So Booz nauattone' aso Rut
1Qaq huo'o so na'a'q, nache aso Noemí 'enapego' aso Rut, 'eeta':
'Am ỹalole, aỹem iuen da ñemitaique ca 'arhua, yaqto' ỹo'ot da 'auamachiguiñi. 2Ña 'aumeten da se'eso qarhuo' le'ec Booz, maye 'aualectaigui ana lo'onataxanaxanapi, somaye tauga ne'ena pe ye lanaxanaqa' da ichegoq ana ala na lañiguishec. 3Qaq 'am, 'anaỹamaxat qome, 'anachel, 'ancoyigui ca 'ancoraxat maye ama da laitaỹaxac, qataq 'aỹa'aañi aca ỹataqta 'onaxai 'arpoto. Ime, nache 'anqo'oneuga qome ye lchegoxosoxonaqa' somaye. Qalaxaye saishet qome da 'anachaxana, yaqto' 'am sa ỹauatton nato' qom mashe imeta da lquia'axac, qataq da nỹomaxac. 4Qaq qom do'oche nache 'auaỹataxareeta ca huichiguiña da nnaañi. Ime, nache 'anquictaua'a qome cam lo'ochaqa', qaq qom mashe 'avireua'a, nache 'anauatsheguem ca lapo', nache 'annaateua'alo naua lchel. Huaña qome nache maiche 'am da'aqtaxanem cam 'auo'ot.
5Nache aso Rut ỹasateguet asomaye, 'eeta':
Aja', aỹem so'ot qome 'enauac nam qonapec.
Aso Rut detaxaỹapegue' so Booz
6Nache aso Rut jec, tauga so nchegoxosoxonqa', nache ỹo'ot 'enauac nam ỹamaxalec aso lachoro. 7Qaq so Booz co'ollaq mashe ime da lquia'axac qataq da nỹomaxac, nache ỹataqta machiguiñi da lquiyaqteỹaxac. Ime, nache nnaañi da yaqto' do'oche, hueteua'a na laỹe so lapoñiguishec ala na cebada. Qaq co'ollaq mashe qaỹata'ague, nache aso Rut nchettaua'a so hueta'a somaye, nache ỹauaaleguete naua lapia'ate, nache nnaañi. 8Qaq co'ollaq mashe laiñi so pe, nache so Booz nlotec, nache nchemaxañi, huaña nache choche ỹe'elaqtem da huo'o aso 'alo da nnaataua'alo naua lapia'ate. 9Huaña, nache so Booz inat asomaye, 'eeta':
¿Negue't 'am?
Nache asomaye ỹasateguet somaye, 'eeta':
Qomye aỹem Rut, maye aỹem 'aramaxashe. Qaq 'am, maiche 'am ỹalamaxat ihuo' le'ec, ỹoqo'oye iuen da aỹem 'anapoxonaxanaxaaña na laỹe na 'arpo' da yaqto' aỹem 'antela'a.
10Nache so Booz, 'enapeco':
¡'Am ỹalole, Ñim Nataxala', 'am talec naqa'en qome da lchoxonnataxanaxa! Cha'aye de'era dalaxaic 'arauotaxanaqtaic, damaye napacalec so hua'auñi, qaq cha'aye saishet da 'anmittaique ca ña nsoqolec, choxoraq huo'otaq sallaxanec. 11Qaq nagui 'am ỹalole, saishet qome da 'añe'etac, cha'aye 'enauac nam netaña ne'ena mashe ỹaỹaten da 'am naloqnaxanaqte. Qaq ỹoqo'oye aỹem so'ot qome 'enauac cam 'auỹaxanaique. 12Qaq ỹoqta 'eesa da maiche 'am ihuo' lashe, qalaxaye huo'o so lỹa 'arhuo' le'ec maye ỹoqta sa qaỹapeque de'era qana'acnaxac. 13Qalaxaye nache 'ena'am ñaq qoua'a ne'ena na pe, nato' qonte' da huo'otaq somaye ipactelec da ỹo'ot de'era, qaq no'on da ỹo'ot, qaq da huo'otaq saishet da ỹo'ot, nache nagui 'am sanem da ỹa'aqtac da 'am selo'ogue qome, hua'aqchigui ñaqa'en Ñim Nataxala'. Qaq nagui, no'on da 'auo'oche, nato' qonte'.
14Qaq se'eso pe nache aso Rut nnaataua'alo naua lapia'ate so Booz. Qaq co'ollaq ña qaỹata'aguet so na'a'q, nache ñisheguem asomaye, co'ollaq ña napaltalec na 'alhua. Cha'aye so Booz 'enapeco': «Saishet qome da huo'o ca ỹaỹaten da qoueta'a ne'ena ichegoxosoxonqa'.»
15Nache so Booz 'enapega asomaye, 'eeta':
«Ña 'anqat na 'arpo', nache 'anasoqchiguiñi qome.»
Nache asomaye nasoqchiguiñi so lapo', nache so Booz iỹoxolec somaye so veinte kilos na cebada. Ime, nache itauan da ỹasaxalec so lla'ac, huaña nache jec asomaye da ỹe'eguelaxaua'a so huaqta'a't nỹecpi.
16Nache aso Rut co'ollaq ivireua'a so netaña aso lachoro, nache aso lachoro inat asomaye, 'eeta':
¿Qaq ca 'eetec cam 'anqo'ona, 'am ỹalole?
Nache aso Rut, da'aqtaxanem asomaye 'enauac nam ỹo'ot so Booz. 17Qataq nataqa'en 'enapec asomaye:
Aỹem ỹanem ne'ena veinte kilos na cebada, nache aỹem 'enapega, 'eeta': Yaqto' saishet da qaica ca 'aya'ac qom 'avireua'a aca 'arachoro.
18Nache aso Noemí 'enapego' asomaye, 'eeta':
'Am ỹalole, 'auata'a nagui ca 'eetec qome ca qaỹataxaateuga de'era, cha'aye se'eso ỹale saishet qome da nmatec ne'ena na'a'q, da saxanaxa da ỹañoxot da ỹoicnapec ca lataxac de'era.
