1'Oonolec Ñim Lo'onatac 'Enauacna maye ishet da ỹami' da la'añaxac ca shiỹaxaua, qataq nacheñi Ñim ỹami' da damaxasoxon ca nta'a maye qomi' ilotegueto. Qaq ỹoqo'oye iuen da salaxasoxoguet nam nta'alpi. 2Qaq cam sa ỹalaxaguet nam nataxala'pi, nache dataỹa'aguet dam la'aqtac Ñim Lo'onatac 'Enauacna. Qaq cam dataỹa'aguet damaye, nache ỹauo'o ca nhuaxanaguec qome Ñimaye, 3cha'aye nam nta'alpi saishet da icolanaqchet cam ỹo'ottac ca ỹaỹamaqchiguiñi, nachaqcata cam qauem da lataxac. Da qami' qansheetaique da sa qañi'iỹai na nta'alpi, nache iuen da qauo'oche ca ỹaỹamaqchiguiñi, nache namayepi qami' ỹaỹamaxareete'. 4Cha'aye namayepi do'onataxaatacot Ñim Lo'onatac 'Enauacna, da yaqto' qami' ỹa'añaqche't da qauo'oche ca ỹaỹamaqchiguiñi. Qaq da huo'otaq sa qaualaqai, ¡nache qami' ishet da huo'o da qarcolanaqai!, cha'aye nam lainecpi maye ỹachetac saishet da choche llo'oxoraxat. Namayepi do'onataxaatacot Ñim Lo'onatac 'Enauacna, qalaxaye nataqa'en ishet da ỹauo'o ca nhuaxanaguec ca qauemaic. 5Qaq ỹoqo'oye qami' iuen da qaualaqaiguet na nta'alpi. Saishet da nachaqrata da qavicheetega ca qanhuaxanaguiiqui, nachaqrata da qami' qauaỹaañi damaye da ỹataqta ỹaỹamaqchiguiñi. 6Na nta'alpi do'onataxaatacot Ñim Lo'onatac 'Enauacna, qaq namayepi ipagaqchiichigui da lataxac dam lo'onataxanaxac. Qaq ỹoqo'oye qami' iuen da qaushiichiñi añim iỹaxanaique namayepi. 7Qaq ỹoqo'oye iuen da ñi 'oonolec shiỹaxaua isheeten acam iuen da isheeten, da huo'otaq nachañi añi iỹaxanaique ca nta'a huo'otaq aca qalaỹootega't ntaunaxanaqte, huo'otaq cam iuen da huo'o naq 'enec qanqa'en huo'otaq souaxat da huo'o da nauoche.
Da nsoxoyec
8Saishet qome da huo'o ca neto'ot aca qaravigaxaischi, nachaqrato' da lauotaxanaqtaic ñi 'oonolec ca lỹa. Cha'aye ca ỹauotec ca lỹa, nache camaye ỹataqta ipacchigui nam lamaxasoxonaxacpi Ñim Lo'onatac 'Enauacna. 9Cha'aye na nqataxacpi huo'oi naua damaxasoxooleguete maye 'eeta'am de'era, 'eeta': «Saishet da 'ancachetague' aca sa 'arhua. Saishet da qaualaataxañi. Qataq saishet da qaucache. Saishet da qoquiitague' da qarqopitaxanaqtaiqui da qauqopichiita'a ca hueto'ot ca qarỹai.» Qaq ne'enaua namaxasoxonaxaco qataq 'enauac na laỹepi, naamaye imatta't da na'aqtac maye, 'eeta': «Ñi 'oonolec iuen da ỹauotec ca lỹa, 'eeta'am naqa'en da lauotaxanaqtaic da maiche nachaalataxac.» 10Cha'aye cam huo'o da lsoxoyec, camaye saishet da na'aqchet ca lỹa, qaq ỹoqo'oye da sauotaxac na laỹepi shiỹaxauapi, nache qomi' sepagaqtelec 'enauac nam namaxasoxonaxacpi.
Da lle'eguelaxasoxoc So Cristo
11Qaq 'enauac de'era sheetega da qami' iuen da qauloỹa'alo ne'enaua na'axa'te maye souaqtaiguilo, qaq qami' qoviitaigui da 'eeta'am da qauo'ocheeta. ¡Mashe ivita ye laloqo' da qanloiuec! Mashe saqaỹapeque ca na'a'q da Ñim Lo'onatac 'Enauacna qomi' nca'alaxatre'c; ỹataqta 'eesa da saqaỹapeque saq 'ena'am co'ollaq cheta'ague da sa'amaqtenaq So Jesús. 12-14¡Mashe yaqta'a da ivita ye laloqo'! Qaq ỹoqo'oye nagui saxanaxañi da so'otaqtac da qaye'etaxaloxo, cha'aye da qaỹo'ottac damaye, nache 'eeta'am da qanayeetaigui na napalaxa. Nachaqrata da so'otaq ca ỹaỹamaqchiguiñi maye 'eeta'am da qanayeetaigui da yo'oqchiguiñi. Ñellaqañi da qarqopitaxanaqtaic maye qomi' ỹauecta'alo da so'otaq ca qauem, ime, nache ño'onaxataq da qarataxac, 'eeta'am da ima'ape naua na'axa'te da souaqtaigui ye na'a'q. Saishet da ñeqo'onaxa ca naponaxac maye huaña da sa qailo'ogue da nataxac, saishet da qomi' taxaiqa qataq saishet da qomi' quisheguetaxaiqa, qataq saishet da qolaqtague' da qaramanaxanaqtaic, qataq saishet da ñimitaqta'a da loquiaxac, qataq saishet da qomi' ca'alaxanaxaiqa. Nachaqrato' da sa'axasoqta'a So Jesucristo da qomi' npaxattaleguete qataq qomi' itauaata'ape da se'enaxataq da maiche lataxac.
