Saishet da qoquiiteguelec na qara'amqaanataxanaxauaipi
1Qauacoñiiguet qataq qauaỹamaxacheeta nam 'amqaanataxanaxaicpi maye saxanaxa da da'añi da lpi'iỹaxac, damaye 'eeta': nam saxanaxa da ỹoqta ỹaỹateeta na lamaxasoxonaxacpi Ñim Lo'onatac 'Enauacna. Da huo'o ca sa qauaỹamaxayiñi lataxac namayepi, nache saishet da qancotaitague'. 2Cha'aye saloqnaxana, da huo'o ca 'eetega da qaramta da lpi'iỹaxac, nache 'eetega da ỹaỹamaqchiguiñi da camachaqca ca chec, qaq huo'o nam saxanaxa da da'añi da lpi'iỹaxac, nache nda'a't ana nañiguishe laue maye ishet da qanallec ana chectac. 3Qalaxaye nam chec 'enauac nam huo'o, saishet qome da ỹo'otaatac na laỹepi maye lquia'axac de'era. Nache 'eeta'am nataqa'en nam nda'a't ana nañiguishe laue da chectac, namayepi saishet qome da quetapeguelec nam camachaqca ca chec, cha'aye Ñim Lo'onatac 'Enauacna, 'enauac da ỹaỹamaxareeta namayepi.
4Qaq qami' qaica ca qoñiqui da huo'otaq qoquiitapeguelec cam l-latac ca lỹa shiỹaxaua. Cha'aye cam na'aco' cam nlatac, nacheca ca ỹauo'o ca la'aqtac da talec naqa'en camaye da huo'otaq 'onaxaic ca lo'onataxanaxac qalqo' saishet. Qaq 'era da 'eetec Ñim Lo'onatac 'Enauacna da qoñiita, qataq nachaqñita da huo'o da la'añaxac da itauan ñi 'oonolec da ipactelec ca lo'onataxanaxac.
5Qataq huo'o da lỹa saloqnaxana, 'eeta': Huo'o na lhuennataxac da 'eetega da huo'oi naua na'axa'te da saq 'ena'ama naua lỹa't na'axa'te. Qataq huo'o na 'amqaanataxanaxaicpi da 'eetega 'enauaque naua na'axa'te da nache 'eeta'a't. Qaq ñi 'oonolec iuen da ỹataqta ỹaỹateeta cam iuennatega da 'eetega ỹaỹamaqchiguiñi. 6Nam iuennatega da huo'o ye na'a'q maye saq 'ena'am na laỹepi, qalaq 'onaxaic da ỹo'ot damaye da yaqto' ỹo'oxoren Ñim Lo'onatac 'Enauacna, qataq nam camachaqca ca chec qalaq nataqa'en ỹo'ot damaye, qalaxaye nataqa'en naigui da ỹo'oxoren Ñim Lo'onatac 'Enauacna, qataq ỹaatacot da na'achecỹaxac Ñimaye. Qaq nache 'ena'am nataqa'en nam ndotec ana nañiguishe laue da chectac ỹo'ottac damaye, cha'aye souaxat da ỹo'oxoreetac Ñim Lo'onatac 'Enauacna qataq ỹaatacot da na'achecỹaxac Ñimaye.
7Da qarca'alaxa qataq da qarleuaxa saishet da qaralamaxat, damaye lalamaxat Ñim Lo'onatac 'Enauacna. 8Cha'aye da huo'otaq ña ñeca'alaqtauec, huo'otaq da mashe seleuaq qalaq damaye naigui da llo'oxoyec So Qarataxala' Jesucristo. Cha'aye da huo'otaq ña ñeca'alaqtauec huo'otaq da mashe seleuaq Ñimaye qomi' lalamaqa'ate. 9Qaq ỹoqta 'eesa da So Jesucristo ileu co'ollaxa, qalaxaye qaltaq nca'alec, da yaqto' Somaye huo'o da la'añaxac da ilo'ogue nam ñaq nca'altauec qataq na mashe ileu.
10Qaq ỹoqo'oye saishet da qoquiiteguelec na laỹepi qara'amqaanataxanaxauaipi qataq saishet da qauo'otañi, cha'aye 'enauac da shenaqta qome qomi' nmi't Ñim Lo'onatac 'Enauacna. 11Cha'aye ana nere maye huetalec na la'aqtacpi Ñim Lo'onatac 'Enauacna 'eeta':
«Ỹataqta 'eesa de'era san ỹa'aqtac,
da 'enauac qome na shiỹaxauapi
Aỹem ỹa'aroto naua l-llectel,
qataq 'enauac qome namayepi Aỹem ỹo'oxoren.»
12Qaq ỹoqo'oye 'enauac da shenaqta ñachaataqot qome Ñim Lo'onatac 'Enauacna, da yaqto' Ñimaye qomi' nmi't.
Saishet da qauauo'oi ca lasouaxashet ca qara'amqaanataxanaxauai
13Qaq ỹoqo'oye saishet ca 'oonolec da qoñiita da quetapeguelec ca lỹa. Nachaqrata da saishet da qomi' qanmaxaleguete da huo'o cam 'oonolec nam ca'attague' So Cristo da huo'o ca lasouaxashet, nache deqat da lpi'iỹaxac Ñim Lo'onatac 'Enauacna. 14So Qarataxala' Jesús aỹem ỹapaxaguen da qaica ca nallec da qauem. Qalaxaye da huo'o ca ipettega da huo'o ca nallec maye saishet da ishet da qanallec, nache no'on da saishet da chec. 15Da huo'o ca qarqaỹai da dalemata souaxat nam qolliquiitac, nache camaye 'eetec de'era, cha'aye souaxat da saishet da qauachaxañiỹa ca qarsoxoyiqui. Saishet da qauashiñi da ivira'a da deqat ca qarỹai cam nataqa'en ileualec So Cristo souaxat da qolliquiitac nam ỹotta'a't nallec. 16Saishet da qauauo'oi ca ldaqa' da qauem ca na'aqtaguec dam huesochiguiñi qarataxaqui maye qami' ỹanema So Cristo. 17Da lo'onataxanaxac Ñim Lo'onatac 'Enauacna da ilo'ogue 'enauacna, damaye saishet da ỹectega cam qanallec qataq cam qanỹomgui. Nachaqrata da iuen da qaỹo'ot cam ỹaỹamaqchiguiñi qataq qanayeetaigui da nlagaxayec qataq tonaxac. Qaq 'enauac de'era ishet da qaỹo'ot chegoqchigui So Saqcha'a Na'añaxac Qui'itta. 18Qaq da nache shenaqtec de'era da so'onataxanaqot So Jesucristo, nache Ñim Lo'onatac 'Enauacna qomi' ỹaỹamaxareete', qataq huo'o naq 'enec naqa'en da shenaqta 'enauac na shiỹaxauapi.
19Qaq ỹoqo'oye ñi 'oonolec da shenaqta souaqtaigui qome da nlagaxayec, qataq ñetaunaxa't, da yaqto' nquictasheguem dam dalaxaic achaalataxac maye qomi' ỹanema So Cristo. 20Saishet qome da qauqataqchichi da lo'onataxanaxac Ñim Lo'onatac 'Enauacna souaxat nam qanallec. Cha'aye ỹoqta 'eesa da 'enauac nam qanallec, namayepi ỹataqta qui'itta; qalaxaye dam qauem 'eeta': da huo'o ca qanallec cam ishet da iqataqchet da lpi'iỹaxac cam nỹa. 21Qaq ỹoqo'oye 'onaxaic da saishet da qanallec na lapat qataq saishet da qanỹomgui na lataxa qataq saishet da qaỹo'ot ca camachaqca lỹa cam ishet da huañi naqa'en ca na'amqaanataxanaxaua. 22Cam ỹataqta qauaỹamaxayiñiita maye lataxac qanqa'eñi de'era, damaye 'eeta'am da nacheñi Ñim Lo'onatac 'Enauacna qataq qami' da qanasachiigui. ¡Ỹataqta machiguiñi cam nomta da huesochiguiñi da huo'o cam ỹo'ot qataq saishet da qauem ca lhuennataxac da ime da ỹo'ot! 23Qalaxaye da huo'o ca lhuennataxac da deque'e huo'otaq saishet, nache camaye da chec que'eca nallec, nache na'aqchet, cha'aye saishet da lhuennataxac. Qaq qami' ỹataqta qauaỹachiñiita damaye da qauem, cha'aye 'enauac nam qaỹo'ot da dataỹa'aguet cam ỹa'amaqten ñi 'oonolec, nache ỹo'ot ca nasouaxashet.
