1Qami' ỹaqaỹa't maye qaua'amaqchiñiitac So Cristo, ỹataqta imauec da iquiyaqteỹaxac da huo'o da iyaxa qataq ñeqouagaxaueetacot Ñim Lo'onatac 'Enauacna da Ñimaye nca'alaxateeguesop da nhuaxanaguec na Israel le'ecpi. 2Cha'aye aỹem saỹaten da namayepi ỹataqta lta'araic da lyaxa da do'onataxanot Ñim Lo'onatac 'Enauacna, qalaxaye namayepi sa ỹaỹaten ca 'eetec da qaỹo'onataxanot Ñimaye. 3Cha'aye namayepi saishet da ỹaỹaten da 'oonolec Ñim Lo'onatac 'Enauacna da ishet da ỹapalaxat ca lasouaxashet ca shiỹaxaua. Qaq ỹoqo'oye namayepi npogoxoueetapegue' da huo'o cam ỹo'ot da yaqto' Ñim Lo'onatac 'Enauacna ỹaconeguet namayepi. Qaq saishet da ỹo'ot dam ỹataqta ỹaỹamaxareeta Ñim Lo'onatac 'Enauacna. 4Qaq Ñimaye saishet da qomi' ỹaỹamaxareete' souaxat da salaxasoxoguet na namaxasoxonaxacpi; cha'aye nagui Ñimaye nda'a't da ỹaconeguet cam huo'o da lpi'iỹaxac So Cristo. Cha'aye So Cristo nacheso so loga't nam namaxasoxonaxacpi.
5Qaq de'era 'eetec da huo'o ca ishet da ỹaỹamaxareeta Ñim Lo'onatac 'Enauacna da chegoqchigui na namaxasoxonaxacpi qalaq so Moisés co'ollaq ỹiyiñi qalaq 'eeta': «Ca shiỹaxaua da ipaqueelec 'enauac na namaxasoxonaxacpi, camaye nca'alec chegoqchigui da ỹo'ot ca 'enapec namayepi.» 6Qalaxaye 'era da la'aqtac nam pi'iỹa'a Ñim Lo'onatac 'Enauacna yaqto' Ñimaye ỹaỹamaxareeta namayepi 'eeta': «Saishet da 'autaqtague' da 'arquiyaqteỹaxac da qoneta': ‹¿Negue't ca ishet da taỹot na piguem?›, damaye 'eeta' negue't ca taigue da piguem da yaqto' iỹaxanot So Cristo da huenotec. 7Qataq saishet da qoneta': ‹¿Negue't ca ishet da nqo'ooña ca lma' na leuaxaicpi?›, damaye 'eeta' nqo'ooña na pa'aguiñi da yaqto' iỹaxanot So Cristo da yaqto' ca'ai na leuaxaicpi.» 8Qaq 'era dam 'eetega naua ñiyigui'she maye nanettalec ana nere maye huetalec na la'aqtacpi Ñim Lo'onatac 'Enauacna maye 'eeta': «Naua la'aqtaqa Ñim Lo'onatac 'Enauacna ỹataqta saqaỹapeque naqa'en 'am; netaigui na 'ap qataq añi 'arquiyaqte.» Qaq de'era na'aqtaxanaxac nachera dam qami' ñeraxalo: Da iuen da sepi'iỹaqa'a Ñim Lo'onatac 'Enauacna. 9Cha'aye qami' da qaua'axache So Jesús, da nacheso Som Nataxala', qataq da qarquiyaqteỹaxaqui ỹa'amaqten da Ñim Lo'onatac 'Enauacna nca'aleeguesop naqa'en Somaye da nleuaxa, nache qami' qanca'alaxatreeguesopa da qanhuaxanaguiiqui maye ishet da qami' taleguete. 10Cha'aye da ỹataqta imauec da qarquiyaqteỹaxac da ỹataqta sa'amqaanataxanaq, nache Ñim Lo'onatac 'Enauacna ishet da qomi' ỹaỹamaxareete'; qataq da sa'axataq So Jesús, da nacheso Som Nataxala', nache Ñim Lo'onatac 'Enauacna qomi' nca'alaxatre'c.
11Cha'aye naua ñiyigui'she maye nanettalec ana nere maye huetalec na la'aqtacpi Ñimaye 'eeta': «Ñim Lo'onatac 'Enauacna saishet da ỹo'ot la'aloxo nam ỹa'amaqten Ñimaye.» 12Na'aictaxa da judío le'ec huo'otaq saishet, cha'aye 'oonolec Ñim Lo'onatac 'Enauacna maye Lataxala' 'enauac na shiỹaxauapi, qaq Ñimaye ỹataqta soxoraic qataq itauan 'enauac nam iỹaxanot Ñimaye ca ntaunaguec. 13Cha'aye nataqa'en 'enapec ana nere maye huetalec na la'aqtacpi Ñimaye 'eeta': «Ñimaye nca'alaxatec 'enauac nam iỹaxaatega da le'enaxat.» 14Qalaxaye ¿ca 'eetec ca lataxac da qaiỹaxanot Ñimaye, da huo'otaq saishet da qaỹa'amaqten? Qataq ¿ca 'eetec da qaỹa'amaqten Ñimaye, da huo'otaq saishet da qaỹa'axaỹa da qaỹa'axattac? Qataq ¿ca 'eetec da huo'o ca ỹa'axat cam na'aqtaguec So Cristo? 15Qataq ¿ca 'eetec da huo'otaq huo'o ca da'aqtaxan, da huo'otaq saishet da namaxashec? Cha'aye dam 'enapec naua ñiyigui'she maye nanettalec ana nere maye huetalec na la'aqtacpi Ñim Lo'onatac 'Enauacna, 'eeta': «¡Ỹataqta saq no'onolec da lviraxac nam ndotai' da na'aqtaxanaxac maye ỹo'ot da nlagaxayec, qataq ỹa'axattac da no'on na'axaỹaxac!»
16Qalaxaye saishet da 'enauac da qaỹaconeguet de'era no'on na'axaỹaxac. Qaq ipacchigui da la'aqtac so Isaías co'ollaq 'eeta': «'Am Nataxala', ¿negue'tom ca ishet da ỹa'amaqten da qara'aqtaxanaxac?» 17Qaq ỹoqo'oye ca shiỹaxaua ivira'a da huo'o da lpi'iỹaxac Ñim Nataxala' chegoqchigui da na'axaỹaxana da na'aqtaxanaxac maye na'aqtaguec So Jesucristo.
18Qalaxaye aỹem senataxan, sheeta': ¿Saishet peta'a da huo'o ca huaña da hua'axaỹa de'era na'aqtaxanaxac? ¡'A'i, sogote da hua'aqtega! Cha'aye naua ñiyigui'she maye nanettalec ana nere maye huetalec na la'aqtacpi Ñim Lo'onatac 'Enauacna, 'eeta':
«Naua la'aqtaqa taleguete imauec ana 'alhua,
qataq ivira'alo 'enauaque naua pa'atre'c laỹel ana 'alhua.»
19Qalaxaye qaltaq she'eguelaxalec da senataxan, sheeta': ¿Na Israel le'ecpi saishet peta'a da noma de'era na'aqtaxanaxac? ¡'A'i, namayepi ỹaỹaten! Ye so Moisés hua'auchiguiñi da ỹiyiñi co'ollaxa da la'aqtac Ñim Lo'onatac 'Enauacna maye 'eeta':
Aỹem qome so'otec na Israel le'ecpi da ỹataqta ndaqta'aguet
nam saishet da lauo' le'ecpi.
Qataq so'otec da ỹataqta nquiỹa
nam shiỹaxauapi maye saishet da ỹaỹamaxaren da qaỹapaxaguen.
20Ime, qataq so Isaías ỹataqta qaica ca lyiỹaxac co'ollaq ỹiyiñi da la'aqtac Ñim Lo'onatac 'Enauacna maye 'eeta':
Nam saishet co'ollaxa da Aỹem nmittaique,
qalaq Aỹem ỹanata,
qataq ñachaxana na shiỹaxauapi
maye saishet co'ollaxa da Aỹem denataxaataique.
21Qataq co'ollaq detaxaỹa na Israel le'ecpi Ñim Lo'onatac 'Enauacna ỹachegoxotchigui so la'aqtaxanaxanec Isaías, qalaq 'eeta':
«Ỹataqta ima ye na'a'q da sachaxaatacot da itaunaxanaxac
nam shiỹaxauapi maye qaramchigui qataq sa ỹalaq.»
