qami' ñeqouagaxaueetaleguete, 10qataq nache 'eetai' da seỹaxaatacot Ñimaye da huo'otaq aỹem ỹasheeta, nache huaña qome qaq ishet da qami' ñamaqtegalo. 11Ỹataqta huo'o da iyaxa da qami' ñauaneto yaqto' qami' setauaneque cam chegoqo'ot So Saqcha'a Na'añaxac Qui'itta. Yaqto' da qarpi'iỹaxaqui Ñim Lo'onatac 'Enauacna nache 'eetai'. 12Qaq yaqto' ñi 'oonolec da shenaqta ishet da itauan ca lỹa chegoqchigui da la'añaxac da lpi'iỹaxac Ñim Lo'onatac 'Enauacna.
13Qami' ỹaqaỹa't, sauotaique da qami' qauaỹaañita da aỹem ỹataqta qalota da ñeshetaique da qami' ñeqo'onalo da yaqto' qami' ñauaneto, qami' maye qoviita'a na Roma. Qalaxaye sa qoue naxa na danaqtaxan. Huo'o da lta'araic iyaxa da qami' ñeqo'onalo da yaqto' sa'axat da no'on na'axaỹaxac, 'eeta'am da sheetec naua lỹa't 'aleu' yaqto' nquiguec na ỹa'amaqten So Jesús. 14Cha'aye huo'o da ña'aqtac maye saxanaxa da sa'aqtaxanem 'enauac na shiỹaxauapi, na'aictaxa cam ỹaỹaten da naỹamaxataxac, huo'otaq cam saishet da naỹamaxatapec, qataq nam hueto'ot da paxaguenaxac, huo'otaq nam saishet da hueto'ot da paxaguenaxac. 15Qaq ỹoqo'oye aỹem ỹataqta huo'o da iyaxa da ñeqo'onalo qami' maye qoñiitaña na Roma.
Da la'añaxac dam no'on qara'axaỹaxac
16Cha'aye aỹem saishet da she'etac qataq saishet da ñecoqtac da sa'axattac da no'on na'axaỹaxac, cha'aye damaye la'añaxac Ñim Lo'onatac 'Enauacna maye ishet da nca'alaxatec 'enauac nam ỹa'amaqten So Jesús, na'aictaxa da judiopi huo'otaq saishet. 17Cha'aye de'era no'on na'axaỹaxac, qomi' ỹachaxanalo da nalochiguiñi lataxac Ñim Lo'onatac 'Enauacna da ỹaconeguet ca ỹa'amaqten So Jesús. Cha'aye nache 'enapec ana nere maye huetalec na la'aqtacpi Ñim Lo'onatac 'Enauacna maye 'eeta': «Nam ỹaconeguet Ñim Lo'onatac 'Enauacna qataq huo'o da lpi'iỹaxac, nache huo'o da lca'alaxa chochaq tatec.»
'Enauac qomi' huo'o da qarasouaxashet
18Qalaxaye huo'o na shiỹaxauapi 'etaxaloxoicpi maye sa ỹashenem ca lỹa da ỹauatton da 'eesa lataxac maye la'aqtaxanaxac Ñim Lo'onatac 'Enauacna. Qaq Ñim Lo'onatac 'Enauacna, maye neto'ot na piguem ỹataqta dalemataỹa namayepi. 19Namayepi ỹataqta ỹaỹateeta 'enauac nam ishet da qaỹaỹaten maye na'aqtaguec Ñim Lo'onatac 'Enauacna, cha'aye Ñimaye maiche nachaxaata. 20Cha'aye chegoqchigui nam yo'oqchigui lo'onatacpi Ñim Lo'onatac 'Enauacna da ishet da sauattonaq qataq nataqa'en ishet da selaqa'a da la'añaxac. Qaq ỹoqo'oye 'enauac na shiỹaxauapi saishet da huo'o ca nmaxa, 21cha'aye namayepi ỹaỹaten da huo'o Ñim Lo'onatac 'Enauacna, qalaxaye saishet da huo'o ca 'enec naqa'en qataq saishet da ỹami' ca na'achecỹaxac. Nachaqrata da iuennatega dam qaica ca naigui qataq da ỹo'ot ca qauem. 22Namayepi ipettega da 'enauac da ỹaỹaten na lataxac, ỹoqo'oye namayepi ivira'a da sanaỹamaxatapecpi. 23Saishet da ỹo'oxoren ñi 'oonolec qataq 'añaxaic maye Lo'onatac 'Enauacna, maye nache 'eetai' da nca'altauec, nachaqrata da ỹo'oxoreetac na le'enaqtacpi maye maiche lo'onatac: Ne'enaqtacpi maye qaỹe'enaxat da lataxac ca yo'oqchigui shiỹaxaua maye huo'o ca loga't, qataq ivira'a da ỹo'ot na le'enaqtacpi maye lqui'i na maỹopi, qataq na shiguiỹacpi maye cuatro naua lapia'ate qataq na hualectapigui'. 24Qaq ỹoqo'oye Ñim Lo'onatac 'Enauacna hua'axaỹa'a namayepi da ỹo'ot nam qauem maye maiche 'eetapeguec, qaq naua qauema lhuennataxaco ỹauega da ỹo'otec da lo'ocỹaxac na ishet da qaỹa'aguelec nataxac. 25Saishet da ỹo'oxoren Ñim Lo'onatac 'Enauacna maye ỹataqta 'eesa, nachaqrata da ỹo'oxoreetac nam ne'enaqtacpi maye saq 'en, ỹo'oxoreetac na choche lo'onatacpi Ñim Lo'onatac 'Enauacna, qamaq ỹo'oxorenctaxa Ñimaye maye lo'onatac 'enauac namayepi, maye taiguet da chochaq tatec da qaỹo'oxoreetac. Aja' nache 'eetec.
26Qaq ỹoqo'oye Ñim Lo'onatac 'Enauacna hua'aqta'a na shiỹaxauapi da ỹo'ot 'enauac na qauem maye iuennatega. Qaq namayepi huo'o na 'alpi na saishet da quetegue da ỹoqta lataxac ana 'alo da hue'eguet ca ỹale, nachaqrata da hue'eguet aca maiche lỹa 'alo. 27Nataqa'en huo'o na ỹalleppi da lataxac nataqa'en de'era, ỹoqo'oye saishet da hue'eguet aca 'alo, nache quegue da maiche lqopitaxanaqtaic da hue'eguet ca maiche nalleshaxaua. Qaq damaye nache ỹo'ot da lta'araic na'agaxa, qaq nagui namayepi nque'etaxangui da nque'eenaxac da lo'ocỹaxac souaxat naua qauema lhuennataxaco. 28Qaq cha'aye namayepi mashe saishet da ỹauatton qataq ỹalaxaguet Ñim Lo'onatac 'Enauacna, qaq Ñim Lo'onatac 'Enauacna ỹaxanec namayepi da yaqto' ỹo'ot 'enauac na iuennatega maye qaica ca naigui qataq saishet da lataxac. 29Qaq namayepi ỹataqta saishet da ỹaỹamaxañi da lataxac, 'etaxaloxoicpi qataq qopitaxanaqtaqaicpi. Namayepi nataqa'en quiỹaxanaqtaqaicpi, laataxanaxaicpi, loquiaxaicpi, tenataxanaxaicpi qataq na'aqtaqa lo'opi. 30Qataq da detaqtega ca lỹa qalaq sa iyacnapec, qataq nquiỹa Ñim Lo'onatac 'Enauacna, sa iren ca lỹa qataq ño'oxonnaxaic, qataq ipettega da 'amaqtaqaic. Qataq nache 'eetai' da ỹo'ottac na dalaxaic lataxacpi maye qauem qataq namayepi ỹataqta sa ỹalaxaguet na lalamaxat lta'alpi. 31Qataq saishet da nshetaique ỹaỹaten da 'eesa lataxac, qataq saishet da ishet da qaipi'iỹa'a namayepi. Cha'aye namayepi qaica ca ỹauotec qataq qaica ca ichoxoreetac. 32Namayepi ỹaỹateeta da Ñim Lo'onatac 'Enauacna la'aqtac da cam ỹo'ottac ne'enapi, nache taỹa'a da l-leuaxa. Qalaxaye namayepi saishet da nachaqrata da ỹo'ottac damaye, nachaqrata da nataqa'en ntooteguec cam lỹa shiỹaxaua maye ỹo'ot nataqa'en de'era.
