So Saqcha'a La'añaxac Ñim Lo'onatac 'Enauacna qomi' ỹanema da qarca'alaxa
1Qaq Ñim Lo'onatac 'Enauacna saishet da ỹauo'o qome ca qanhuaxanaguec, cha'aye mashe ña'araqtaua'a So Jesucristo. 2Qaq nagui da mashe ña'araqtaua'a Somaye, nache So Saqcha'a Na'añaxac Qui'itta, qomi' ilotegueto qataq qomi' ỹanema da qarca'alaxa qataq qomi' isoueeguesopa da ñe'etaxaloxo qataq da nleuaxa. 3Qaq Ñim Lo'onatac 'Enauacna ỹo'ot co'ollaxa dam saishet da ỹañoxot da ỹo'ot nam namaxasoxonaxacpi maye chegoqo'ot so Moisés, cha'aye qaica ca ilo'ogue da lqopitaxanaqtaic da ỹo'ot nam qauem. Nache Ñim Lo'onatac 'Enauacna namaxalec co'ollaxa ana 'alhua so lalamaxat Llalec, qaq Somaye ỹataqta 'ena'ama qomi' da qarqalviaxa, qataq da qañe'eguenataguec. Qaq Ñim Lo'onatac 'Enauacna namaxalec ana 'alhua Somaye da yaqto' qomi' ileualeguete souaxat na qaye'etaxaloxo. Qaq nache chegoqchigui Somaye da Ñim Lo'onatac 'Enauacna, nlaxaañi da la'añaxac da ñe'etaxaloxo. 4Qaq de'era ỹo'ot Ñimaye nshetaique da qomi' saishet da qolaqtague' da so'otaqtac 'enauac nam qauem qarqopitaxanaqtaiguesat, nachaqrata da sepagaqtelec da so'otaq nam ỹaỹamaqchiguiñi maye damaxasoxoolec nam namaxasoxonaxacpi, qaq So Saqcha'a Na'añaxac Qui'itta qomi' itaua'n.
5Cha'aye nam quetague' da saishet da nllañi da qauem lqopitaxanaqtaic, namayepi nachaqrata da tatapigui lauel da ỹo'ot da qauem. Qalaxaye nam quetague' da ỹalaxaguet So Saqcha'a Na'añaxac Qui'itta, namayepi nachaqrata da iuennatega da ỹo'ot nam 'eetapeguec Somaye. 6Cha'aye da seuennaqtega 'enauac nam qauem maye 'eetapeguec da qarapachiỹaxac, nache ỹataqta qaỹoqtalo qome qomi' Ñim Lo'onatac 'Enauacna. Qaq da nda'a't da seuennaqtega cam 'eetapeguec So Saqcha'a Na'añaxac Qui'itta, nache qomi' taỹoto ca qarca'alaxa chochaq tatec qataq ca nlagaxayec. 7Nam saishet da nllañi nam qauem lqopitaxanaqtaicpi nda'a't da iuennatega da ỹo'ot ca qauem, nache namayepi ỹataqta ipa'agueetac Ñim Lo'onatac 'Enauacna. Cha'aye sa ỹaỹamaxaren qataq saishet da ỹalaxaguet na lamaxasoxonaxacpi Ñimaye. 8Qaq ỹoqo'oye nam quetague' da ỹalaqtapeeguet nam qauem lqopitaxanaqtaiguesat, namayepi saishet da ỹo'ot ca ntonaxac Ñim Lo'onatac 'Enauacna.
9Qalaxaye da So Saqcha'a La'añaxac Ñim Lo'onatac 'Enauacna da qami' hueta'agueta, nache qami' saishet da qoquiito'ot nam qauem qarqopitaxanaqtaiqui, nachaqrata da qaualaqaiguet So Saqcha'a La'añaxac Ñim Lo'onatac 'Enauacna. Ca saishet da hueto'ot So Saqcha'a La'añaxac So Cristo, nache camaye saishet da na'attaua'a Somaye. 10Souaxat da ñe'etaxaloxo, nache da qaro'ocỹaxaqui ishet da ileu. Qalaxaye da So Cristo nca'alec qataq qami' hueta'agueta, nache nataqa'en so saqcha'a qarca'alaqai nca'alec qataq saishet da imeuo, cha'aye Ñim Lo'onatac 'Enauacna ỹapalaxat na qarasouaxashechi. 11Ñim Lo'onatac 'Enauacna nca'alaxateeguesop da l-leuaxa So Jesús, qaq Ñimaye nataqa'en nca'alaxatec da qaro'ocỹaxaqui maye mashe ileu, da yaqto' ỹe'eguelaxalec da nca'alec, da So Saqcha'a La'añaxac Ñim Lo'onatac 'Enauacna qami' hueta'agueta. 'Era dam ỹo'ot Ñim Lo'onatac 'Enauacna ỹachegoxotchigui So Saqcha'a La'añaxac maye qami' hueta'agueta.
12Ỹoqo'oye, qami' ỹaqaỹañicpi, qomi' mashe saishet da qomi' qaỹamaqtaleguete da qolaqtague' da maiche qaralamaxat qarqopitaxanaqtaic. 13Cha'aye da qami' qoquiitague' de'era qarqopitaxanaqtaiqui, nache ishet da qarellivi qome. Qalaxaye da chegoqchigui qanqa'eñi So Saqcha'a Na'añaxac Qui'itta da nache tachiguiña qanqa'eñi de'era qauem qarqopitaxanaqtaiqui, nache qami' taỹoto ca nca'alaxa maye chochaq tatec.
14Qaq 'enauac nam quetague' So Saqcha'a La'añaxac Ñim Lo'onatac 'Enauacna, namayepi ỹataqta llalaqpi Ñimaye. 15Cha'aye som Saqcha'a Na'añaxac maye qami' ỹanema Ñim Lo'onatac 'Enauacna, Somaye saishet da qami' l-lataqa qataq saishet da qami' icolanaqche't. Nachaqrata da Somaye qomi' ỹaueegueta da ỹataqta qomi' llalqa Ñim Lo'onatac 'Enauacna qataq qomi' ỹapaxagueneque da seỹaxanaxa Ñimaye qalaq shenaqta': «'Am Ita'a.» 16Se'eso Saqcha'a La'añaxac Ñim Lo'onatac 'Enauacna huaxaiguet so saqcha'a qarca'alaxa, nache ỹataqta 'itchiguiñi naqa'en da qomi' llalqa Ñimaye. 17Qaq nagui da mashe qomi' llalqa, nache nataqa'en qomi' taleguete 'enauac nam 'onaxaic maye iqataxaatapigui' Ñimaye da qomi' ỹanema. Qaq 'enauac ỹataqta ñeuanaqte' So Cristo, qaq da huo'otaq huo'o da qanque'eenaxac da shenaqta'am Somaye, nache nataqa'en ỹoqta 'eesa da ñeuanaqaua'a Somaye da llo'oxoyec maye ỹaconeguet qome.
Cam ñaq natauo maye huo'o da llo'oxoyec
18Ỹataqta 'eesa ñaqa'en da naua qanque'eenaxaco maye seviraxagueta nagui ỹataqta qaica ca la'amaqche'c, da ñaloqnaxaguet da llo'oxoyec qome que'eca dalaxaic achaalataxac maye Ñim Lo'onatac 'Enauacna qomi' ỹanema qome da sonaqta'aguet Ñimaye. 19'Enauac nam lo'onatacpi Ñim Lo'onatac 'Enauacna iuatta'a qataq ỹataqta lta'araic da lachetataic, da Ñimaye 'enauac qomi' ỹachaxanalo na huetalec ana 'alhua da ỹataqta qomi' llalqa. 20Cha'aye 'enauac nam lo'onatacpi Ñimaye, ỹataqta sa ỹaỹaten ca 'eetec, qalaxaye saishet da lasouaxashet, cha'aye Ñim Lo'onatac 'Enauacna maiche lhuennataxac. Qalaxaye ana 'alhua ñaqauo'o da naquitaxac 21da qaisoueeguesop de'era nlaqtaguec. Huo'o da naquitaxac da ỹalectaua'a da llo'oxoyec nam llalaqpi Ñim Lo'onatac 'Enauacna qom qaisouec. 22Qomi' saỹaanaq da 'enauac na lo'onatacpi Ñimaye huo'o da lachetataic qataq dachotta'am da nqui'ic, 'eeta'am aca 'alo maye mashe huotaique da deco'o. 23Qaq saishet da nachaqanata anamaye da huo'o da nqui'ic, cha'aye nataqa'en qomi' huo'o da qanque'eenaxac, qomi' maye qomi' hueta'agueta So Saqcha'a Na'añaxac Qui'itta som la'auaxanec qataq la'anaxat 'enauac cam qomi' ỹanema Ñim Lo'onatac 'Enauacna qome. Nagui da ñaq seuataqta'a Ñimaye da qomi' nanereleguete da ỹauo'oi qomi' llalqa qataq 'enauac da qomi' huesochiyiñi naqa'en, nache huo'o da qanqui'ic, qalaxaye ñe'emaxataqta. 24Ñim Lo'onatac 'Enauacna qomi' nca'alaxatre'c, cha'aye huo'o da qanaquitaxac da ipacchigui de'era. Qalaxaye da qaiuatta'aguet cam mashe qailota'a, nache saishet da aquitaxac, cha'aye ca 'eeteco' da qaiuattaique ca mashe huo'o. 25Qalaxaye da huo'o ca seuataqtaique da saxanaxa da selaqa'a, nache iuen da huo'o da qarhualaxavic da seuataqtaique.
26Qaq nache 'eetec de'era, qataq ye da qanaquitaxac Ñim Lo'onatac 'Enauacna qaica ca la'añaxac, nache So Saqcha'a Na'añaxac Qui'itta qomi' itaua'n. Cha'aye saishet da saỹatenaq ca lataxac da seỹaxanaqot Ñim Lo'onatac 'Enauacna, qalaxaye nacheso So Saqcha'a La'añaxac da qomi' ñachoxoreeleguete, qalaxaye naua nachoxonnaxaco somaye ỹataqta saishet da qaivi' da qaỹa'axateguelo ca naigui. 27Qaq Ñim Lo'onatac 'Enauacna maye ỹaỹaten 'enauac nam qarhuennataxacpi, Ñimaye ỹaỹaten cam 'eetapeguec So Saqcha'a Na'añaxac Qui'itta. Cha'aye Somaye nachoxonnot Ñim Lo'onatac 'Enauacna da nachoxoreelec nam ỹataqta lalamaxatpi Ñimaye, qaq naua nachoxonnaxaco ỹataqta ỹaỹamaxareete' Ñim Lo'onatac 'Enauacna.
28Saỹatenaqta da Ñim Lo'onatac 'Enauacna iqataxaatai' 'enauac na ỹaỹamaqchiguiñi lataxaguesat da talec naqa'en nam lauotaxatpi, nam maiche lca'aguishecpi da yaqto' ipacchigui da maiche 'eetapeguec. 29Cha'aye nam nale'ena co'ollaxa da ỹauattonpi Ñim Lo'onatac 'Enauacna, qaq nachena nam lca'aua'a co'olloxocheye Ñimaye, da yaqto' 'eeta'am naqa'en So Llalec, qataq yaqto' So Llalec nacheso so ñaxanec. 30Qaq Ñimaye nam mashe lca'aguishecpi, nache nataqa'en iỹaxana; qaq nam iỹaxanapi, nache nataqa'en ỹapalaxat na lasouaxashetpi; qaq nam ỹaconeguet, nache nhuanaua'a naqa'en da maiche llo'oxoyec.
Ñim Lo'onatac 'Enauacna ỹataqta lta'araic da lauotaxanaqtaic da shenaqta
31Qaq ỹoqo'oye ¿negue't ca lỹa qara'aqtac? Ye 'oonolec dam ishet da qara'aqtac, 'eeta': Da Ñim Lo'onatac 'Enauacna da qomi' hueta'agueta, nache qaica ca ishet da qomi' dataỹa'agueta. 32Cha'aye Ñimaye qomi' ỹanema so lalamaxat Llalec co'ollaxa. Qaq da qomi' ỹanema So Llalec, nache nataqa'en qomi' ỹanema 'enauacna. 33Qaq ỹoqo'oye ¿negue'tom ca ishet da ỹauo'o ca ỹasaxalec lasouaxashet nam lca'aguishecpi Ñim Lo'onatac 'Enauacna? ¡Ye Ñimaye mashe ỹa'axat da ỹapalaxat na lasouaxashetpi namayepi! 34Qataq ¿ishet peta'a da huo'o ca ỹañoxot da ỹauo'o ca nhuaxanaguec? ¡'A'i, qaica, cha'aye So Jesucristo mashe ileualec namayepi! Qataq huo'o da lỹa, So Jesucristo nca'aleeguesop da nleuaxa, qaq nagui neta'ague na aloic Ñim Lo'onatac 'Enauacna, nache nachoxoreetapeguelec da shenaqta. 35Qaq da inataxanaxac 'eeta': ¿Negue't ca ishet da qomi' nqateeguesopa da lauotaxanaqtaic So Cristo? ¡Qomye qaica! ¿Peta'a na sa ỹaỹamaxañisat qataq nam que'eenaxacpi qataq na lqalaicpi? ¿Peta'a ỹañoxot de'era na nqouaxa, huo'otaq na latomaxa huo'otaq na lchecsat qataq da nleuaxa? ¡'A'i, saishet! 36Da 'enapec ana nere maye huetalec na la'aqtacpi Ñim Lo'onatac 'Enauacna, 'eeta':
«'Am sasouaxalec da imauec ye na'a'q da qomi' qaỹauecta'alo da qarleuaxa;
'eeta'ama qanqa'en qomi' aca qagueta da qaỹauectaua'a ca nalaataqa'.»
37Qaq na'aictaxa da souaqtangui 'enauac na sa ỹaỹamaxañisat, qalaxaye ỹataqta saỹatenaqta da So Jesucristo som qomi' lauotaqa'ate, Somaye qomi' ỹanema da sauegaxanaq. 38Aỹem ỹataqta saỹateeta da qaica ca ishet da qomi' nqateeguesopa da lauotaxanaqtaic Ñim Lo'onatac 'Enauacna; na'aictaxa da huo'otaq achaalataxac, qataq da nleuaxa, huo'otaq nam namaxashecpi piguem le'ecpi qataq na saq cha'api, huo'otaq nam souaqtaigui nagui qataq cam ñaq natauo, 39huo'otaq nam na'añaxacpi maye hueto'ot na piguem qataq nam huetaña na pa'aguiñi, qataq 'enauac na laỹepi lo'onatacpi Ñim Lo'onatac 'Enauacna, ¡qaica ỹataqta qaica, ca ishet da ỹañoxot da qomi' nqateeguesopa da lauotaxanaqtaic Ñim Lo'onatac 'Enauacna maye qomi' ỹachaxanalo, ỹachegoxotchigui So Qarataxala' Jesucristo!
