Rut 4

₁Qaq co'ollaq ime de'era, nache so Booz taua'a so ñegueuo so huaqta'a't nỹecpi, nache nso'ooñi, qaq co'ollaq mashe nso'ootañi, nache nateugueye som lauo' le'ec maye ỹectega co'ollaxa somaye, nache iỹaxanapegue', 'eeta':

Iỹa, ña 'auanaicna'a, 'anso'ooñi.

Nache somaye anac, nache nso'ooñi. ₂Huaña nache so Booz, iỹaxanalo soua diez nqueroxonqa maye lma' se'eso qanayeeta'a huaqta'a't nỹecpi, nache nataqa'en 'enapegalo da nso'ooyiñi. Qaq co'ollaq mashe nso'ootrañi soomaye, ₃nache so Booz, da'aqtaxanem so lauo' le'ec, 'eeta':

Añi Noemí, mashe ñe'eguelaq chegaqa'a ye Moab, qaq añimaye imeetac ye 'alhua maye lalamaxat co'ollaxa ye qarhuo' le'ec Elimelec. ₄Qaq sauotaique da 'auaỹaten de'era, cha'aye sa iuena'a da 'anshetaique da 'ausheenaxana, nache hua'aqchigui 'anqa'en ne'enaua nso'ootrañi qataq ne'ena nqueroxonecpi, maye lma' ne'ena huaqta'a't nỹecpi. Cha'aye 'am maye ỹataqta 'am sa qaỹapeque dam qana'acnaxac so Elimelec, ỹoqo'oye iuen da nache 'am da 'ausheenaxana yi'iye 'alhua. Qaq da sa 'aushet da 'ausheenaxana, nache no'on da aỹem 'aua'aqtaxanem yaqto' saỹateeta, cha'aye nache 'am da 'am seca'atalec de'era qana'acnaxac, ỹoqo'oye da sa 'ausheenaxana, nache aỹem sesheenaxana yi'iye 'alhua.

Nache som lauo' le'ec somaye 'enapec:

Aja', aỹem sesheenaxana.

₅Nache so Booz 'enapega somaye, 'eeta':

Qaq no'on da 'auaỹateeta da qom 'ausheenaxana yi'iye na'alhua aso Noemí, qaq iuen nataqa'en da 'auaroneguet aso Rut, maye Moab lashe, asom lhua co'ollaxa yem saqca, yaqto' yi'iye 'alhua nache queta da lalamaxat yemaye.

₆Qaq som lauo' le'ec somaye co'ollaq hua'aqchigui de'era, nache 'enapec:

Da nache 'eetec de'era, nache aỹem saishet da sesheenaxana yemaye, cha'aye ishet da na'aqchet da isallaxa, qaq aỹem 'am sasaxalec de'era qana'acnaxac da 'ausheenaxana yemaye.

₇Qaq se'eso na'a'q so Israel le'ecpi huo'o co'ollaxa da maiche lalamaxat lataxac, da huo'o ca shiỹaxaua da ỹasaxalec da na'acnaxac ca lỹa, huo'otaq da ime cam qanaỹamaxattapigui, qaq cam sa ỹasateguet cam qanaỹamaxattapigui, nache camaye nqat ca 'oonolec lapela', nache ỹanem cam lỹa shiỹaxaua maye naỹamaxattague'. Qaq 'era da 'eetec da lataxac so Israel le'ecpi da huo'o ye naỹamaxachigui. ₈Qaq se'eso lauo' le'ec so Booz, nqat so 'oonolec lapela' nache ỹanem so Booz, nache, 'eeta':

'Am 'ausheenaxana qome que'eca 'alhua.

₉Huaña nache so Booz 'enapega so nqueroxonecpi, qataq som ỹauaatauopi, 'eeta':

'Enauac da qoñeeta, aỹem qauauañiichigui nagui da aỹem ñemene' aso Noemí, da sesheenaxana ye 'alhua maye lalamaxat co'ollaxa so Elimelec, qataq soua llalqa Quelión qataq Majlón. ₁₀Qataq da aỹem saroneguet qome aso Rut, asom Moab lashe maye lhua co'ollaxa ye Majlón, yaqto' yi'iye 'alhua nache 'eetai' da lalamaxat yemaye, yaqto' da le'enaxat ye Majlón saishet qome da pal da ỹalectaigui na lalamaxat lqaỹañecpi, qataq ne'ena nhuo' le'ecpi. Qaq nagui, qami' qauauañiichigui de'era.

₁₁Nache so nqueroxonecpi qataq 'enauac som ỹauaatauopi ỹasategueto' somaye, 'eeta':

Aja', qomi' sauanaqchigui damaye. Qaq Ñim Nataxala' ỹanem asa'aso 'alo maye huenoxoneua'a qome ca 'arma' da 'eeta'am aso Raquel, qataq aso Lea, maye sachegoxosoxogueta qomi' Israel le'ecpi. Qaq 'am ỹataqta 'am ỹo'oxoraic qome na Efrata, qataq 'am 'amaqtaqaic na Belén.

₁₂Qataq Ñim Nataxala' 'am ỹanem qome ca qalota 'aỹa'alaqpi chegoqchigui naqa'en asa'aso 'alo, 'eeta'am so qalota llalaqpi so Fares, som llalec aso Tamar qataq so Judá.

₁₃Qaq 'era da 'eetec so Booz co'ollaq huaroneguet aso Rut. Qaq co'ollaq mashe lhua asomaye nache Ñim Nataxala' ỹanem da ishet da hualaxai, nache huo'o so llalec.

₁₄Qaq huaña nache so 'alpi 'eetego' aso Noemí, 'eeta':

Ỹataqta qaỹo'oxoren qome Ñim Nataxala', cha'aye 'am ỹanem nagui ye 'arhual da yaqto' 'am ilo'ogue qome, qaq da le'enaxat yemaye ỹataqta ỹo'oxoraq qome ne'ena Israel.

₁₅Qaq yemaye 'am ỹanem qome da 'ara'añaxac, qataq 'am ilo'ogue qom ỹataqta 'am ỹa'axaino'ole, cha'aye yemaye, llalec asom 'arate maye ỹataqta 'am lauotaqte, maye napacalec da la'amaqchec caua siete 'aỹa'alqa.

₁₆Nache aso Noemí ỹacona so nogotolec, nache nsoxouo nache huapegue' da ỹaqchet. ₁₇Qaq so 'alpi maye lauoreuapi, co'ollaq ila'a asomaye nache, 'eeta':

¡Huo'o ye ñiguiñi llalec añi Noemí!

Nache som 'alpi ỹo'ot da le'enaxat so nogotolec, nache ỹanagui Obed. Qaq somaye nacheso so lta'a so Yesé, som lapi' so David.

₁₈Qaq 'ena nam le'enaxatpi so chegoxoguetpi so Fares: So Fares nache llalec so Jesrón, ₁₉qaq so Jesrón nache llalec so Ram, qaq so Ram nache llalec so Aminadab, ₂₀qaq so Aminadab nache llalec so Nasón, qaq so Nasón nache llalec so Salmón, ₂₁qaq so Salmón nache llalec so Booz, qaq so Booz nache llalec so Obed, ₂₂qaq so Obed nache llalec so Yesé, qaq so Yesé, nache llalec so nta'a David.