Nagui qomi' lalamaqa'ate So Cristo
1Qami' ỹaqaỹañicpi, maye qoquiitague' So Cristo qami' maye qauauattoñi na namaxasoxonaxacpi maye chegoqo'ot so Moisés qataq qauaỹachiñi da iuen da salaxasoxolec namayepi da ña ñeca'alaqtauec. 2Qaq saloqnaxana aca 'alo maye mashe huaron, acamaye na namaxasoxonaxacpi ña ncoñetta'ai' naqa'en ca lhua qom huo'otaq camaye ña nca'altauec. Qalaxaye que'eca lhua qom huo'otaq ileu, nache acamaye ishet da huesoueeguesop na namaxasoxonaxacpi maye icoñetta'aguet naqa'en camaye. 3Qaq ỹoqo'oye acamaye da huo'otaq huaroneguet ca lỹa ỹale, da huo'otaq ña nca'altauec ca lhua, nache acamaye saishet da ipaguelec da lataxac da nhuaỹaxac. Qalaxaye da mashe ileu que'eca lhua, nache acamaye huesoueeguesop da lataxac da nhuaỹaxac, nache ishet da ỹe'eguelaxalec da qaltaq huaron, nache saishet da qaỹamata'ac da saishet da ipaguelec da lataxac da nhuaỹaxac.
4Qaq nache 'eetec nataqa'en qami' ỹaqaỹarolqa maye qana'ayeetaua'a da lo'ocỹaxac So Cristo, chegoqchigui da l-leuaxa Somaye, qaq qami' mashe saishet da qami' huetaleguete da la'añaxac na namaxasoxonaxacpi. Cha'aye nagui mashe qami' lalamaqa'ate So Cristo, maye Ñim Lo'onatac 'Enauacna nca'alaxateeguesop da l-leuaxa. Qaq ỹoqo'oye qomi' ishet da so'onataxanaqot Ñim Lo'onatac 'Enauacna da so'otaq ca no'on. 5Cha'aye co'ollaq qomi' souaqtaigui da saishet da sañoxotaq da ñellaqañi da qarqopitaxanaqtaic da so'otaq ca sa ỹaỹamaxañi, nache na namaxasoxonaxacpi nquigaxatec de'era qarqopitaxanaqtaic. Qaq nachena na so'otaqtacpi nam qomi' qaỹoqtalo Ñim Lo'onatac 'Enauacna. 6Qalaxaye nagui na namaxasoxonaxacpi mashe saishet da qomi' ilotegueto. 'Ena'am da mashe seleuaq. Nagui nache qomi' huesochiyiñi qataq dalaxaic da qarataxac da so'onataxanaqot Ñim Lo'onatac 'Enauacna. Saq 'ena'am so hua'auchiguiñi, co'ollaq salaxasoqtapeeguet na togoshec namaxasoxonaxacpi, nachaqrata da nagui salaxasoxoguet So Saqcha'a Na'añaxac Qui'itta.
Da loquiaxac da qaỹataỹa'aguet da ñe'etaxaloxo
7Qaq ỹoqo'oye ¿chaq hua'ague ca 'eetec ca qara'aqtac? ¿Peta'a qauem na namaxasoxonaxacpi, maye chegoqo'ot so Moisés? ¡'A'i, saishet! Cha'ayectaxa da qaica namayepi, nache saishettaxa da saỹaten chaq negue't dam ñe'etaxaloxo. Saloqnaxana da na nqataxacpi taxa da saishet da 'enapec: «Saishet da qoquiigue da qarqopitaxanaqtaiqui da qauqopichiita'a ca lalamaxat ca qarỹai», nache aỹemctaxa saishet da saỹaten damaye da sa ỹaỹamaxañi. 8Da qaicactaxa na namaxasoxonaxacpi, nache da ñe'etaxaloxo qaica ca la'añaxac. Qalaxaye de'era ñe'etaxaloxo do'ogoxona da la'añaxac na namaxasoxonaxacpi, nache aỹem ỹo'otec da iyaxayec da so'ot na ỹotta'a't sa ỹaỹamaxañisat. 9Cha'aye co'ollaq saxanaxa da saỹaten na nqataxacpi, nache she'emaqtac. Qalaxaye co'ollaq saỹaten na namaxasoxonaxacpi, nache ñanoma da ỹataqta aỹem 'etaxaloxoic lta'araic 10qataq aỹem qaỹoqta Ñim Lo'onatac 'Enauacna. Huaña, nache de'era namaxasoxonaxac maye ishettaxa da aỹem ỹami' ca achaalataxac maye chochaq tatec, damaye aỹem ỹaueca'a da nleuaxa maye chochaq tatec. 11Cha'aye de'era ñe'etaxaloxo, do'onataxana na namaxasoxonaxacpi da aỹem ỹatenachet, qaq ỹoqo'oye nache chegoqchigui namayepi da aỹem qaỹoqta Ñim Lo'onatac 'Enauacna.
12Qalaxaye nache 'ena'am da shenaqapec da ne'ena namaxasoxonaxacpi chegoqtot Ñim Lo'onatac 'Enauacna. Qaq ỹoqo'oye ñi 'oonolec nam lamaxasoxonaxacpi ỹataqta 'onaxaic qataq nalochiguiñi. 13Qaq de'era saishet da sheetega da na namaxasoxonaxacpi maye 'onaxaic aỹem ỹauecta'a da nleuaxa. ¡'A'i, saishet! Cha'aye dam aỹem ỹalauat nachera da ñe'etaxaloxo, maye do'ogoxona som 'oonolec nam 'onaxaic namaxasoxonaxacpi. Qaq ỹoqo'oye chegoqchigui so 'oonolec namaxasoxonaxac 'onaxaic da 'enauac saỹatenaq da ỹataqta huo'o da lchec qataq qauem, qaq damaye nachera da ñe'etaxaloxo.
14Cha'aye qomi' saỹaanaq da na namaxasoxonaxacpi chegoqo'ot Ñim Lo'onatac 'Enauacna. Qalaxaye aỹem choche aỹem shiỹaxauatto, qaq ỹoqo'oye sa seshet da ñellañi nam qauem iqopitaxanaqtaiguesat qataq aỹem l-latac da ñe'etaxaloxo. 15Qaq ỹoqta 'eesa da sa saỹaten nam so'ottacpi, souaxat da saishet da so'ot cam ỹataqta sheetapeguec. Nda'a't nam qauem maye sa saỹamaxaren da so'ot. 16Qalaxaye que'eca sa saỹamaxaren da huo'otaq nacheca so'ot, nache aỹem maiche saỹaten da ỹataqta 'onaxaic ne'ena namaxasoxonaxacpi. 17Qaq saishet da nachaỹem da so'ot que'eca qauem, cha'aye nachera da ñe'etaxaloxo maye huetaigui añi iquiyaqte. 18Qaq nache aỹem saỹaten da lqopitaxanaqtaic da ỹapachiỹaxac, saishet da aỹem ỹashenem da so'ot ca ỹaỹamaqchiguiñi. Qaq na'aictaxa da aỹem huo'o da iyaxa da so'ot ca ỹaỹamaqchiguiñi, qalaxaye saishet da sañoxot da so'ot. 19Qaq saishet da so'ot cam ỹaỹamaqchiguiñi maye seuennatega, chaqrata da shecto'ot da so'ottac nam qauem maye saishet da seuennatega. 20Qalaxaye da huo'otaq so'ot nam saishet da saỹamaxaren da so'ot, nache ỹoqta 'eesa da saishet da nachaỹem da so'ot, cha'aye damaye so'ot souaxat da ñe'etaxaloxo maye netaigui añi iquiyaqte.
21Qaq huaña, nache aỹem ñanoma naxa da, na'aictaxa da sauotaique da so'ot ca ỹaỹamaqchiguiñi qalaq sa seshet, nda'a't naxa na sa ỹaỹamaxañi da so'ot. 22Cha'aye dam pa'auo da iquiyaqteỹaxac ỹataqta huo'o da lqopiche nam namaxasoxonaxacpi maye chegoqo'ot Ñim Lo'onatac 'Enauacna. 23-25Qalaxaye aỹem huo'o da lỹa sela'a: Huo'o da aỹem pa'ataigui, qaq damaye deloctague' dam iuennataxac maye saỹaten da ỹaỹamaqchiguiñi. Qaq aỹem huo'o da ñepogoxoinaxac da salaxaguet nam namaxasoxonaxacpi maye chegoqo'ot Ñim Lo'onatac 'Enauacna, qalaxaye ỹataqta ñanomta da aỹem icoñettai' da ñe'etaxaloxo maye aỹem ỹauecta'a da nda'a't da so'ottac da qauem. Ỹataqta huo'o da iyaxa da salaxaguet na namaxasoxonaxacpi maye chegoqo'ot Ñim Lo'onatac 'Enauacna. Qalaxaye sa seshet da saxaañi da ñe'etaxaloxo, cha'aye dam ỹapachiỹaxac sa da'añi, qaq ỹoqo'oye saishet da ỹalaq. ¡Choxoraicolec aỹem! ¿Negue'tom ca ishet da aỹem isoueeguesop ne'ena no'ocỹaxac maye aỹem ỹauecta'a da ñe'etaxaloxo qataq da aỹem qaỹoqta naqa'en Ñim Lo'onatac 'Enauacna? ¡Qalaxaye sanot da ña'achecỹaxac Ñim Lo'onatac 'Enauacna, cha'aye saỹaten da So Jesucristo, nacheso so aỹem isoueeguesop de'era!
