Cantares 1

₂¡Sauotaique da aỹem 'anapigoxoi'!

Ỹataqta napacalec da lamaic na lataxa da 'arauotaxanaqtaic.

₃Ỹataqta ama da laitaỹaxac na 'ancoraxat,

qataq da qanasaxauec da 'are'enaxat

nache 'eeta'am na coraxat da huaỹoxon na ama laitaỹaxac.

¡Ỹoqo'oye ỹataqta 'am nqopita na qa'ampiolec!

₄¡Aỹem 'auauec! ¡Sa ñaỹaloxonaq qome!

¡'Am nta'a, ñaq aỹem 'auauegueua'a ca 'aro'ochaqa'!

So'otaq ca qantonaxac da salegaqta'a't.

She'eguelaxasoxolec da seuennaqte

da 'arauotaxanaqtaic,

de'era 'arauotaxanaqtaic maye napacalec

da lamaic na lataxa.

¡Mañaxasaco' da ỹataqta 'am nqopita na qa'ampiolec!

₅Qami' 'alpi maye qarma'ai na Jerusalén,

aỹem lairaxaale qalaxaye aỹem 'onaxai,

da ỹaueraxa 'eeta'am da laueraxa na lpe'lpi na Quedar le'ecpi,

da iyacỹaxac qalaq 'eeta'am da lyacỹaxac

na lapoxonaxatpi so Salomón.

₆Saishet qome da qaualleetagui da ỹaueraxa,

na'aictoxo' da ỹavigaxat na ỹo'oc añi nala'.

So ỹaqaỹañicpi aỹem dalemataỹa co'ollaxa

nache aỹem ỹamaxalec da selo'ogue so nañiguishe uva lma'pi,

¡qaq nache secoua'ai da selo'ogue ana maiche ỹañiguishe!

₇Ñaq aỹem 'aua'aqtaxanem, 'am maye 'arauotaxat da ñachaalataxac,

¿chaq hua'ague naxa ca lquia'aqa' 'anqa'en na 'ana'atetpi?

¿Chaq hua'ague naxa ca nmataqa' 'anqa'en ye na'a'q laiñi?

¿Ta'ainco' da 'anshetaique da sheeta'am aca queuoxoi,

da salectaigui na na'atetpi na 'araỹepi?

₈Da huo'otaq sa 'auaỹaten de'era,

'am, maye ỹataqta 'anapacalec da lyacỹaxac na laỹepi 'alpi,

qaq 'am qome, no'on da qoquetegue na lapia' lliguiñi ana nlopi,

nache 'aulotague' ana 'arelo quetaqpiole

huaña ca naloteuga na lma'pi na laỹe qagueta lo'opi.

₉'Am maye 'am ỹoqopitaqte,

ỹataqta 'am 'eeta'am ñaqa'en da lyacỹaxac aca nlo caaỹo

maye lauegaxalate aca laigona so faraón.

₁₀¡Ỹataqta 'onaxail naua 'aramelque

da 'aỹa'aatrañi naua 'arshete!

¡Ỹataqta 'onaxaic na 'arqosot

da 'aỹa'aatañi ana 'arqolapi maye chegaqaigui na conec!

₁₁¡Samaxasoxoolec qome da qaỹo'o't caua 'arshete oro,

maye qalapaxalec na lcat plata!

₁₂So nta'a da ñaq hua'aqtalec so la'axasoxola',

nache na ñecoraxat huaỹoxon da ama laitaỹaxac.

₁₃So ỹauotaxat 'eeta'am ana laỹe' na ña'amnaxat mirra

da huetanguilo naua itetel.

₁₄So ỹauotaxat 'eeta'am ñaqa'en ana lauoxo ana alheña

maye huauga ye lma' ana nañiguishe uvapi ye Engadí.

₁₅¡Ỹataqta 'am 'onaxaale, 'am ỹoqopitaqte,

ỹataqta 'am 'onaxaale!

¡Naua 'ara'ai'tolqa ỹataqta 'onaxaiqa 'eeta'ama caua qoto'olqa!

₁₆¡Ỹataqta 'am 'onaxaicolec, 'am ỹauotaxat,

ỹataqta 'am 'onaxaicolec!

¡Na darala 'auaqpi nache qaracanec!

₁₇Qaq ana qo'oipaq piinopi, nache l-llecnaxanaxatpi ca qarma',

qaq ana qo'oipaqpi ciprés, nache qarhuoyec.